କ୍ୟାଟ ବାର ଆସୋସିଏସନର ନବ ନିର୍ବାଚିତ କର୍ମକର୍ତ୍ତାମାନଙ୍କ ଦାୟିତ୍ୱ ଗ୍ରହଣ ଉତ୍ସବ ଗମ୍ଭୀର ଓ ଉତ୍ସାହମୟ ପରିବେଶରେ ଆୟୋଜିତ ହୋଇଯାଇଛି। ବିଦାୟୀ ସଭାପତି ଡ଼କ୍ଟର ଚିତ୍ତ ରଞ୍ଜନ ମିଶ୍ରଙ୍କ ପୌରାହିତ୍ୟରେ ଆୟୋଜିତ ଏହି ଉତ୍ସବରେ ନିର୍ବାଚନ ଅଧିକାରୀ ନିର୍ମଳ ରଞ୍ଜନ ରାଉତରାୟ ସମସ୍ତଙ୍କୁ ସ୍ୱାଗତ କରିବା ସହିତ ନିର୍ବାଚିତ ସଭ୍ୟମାନଙ୍କ ନାମ ତାଲିକା ଘୋଷଣା କରିଥିଲେ। ଏହି ଅବସରରେ ହାଇକୋର୍ଟ ବାର ଆସୋସିଏସନ ସଭାପତି ବରିଷ୍ଠ ଆଇନଜୀବୀ ଲଲାଟେନ୍ଦୁ ସାମନ୍ତରାୟ ଓ ବରିଷ୍ଠ ଆଇନଜୀବୀ ଉମା ବଲ୍ଲଭ ମହାପାତ୍ର ଅତିଥି ଭାବରେ ଯୋଗଦେଇଥିଲେ।
ନୂତନ ସଭାପତି ଦେବେନ୍ଦ୍ର କୁମାର ବେହେରା, ସମ୍ପାଦକ ରମାକାନ୍ତ ସାହୁ, ଉପସଭାପତି ପ୍ରଭାସ ରଞ୍ଜନ ଜୀବନ ଦାଶଙ୍କ ସମେତ ଅନ୍ୟାନ୍ୟ ପଦାଧିକାରୀମାନେ ଔପଚାରିକ ଭାବରେ ନିଜ ଦାୟିତ୍ୱ ଗ୍ରହଣ କରିଥିଲେ। ଏହି ଉତ୍ସବରେ ସମସ୍ତ ପୂର୍ବତନ ପଦାଧିକାରୀ ଓ ବହୁ ସଂଖ୍ୟକ ଆଇନଜୀବୀ ସଦସ୍ୟ ଉପସ୍ଥିତ ଥିଲେ। ନବନିର୍ବାଚିତ ସଭାପତି ତାଙ୍କ ଅଭିଭାଷଣରେ ସମସ୍ତଙ୍କ ଆସ୍ଥା ପାଇଁ କୃତଜ୍ଞତା ଜଣାଇବା ସହ ଆସୋସିଏସନର ଉନ୍ନତି ଓ ଆଇନଜୀବୀମାନଙ୍କ ସ୍ୱାର୍ଥରକ୍ଷା ପାଇଁ କାର୍ଯ୍ୟ କରିବେ ବୋଲି କହିଥିଲେ।
ସମ୍ପାଦକ ମଧ୍ୟ ନିଜ ଅଭିଭାଷଣରେ ସଂଗଠନକୁ ଆଧୁନିକ ଓ ସକ୍ରିୟ କରିବା ପାଇଁ ନୂତନ ପଦକ୍ଷେପ ନିଆଯିବ ବୋଲି ଆଶ୍ୱାସନା ଦେଇଥିଲେ। ସମସ୍ତ କାର୍ଯ୍ୟକ୍ରମକୁ ପୂର୍ବତନ ସମ୍ପାଦକ କୈଳାସ ଚନ୍ଦ୍ର ଶତପଥୀ ସଂଚାଳନ କରିଥିଲେ। କାର୍ଯ୍ୟକ୍ରମର ଶେଷରେ ପୂର୍ବତନ ଉପସଭାପତି ସୁଶାନ୍ତ କୁମାର ନାୟକ ଧନ୍ୟବାଦ ପ୍ରଦାନ କରିବା ସହିତ ସମସ୍ତଙ୍କ ସହଯୋଗ ଓ ଏକତାରେ ଆଗକୁ ବଢିବାକୁ ଆହ୍ୱାନ ଦେଇଥିଲେ।
