ନୂଆଦିଲ୍ଲୀ : ୨୦୨୬ ଏପ୍ରିଲ ୧୯ ତାରିଖରୁ ଉତ୍ତରାଖଣ୍ଡ ଚାରିଧାମ ଯାତ୍ରା ଆରମ୍ଭ ହେବାକୁ ଯାଉଛି। ଏହି ଦିନ ଗଙ୍ଗୋତ୍ରୀ ଏବଂ ଯମୁନୋତ୍ରୀ ମନ୍ଦିରର ଦ୍ୱାର ଖୋଲିବ। ତୀର୍ଥଯାତ୍ରୀଙ୍କ ପାଇଁ ପଞ୍ଜୀକରଣ ପ୍ରକ୍ରିୟା ମାର୍ଚ୍ଚ ୬ ତାରିଖରୁ ଆରମ୍ଭ ହୋଇଥିଲା । ସରକାର ତୀର୍ଥଯାତ୍ରୀମାନଙ୍କୁ ଉନ୍ନତ ସୁବିଧା ଯୋଗାଇବା ପାଇଁ ବ୍ୟବସ୍ଥା କରୁଛନ୍ତି । ସରକାର ପୂର୍ବରୁ ଚାରିଧାମ ମନ୍ଦିରରେ ମୋବାଇଲ୍ ଫୋନ୍ ନିଷିଦ୍ଧ କରିବାକୁ ନିଷ୍ପତ୍ତି ନେଇସାରିଛନ୍ତି। ଏହି ସମୟରେ, ବଦ୍ରିନାଥ-କେଦାର ମନ୍ଦିର କମିଟି ଅଣହିନ୍ଦୁମାନଙ୍କୁ ମନ୍ଦିର ପ୍ରବେଶରୁ ନିଷେଧ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ଆଗାମୀ ଚାରିଧାମ ଯାତ୍ରା ସମୟରେ କେଦାରନାଥ ଏବଂ ବଦ୍ରିନାଥ ମନ୍ଦିର ପରିସରରେ ଅଣହିନ୍ଦୁମାନଙ୍କୁ ପ୍ରବେଶ କରିବାକୁ ଅନୁମତି ଦିଆଯିବ ନାହିଁ। BKTC ଏହାର ଅଧିକାର କ୍ଷେତ୍ର ଅନ୍ତର୍ଗତ 45ଟି ଅନ୍ୟ ମନ୍ଦିରରେ ମଧ୍ୟ ଅଣହିନ୍ଦୁମାନଙ୍କୁ ପ୍ରବେଶରୁ ନିଷେଧ କରିଛି ।
BKTC ସଭାପତି ହେମନ୍ତ ଦ୍ୱିବେଦୀଙ୍କ ଅଧ୍ୟକ୍ଷତାରେ ଡେରାଡୁନରେ ମନ୍ଦିର କମିଟି କାର୍ଯ୍ୟାଳୟରେ ଅନୁଷ୍ଠିତ ଏକ ବଜେଟ୍ ବୈଠକରେ ଏହି ନିଷ୍ପତ୍ତି ନିଆଯାଇଛି । କମିଟି ଚାରଧାମ ମନ୍ଦିରରେ ଅଣହିନ୍ଦୁଙ୍କ ପ୍ରବେଶ ନିଷେଧ କରିବା ଉପରେ ବିଚାର କରୁଛି । ସେ କହିଛନ୍ତି ଯେ ଏହି ନିଷ୍ପତ୍ତି ଆସନ୍ତା ମାସରୁ ଆରମ୍ଭ ହେଉଥିବା ତୀର୍ଥଯାତ୍ରା ସହିତ କାର୍ଯ୍ୟକାରୀ ହେବ, ଏବଂ ଅଣହିନ୍ଦୁ ମାନେ ଆଉ ମନ୍ଦିର ପରିସର ଏବଂ ଗର୍ଭଗୃହରେ ପ୍ରବେଶ କରିପାରିବେ ନାହିଁ । ସେ ପୂର୍ବରୁ କହିଥିଲେ ଯେ ଅଣ-ହିନ୍ଦୁଙ୍କ ପ୍ରବେଶ ନିଷେଧ ଆଦି ଶଙ୍କରାଚାର୍ଯ୍ୟଙ୍କ ସମୟରୁ ଆରମ୍ଭ ହୋଇଥିଲା ।
ଏହି ବୈଠକରେ କମିଟି ଚାରିଧାମ ଯାତ୍ରାର ପ୍ରସ୍ତୁତିକୁ ହିସାବକୁ ନେଇ ଆଗାମୀ ଆର୍ଥିକ ବର୍ଷ ପାଇଁ ଆନୁମାନିକ ବଜେଟକୁ ଅନୁମୋଦନ କରିଛି । ୨୦୨୬-୨୭ ବର୍ଷ ପାଇଁ ମୋଟ୍ ୧୨୧ କୋଟି ଟଙ୍କାର ବଜେଟ ମଧ୍ୟରୁ ବଦ୍ରିନାଥ ଧାମ ପାଇଁ ୫୭.୫ କୋଟି ଏବଂ କେଦାରନାଥ ଧାମ ପାଇଁ ୬୩.୬ କୋଟି ଟଙ୍କା ବ୍ୟୟବରାଦ କରାଯାଇଛି । ତେବେ ସୂଚନା ଅନୁସାରେ କେଦାରନାଥ ମନ୍ଦିରର ଦ୍ୱାର ଏପ୍ରିଲ ୨୨ରେ ଖୋଲିବ । ଯେତେବେଳେ ବଦ୍ରିନାଥ ମନ୍ଦିରର ଦ୍ୱାର ୨୩ ଏପ୍ରିଲ ୨୦୨୬ରେ ଖୋଲିବ । ୧୯ ଏପ୍ରିଲ ଅକ୍ଷୟ ତୃତୀୟା ଅବସରରେ ଗଙ୍ଗୋତ୍ରୀ ଏବଂ ଯମୁନୋତ୍ରୀର ଦ୍ୱାର ମଧ୍ୟ ଖୋଲାଯିବ ।
