ନୂଆଦିଲ୍ଲୀ: ପୁଣି ଉତ୍ତରାଖଣ୍ଡରେ ପ୍ରକୃତିର କୋପ । ରୁଦ୍ରପ୍ରୟାଗ ଓ ଚମୋଲି ଜିଲ୍ଲାରେ ବାଦଲ ଫଟା ବର୍ଷା । ବ୍ୟାପକ କ୍ଷୟକ୍ଷତି । ରୁଦ୍ରପ୍ରୟାଗର ବାରେଠ ଦୁଙ୍ଗାର ଟୋକ ଅଞ୍ଚଳ ଏବଂ ଚମୋଲିର ଦେବାଲ ଅଞ୍ଚଳରେ ବାଦଲଫଟା ବର୍ଷା ହୋଇଛି । ଏଥିଯୋଗୁ ଅଳକାନନ୍ଦା ଓ ମନ୍ଦାକିନୀ ନଦୀ ଫୁଲିବା ସହ ଅଚାନକ ବନ୍ୟାରେ ବହୁ ଘରଦ୍ବାର ଓ ବ୍ରିଜ ଭୁଶୁଡ଼ି ପଡ଼ିଛି । ଧ୍ବଂସାବଶେଷ ତଳେ ପରିବାର ଚାପି ହୋଇ ରହିଛନ୍ତି । ଅନେକ ଆହତ ଇଛନ୍ତି । ଯୁଦ୍ଧକାଳୀନ ଭିତ୍ତିରେ ରିଲିଫ ଓ ଉଦ୍ଧାର କାର୍ଯ୍ୟ ଚାଲିଛି ।
ରାସ୍ତାଘାଟ ବନ୍ଦ ହୋଇଥିବା ଯୋଗୁଁ ଉଦ୍ଧାର କାର୍ଯ୍ୟରେ ଅସୁବିଧା ହେଉଛି । NDRF ଏବଂ SDRF ଟିମ୍ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି । ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମୀ କହିଛନ୍ତି, ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ସେ ଅଧିକାରୀମାନଙ୍କ ସହ ନିରନ୍ତର ସମ୍ପର୍କରେ ଅଛନ୍ତି । ଚମୋଲିରେ ଦୁଇ ଜଣ ନିଖୋଜ ଥିବା ଏବଂ ଅନେକ ପଶୁ ଭଗ୍ନାବଶେଷ ତଳେ ଚାପି ହୋଇଥିବା ଜିଲ୍ଲାପାଳ ସନ୍ଦୀପ ତିୱାରୀ କହିଛନ୍ତି । ପୂର୍ବରୁ ଚମୋଲିରେ ଗତ ସପ୍ତାହରେ ବାଦଲ ଫଟା ବର୍ଷାରେ ବ୍ୟାପକ କ୍ଷୟକ୍ଷତି ଘଟିଥିଲା । ରାସ୍ତାଘାଟ ଅବରୋଧ ସହ ଅନେକ ଘରେ କାଦୁଅ ପଶିଥିଲା ।
