ନୂଆଦିଲ୍ଲୀ: ପୁଣି ଫେରିଲା କରୋନା ଡର। ନୂଆ ଭାରିଆଣ୍ଟର ନାଁ ‘ସିକାଡ଼ା’। ପ୍ରଥମେ ଦକ୍ଷିଣ ଆଫ୍ରିକାରେ ଠାବ ହୋଇଥିଲା । ବର୍ତ୍ତମାନ ୨୩ଟି ଦେଶକୁ ମାଡ଼ିଗଲାଣି । ବୈଜ୍ଞାନିକ ଏହାର ନାଁ BA.3.2 ବା ‘ସିକାଡ଼ା ରଖିଛନ୍ତି । ଏହା ଓମିକ୍ରନ୍ ପରିବାରର ଏକ ଅଂଶ। ଏଥିରେ ଅନେକ ପରିବର୍ତ୍ତନ ଦେଖିବାକୁ ମିଳିଛି । ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଏହା ଉପରେ ନଜର ରଖିଛି । ‘ସିକାଡ଼ା’ ଏକ ପ୍ରକାରର ପୋକ। ଯିଏ ବହୁ ବର୍ଷ ଧରି ମାଟି ତଳେ ଶୋଇ ରହିବା ପରେ ବାହାରକୁ ଆସେ । ଏହି ଭୂତାଣୁ ମଧ୍ୟ ୨୦୨୨ ପରଠାରୁ ଗୋପନରେ ଥିଲା । ଏବେ ପୁଣି ଦେଖାଦେଇଛି। ତେଣୁ ଏହାର ନାମ ସିକାଡ଼ା ରଖାଯାଇଛି । ସିକାଡା ପ୍ରଥମେ ଦକ୍ଷିଣ ଆଫ୍ରିକାରେ ଜଣେ ଶିଶୁଠାରେ ଦେଖାଯାଇଥିଲା ।
ବର୍ତ୍ତମାନ ସୁଦ୍ଧା ଆମେରିକା, ଜାପାନ, ବ୍ରିଟେନ୍ ଏବଂ ୟୁରୋପ ସମେତ ପ୍ରାୟ ୨୩ଟି ଦେଶରେ ଏହା ଚିହ୍ନଟ ହୋଇସାରିଛି । ଏହାର ଲକ୍ଷଣ ପୂର୍ବ ଭାରିଆଣ୍ଟ ପରି ସମାନ । କାଶ, ଗଳା ବସିଯିବା, ଜ୍ୱର, ମୁଣ୍ଡବିନ୍ଧା ଏବଂ ନାକରୁ ପାଣି ବୋହିବାର ଲକ୍ଷଣ ଦେଖାଦିଏ । ସିକାଡ଼ା ଭୂତାଣୁରେ ପୂର୍ବ ଭାରିଆଣ୍ଟଠାରୁ ୭୦ରୁ ଅଧିକ ପ୍ରକାରର ପରିବର୍ତ୍ତନ ହୋଇଛି । ତେଣୁ ଏହା ଶରୀରର ରୋଗ ପ୍ରତିରୋଧକ ଶକ୍ତିକୁ ଚକମା ଦେଇପାରେ । କିନ୍ତୁ ଏହା ଦ୍ୱାରା ରୋଗୀ ଗୁରୁତର ହେବା କିମ୍ବା ହସ୍ପିଟାଲରେ ଭର୍ତ୍ତି ହେବାର କୌଣସି ପ୍ରମାଣ ଏପର୍ଯ୍ୟନ୍ତ ମିଳିନାହିଁ । ସିକାଡା ପାଇଁ ଟିକା ଏବେ ମଧ୍ୟ ପ୍ରଭାବଶାଳୀ ଅଛି । ହାତ ଧୋଇବା, ସଫାସୁତୁରା ରହିବା ଏବଂ ଲକ୍ଷଣ ଦେଖାଦେଲେ ପରୀକ୍ଷା କରିବା ପାଇଁ ପରାମର୍ଶ ଦିଆଯାଇଛି। WHO ଏହି ସିକାଡା ଉପରେ ନଜର ରଖିଛି ।
