ଭୁବନେଶ୍ୱର: ଅନ୍ଲାଇନ୍ ମାଧ୍ୟମରେ ହେଉଛି ନିଶା କାରବାର । ଫୁଡ୍ ଡେଲିଭେରି କର୍ମଚାରୀ ଗ୍ରାହକକୁ ଯୋଗାଇଛନ୍ତି ଡ୍ରଗ୍ସ । ଏ କଥା ଆମେ କହୁନୁ, ଆଜି ‘ନିଶାମୁକ୍ତ ଭାରତ ଅଭିଯାନ’ର ଏକ ବୈଠକରେ ବିସ୍ଫୋରକ ବୟାନ ଦେଇଛନ୍ତି ଦ୍ୱୈତନଗରୀର ପୁଲିସ କମିଶନର୍ ସୌମେନ୍ଦ୍ର ପ୍ରିୟଦର୍ଶୀ । ଅନ୍ଲାଇନ୍ ଫୁଡ୍ ଡେଲିଭରୀ ସ୍ୱିଗିରେ ଆସୁଛି ଡ୍ରଗ୍ସ ବୋଲି ପୁଲିସ କମିଶନର ଶ୍ରୀ ପ୍ରିୟଦର୍ଶୀ କହିଛନ୍ତି । ବିଶେଷ କରି ଖାଦ୍ୟ ଡେଲିଭରି ଦେଉଥିବା ସ୍ୱିଗି ଭଳି ଅନେକ ସଂସ୍ଥା ରହିଛି ଯେଉଁଥିରେ ରାଜଧାନୀରେ ହେଉଛି ଡ୍ରଗ୍ସ ପରି ଭୟଙ୍କର ନିଶା କାରିବାର । ଏହା ଜରିଆରେ ଡ୍ରଗ୍ସ କାରବାର ହେଉଥିବା ବିଶ୍ୱାସ ହେଉନଥିଲେ ବି ଏହା ସତ । ପୁଲିସ ଡାଳେ ଡାଳେ ଗଲେ ପତ୍ରେ ପତ୍ରେ ଯାଉଛନ୍ତି ଡ୍ରଗ୍ସ ପେଡ୍ଲର୍ । ଖାଦ୍ୟ ଡେଲିଭରି ସଂସ୍ଥା ଜରିଆରେ ଏବେ ନିଷିଦ୍ଧ ନିଶାର କାରବାର ଚାଲିଛି । ନିଶା ମୁକ୍ତ ଭାରତ ଅଭିଯାନ କମିଟିର ପ୍ରଥମ ରାଜ୍ୟସ୍ତରୀୟ ବୈଠକରେ ଏ ନେଇ ଉଦ୍ବେଗ ପ୍ରକାଶ କରିଛନ୍ତି କମିଟି ସଦସ୍ୟ ତଥା ପୁଲିସ କମିଶନର୍ ଶ୍ରୀ ପ୍ରିୟଦର୍ଶୀ ।
‘ଆପଣମାନେ ଅନ୍ଲାଇନ୍ରେ ଖାଦ୍ୟ ଅର୍ଡର କରୁଛନ୍ତି କି?’ ତେବେ ଫୁଡ୍ ଡେଲିଭରି ବୟ ଦେଇଥିବା ପ୍ୟାକେଟ୍କୁ ତନତନ କରି ଯାଞ୍ଚ କରିବା ପରେ ହି ପିଲାଙ୍କୁ ଖାଦ୍ୟ ଦିଅନ୍ତୁ । କାରଣ ଅନ୍ଲାଇନ୍ ଫୁଡ ଡେଲିଭରି ଆଳରେ ପିଲା ଡ୍ରଗ୍ସ ଅର୍ଡର କରି ଥାଇପାରେ । ଡେଲିଭରି ସଂସ୍ଥା ପାଖରେ ପ୍ୟାକେଟ ଯାଞ୍ଚ କରିବାର ସୁଯୋଗ ନଥାଏ । ପୂର୍ବରୁ ବ୍ରାଉନସୁଗର୍ ଓ କୋକେନ ପରି ଡ୍ରଗ୍ସ କେବଳ ସହରୀ ନିଶା ଥିଲା । ହେଲେ ଗାଁ ଗହଳିର ଯୁବପିଢି ଡ୍ରଗ୍ସ ସେବନ ପ୍ରତି ଆକୃଷ୍ଟ ହେଲେଣି । ଏପରିକି ଇଞ୍ଜିନିଅରିଂ କଲେଜ ଛାତ୍ରଛାତ୍ରୀଙ୍କ ପାଖରେ ଡଗ୍ସ ସୀମିତ ରହିନି । ସବୁ କଲେଜରେ ବ୍ୟାପକ ହେଲାଣି ଡ୍ରଗ୍ସ କାରବାର । ଭାରତକୁ ନିଶା ମୁକ୍ତ କରିବା ପାଇଁ ନିଶା ମୁକ୍ତ ଭାରତ ଅଭିଯାନ କମିଟିକୁ ଯୁବ ପିଢ଼ିଙ୍କ ସମେତ ଶିକ୍ଷାନୁଷ୍ଠାନ ଯାଇ ସଚେତନ କରିବାକୁ ବୈଠକରେ ନିଷ୍ପତ୍ତି ନିଆଯାଇଛି । ଖୁବ୍ ଶୀଘ୍ର ନିଶା ମୁକ୍ତ ଭାରତ ଅଭିଯାନ ନିଶା ନିବାରଣ ପାଇଁ ଆକ୍ସନ ପ୍ଲାନ ପ୍ରସ୍ତୁତ କରିବାକୁ ଯାଉଛି । ଯାହାକୁ କାର୍ଯ୍ୟକାରୀ କରିବା ପାଇଁ ନଶା ମୁକ୍ତ ଭାରତ ଅଭିଯାନ କମିଟିର କିଛି ସଦସ୍ୟଙ୍କୁ ନେଇ ସ୍ୱତନ୍ତ୍ର ସେଲ୍ ଗଠନ କରିବେ ରାଜ୍ୟ ସରକାର । ଏଥିରେ ଏନ୍ଜିଓମାନଙ୍କର ସହାୟତା ନିଆଯିବ । ଯେଉଁମାନେ ମୁଖ୍ୟତଃ ସଚେତନତା କାର୍ଯ୍ୟକ୍ରମ କରିବା ସହ ଶିକ୍ଷାନୁଷ୍ଠାନଠାରୁ ୧୦୦ ମିଟର ଦୂରରେ ସିଗାରେଟ ବିକ୍ରି ନ ହେବା ଦିଗରେ ପଦକ୍ଷେପ ନେବେ । ଜିଲ୍ଲାସ୍ତରରେ ବି କମିଟି ଗଠନ କରାଯିବ । ୧୦ ଜିଲ୍ଲାରେ କମିଟି ଗଠନ ସରିଛି । ବାକି ୨୦ ଜିଲ୍ଲାରେ ମଧ୍ୟ ଖୁବ୍ ଶୀଘ୍ର କମିଟି ଗଠନ କରାଯିବ । ନିଶା ନିବାରଣ ଦିଗରେ ରାଜ୍ୟ ସରକାର ଏନ୍ଫୋର୍ସମେଣ୍ଟ୍ ଦିଗରେ ପ୍ରଶଂସନୀୟ କାର୍ଯ୍ୟ କରିଛନ୍ତି । ୨୦୧୮ରେ ୫୨୩ କ୍ୱିଣ୍ଟାଲ ଗଞ୍ଜେଇ ଓ ୧.୦୫୪ କିଲୋଗ୍ରାମ ବ୍ରାଉନସୁଗର୍ ଜବତ କରିଛି ଓଡ଼ିଶା ପୁଲିସ । ୨୦୧୯ରେ ୬୧୮ କ୍ୱିଣ୍ଟାଲ ଗଞ୍ଜେଇ ଓ ୩.୬୪୪ କିଲୋଗ୍ରାମ ବ୍ରାଉନ ସୁଗାର ସିଜ୍ ହୋଇଛି । ୨୦୨୦ରେ ୧୩୭୪ କ୍ୱିଣ୍ଟାଲ ଗଞ୍ଜେଇ ଓ ୩୪.୩୨ କିଲେଗ୍ରାମ ବ୍ରାଉନ ସୁଗାର ଜବତ କରାଯାଇଛି । ୨୦୨୧ରେ ୧୬୭୫ କ୍ୱିଣ୍ଟାଲ ଗଞ୍ଜେଇ ଓ ୫୦ କିଲୋଗ୍ରାମ ବ୍ରାଉନ୍ସୁଗର୍ ରେଡ୍ ସମୟରେ ଧରାପଡ଼ିଥିଲା । ୨୦୨୨ରେ ୧୫୪୬ କ୍ୱିଣ୍ଟାଲ ଗଞ୍ଜେଇ ଓ ୭୬.୮୩୨ କିଲୋଗ୍ରାମ ବ୍ରାଉନ୍ସୁଗର୍ ସିଜ୍ କରାଯାଇଥିଲା । ୨୦୨୩ ସେପ୍ଟେମ୍ବର ସୁଦ୍ଧା ୧୯୪୭ କ୍ୱିଣ୍ଟାଲ ଗଞ୍ଜେଇ ଓ ୩୭ କିଲୋଗ୍ରାମ ବ୍ରାଉନସୁଗର୍ ଜବତ କରିବାରେ ସଫଳତା ପାଇଛି ପୁଲିସ । ହେଲେ ରାଜ୍ୟରେ ବଢ଼ୁଥିବା ନିଶା କାରବାର ଉଦୟ ରାଜ୍ୟ ସରକାର ଓ ପୁଲିସର ମୁଣ୍ଡବ୍ୟଥାର କାରଣ ପାଲିଟିଯାଇଛି । ତେଣୁ ଏବେ ଏହାରି ଦିଗର କଠୋର କାର୍ଯ୍ୟାନୁଷ୍ଠାନ ଆରମ୍ଭ କରାଯିବା ନେଇ ଶ୍ରୀ ପ୍ରିୟଦର୍ଶୀ କହିଛନ୍ତି । ଆଗକୁ ଡେଲିଭେରୀ କର୍ମଚାରୀମାନଙ୍କ ଉପରେ କଡ଼ା ନଜର ରଖାଯିବା ବୋଲି ସିପି କହିଛନ୍ତି ।
ନିଶା ବଳୟରେ ଯୁବଗୋଷ୍ଠୀ, ସ୍ୱିଗିରେ ଆସୁଛି ଡ୍ରଗ୍ସ: ପୁଲିସ କମିଶନର୍
