ଭୁବନେଶ୍ୱର: ନଭେମ୍ବର ୨୬ରୁ ବିଧାନସଭାର ଶୀତକାଳୀନ ଅଧିବେଶନ ଆରମ୍ଭ ହେବ। ତାହା ଡିସେମ୍ବର ୩୧ ପର୍ଯ୍ୟନ୍ତ ଚାଲିବ। ଏହାରି ମଧ୍ୟରେ ୩୦ଟି କାର୍ଯ୍ୟଦିବସ ରହିବ। ବୁଧବାର ବିଧାନସଭା ସଚ୍ଚିବାଳୟ ପକ୍ଷରୁ ଜାରି ହୋଇଛି ଏହି ବିଜ୍ଞପ୍ତି। ମୋଟ୍ ୩୦ କାର୍ଯ୍ୟକାରୀ ଦିବସ ମଧ୍ୟରୁ ନଭେମ୍ବରରେ ୫ ଓ ଡିସେମ୍ବର ମାସରେ ୨୫ କାର୍ଯ୍ୟ ଦିବସ ରହିବ। ପ୍ରଥମ ଦିବସରେ ଅର୍ଥମନ୍ତ୍ରୀ ଦାୟିତ୍ୱରେ ଥିବା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୨୦୨୪-୨୫ର ତିନି ମାସ ପାଇଁ ଅତିରିକ୍ତ ବଜେଟ୍ ଉପସ୍ଥାପନ କରିବେ। ବଜେଟ୍ ଉପରେ ଡିସେମ୍ବର ୨, ୩ ଓ ୪ରେ ତିନି ଦିନ ଧରି ଆଲୋଚନା ହେବ। ଏହା ପରେ ଡିସେମ୍ବର ୫ରେ ବିନିଯୋଗ ବିଲ ପାରିତ ହେବ। ବିଧାନସଭା ନିୟମାନୁସାରେ ବର୍ଷକୁ ୬୦ ଦିନ ଗୃହ ଚାଲିବା କଥା। ପୂର୍ବ ବିଜେଡି ସରକାର ଧାର୍ଯ୍ୟ ସମୟ ଠାରୁ କମ୍ ଦିନ ଗୃହ ଚଳାଉଥିବାରୁ ବିଜେପି ବାରମ୍ବାର ପ୍ରତିବାଦ କରିଥିଲା। ଏବେ କ୍ଷମତାକୁ ଆସିବା ପରେ ବିଜେପି ସରକାର ସାମ୍ବିଧାନିକ ନୀତି ନିୟମ ପାଳନ ଉପରେ ଗୁରୁତ୍ୱ ଦେଇଛି। ଅସ୍ଥାୟୀ କ୍ୟାଲେଣ୍ଡର ଅନୁଯାୟୀ ସରକାରୀ କାର୍ଯ୍ୟ ପାଇଁ ଅତି କମରେ ୨୦ ଦିନ ଏବଂ ବିଲ୍ ଓ ସଂକଳ୍ପକୁ ମିଶାଇ ବେସରକାରୀ ସଦସ୍ୟ ବ୍ୟବସାୟ ପାଇଁ ୫ ଦିନ ସମୟ ରହିିଛି। ତେବେ ନଭେମ୍ବର ୨୬ରୁ ଡିସେମ୍ବର ୩୧ ପର୍ଯ୍ୟନ୍ତ ସମସ୍ତ ରବିବାର ଗୃହ ବନ୍ଦ ରହିବ ଏବଂ ଡିସେମ୍ବର ୨୫ ରେ ଖ୍ରୀଷ୍ଟମାସ କାରଣରୁ ଗୃହ ଚାଲିବ ନାହିଁ।
ନଭେମ୍ବର ୨୬ରୁ ବିଧାନସଭା ଶୀତ ଅଧିବେଶନ
