ପୁଣିଥରେ ରାଜ୍ୟକୁ ଫେରିଛି ପୋସ୍କୋ। JSW Steel ସହ ପୋସ୍କୋର ମିଳିତ ଉଦ୍ୟମରେ ଦୁଇଟି ବଡ଼ ଇସ୍ପାତ କାରଖାନା ସ୍ଥାପନର ପଥ ସ୍ପଷ୍ଟ ହୋଇଛି। ଢେଙ୍କାନାଳ ଓ କେନ୍ଦୁଝରରେ ଏହି ମେଗା ପ୍ରକଳ୍ପ ଆସୁଥିବାରୁ ଶିଳ୍ପୀୟ ଆଶା ଆଉଥରେ ଜାଗୃତ ହୋଇଛି। ଢେଙ୍କାନାଳରେ ୬ MTPA କ୍ଷମତାର ସମନ୍ୱିତ ଇସ୍ପାତ କାରଖାନା ଏବଂ କେନ୍ଦୁଝରରେ ୫ MTPA କ୍ଷମତାର ଅନ୍ୟ ଏକ ପ୍ଲାଣ୍ଟ ସ୍ଥାପନ ହେବ। ପ୍ରାୟ ୩୫ ହଜାର କୋଟି ଟଙ୍କାର ନିବେଶ ସହିତ ଏହି ପ୍ରକଳ୍ପ ଓଡ଼ିଶାର ଶିଳ୍ପ ବିକାଶକୁ ନୂଆ ଗତି ଦେବାକୁ ଯାଉଛି। ରାଜ୍ୟ ସରକାର ଆବଶ୍ୟକ ଜମି, ଅନୁମତି ଓ କ୍ଲିୟରାନ୍ସ ସମୟରେ ଯୋଗାଇବାକୁ ଆଶ୍ୱାସନ ଦେଇଛନ୍ତି।
ସୋମବାର ନୂଆଦିଲ୍ଲୀରେ ଭାରତ-କୋରିଆ ବ୍ୟବସାୟ ଫୋରମରେ କେନ୍ଦ୍ର ବାଣିଜ୍ୟ ଏବଂ ଶିଳ୍ପ ମନ୍ତ୍ରୀ ପୀୟୁଷ ଗୋୟଲ, କୋରିଆ ଗଣରାଜ୍ୟର ଶିଳ୍ପ, ବାଣିଜ୍ୟ ଏବଂ ସମ୍ବଳ ମନ୍ତ୍ରୀ ଜଙ୍ଗ-ୱାନ୍ କିମ୍, JSW ଗ୍ରୁପର ଅଧ୍ୟକ୍ଷ ସଜ୍ଜନ ଜିନ୍ଦଲ ଏବଂ POSCO ଅଧ୍ୟକ୍ଷ ଚାଙ୍ଗ ଇନ-ହ୍ୱା ଏବଂ ଉଭୟ କମ୍ପାନୀର ବରିଷ୍ଠ କାର୍ଯ୍ୟନିର୍ବାହୀଙ୍କ ଉପସ୍ଥିତିରେ ବୁଝାମଣାପତ୍ର (MoU) ସ୍ୱାକ୍ଷରିତ ହୋଇଛି।ଏହି ମିଳିତ ଉଦ୍ୟମ ୨୦୩୧ ସୁଦ୍ଧା କାର୍ଯ୍ୟକ୍ଷମ ହେବା ଲକ୍ଷ୍ୟ ରଖିଛି। ପ୍ରକଳ୍ପରେ ଉଚ୍ଚ ଗୁଣସ୍ତରୀୟ ଫ୍ଲାଟ୍ ଇସ୍ପାତ ଉତ୍ପାଦନ ହେବ, ଯାହା ଅଟୋମୋଟିଭ୍ ଓ ଅନ୍ୟ ଶିଳ୍ପକୁ ଶକ୍ତି ଦେବ। ପୋସ୍କୋର ପ୍ରଯୁକ୍ତି ଦକ୍ଷତା ଓ JSWର କାର୍ଯ୍ୟାନ୍ୱୟନ କ୍ଷମତାର ସମନ୍ୱୟ ଏହି ପ୍ରକଳ୍ପକୁ ଦେଶର ଇସ୍ପାତ କ୍ଷେତ୍ରରେ ମାଇଲଷ୍ଟୋନ୍ କରିପାରେ। ଓଡ଼ିଶା ପୁଣିଥରେ ଦେଶର ଶିଳ୍ପ ହବ୍ ହେବାକୁ ଯାଉଛି।
ଏହି ପଦକ୍ଷେପକୁ ସ୍ୱାଗତ କରି ଶିଳ୍ପ ବିଭାଗର ଅତିରିକ୍ତ ମୁଖ୍ୟ ସଚିବ ହେମନ୍ତ ଶର୍ମା କହିଛନ୍ତି, “ଏହା ରାଜ୍ୟ ପାଇଁ ଭଲ ଖବର। ଢେଙ୍କାନାଳ ସହିତ କେନ୍ଦୁଝରରେ ମଧ୍ୟ ଏକ ଇସ୍ପାତ କାରଖାନା ସ୍ଥାପନ କରାଯିବ। JSW ଏବଂ POSCO ମଧ୍ୟରେ ଏକ ଚୁକ୍ତିନାମା ସ୍ୱାକ୍ଷରିତ ହୋଇଛି। ବର୍ତ୍ତମାନ ଆମର ଦୁଇଟି ଇସ୍ପାତ କାରଖାନା ଅଛି, ଗୋଟିଏ କେନ୍ଦୁଝରରେ ୫ ନିୟୁତ ଟନ୍ କ୍ଷମତା ବିଶିଷ୍ଟ ଏବଂ ଅନ୍ୟଟି ୬ ନିୟୁତ ଟନ୍ ପ୍ଲାଣ୍ଟ ଢେଙ୍କାନାଳରେ। ଢେଙ୍କାନାଳରେ ବର୍ତ୍ତମାନ ପ୍ରାୟ ୧୦୦ ଏକର ଜମି ଉପଲବ୍ଧ ଅଛି ଏବଂ ଅଧିକ ଜମି ଆବଶ୍ୟକ ହୋଇପାରେ, ଯାହାକୁ ରାଜ୍ୟ ସରକାର ଯୋଗାଇ ଦେବେ। ସମସ୍ତ ଆବଶ୍ୟକୀୟ ଅନୁମୋଦନ ଏବଂ ମଞ୍ଜୁରୀ ମଧ୍ୟ ସମୟ ମଧ୍ୟରେ ଯୋଗାଇ ଦିଆଯିବ।”
ଏହି ପରିପେକ୍ଷୀରେ ଜେଏସଡବ୍ଲୁ ଷ୍ଟିଲର ଯୁଗ୍ମ ପରିଚାଳନା ନିର୍ଦ୍ଦେଶକ ଏବଂ ସିଇଓ ଜୟନ୍ତ ଆଚାର୍ଯ୍ୟ କହିଛନ୍ତି ଯେ, “ପୋସ୍କୋ ସହିତ ଏହି ମିଳିତ ଉଦ୍ୟମ ଭାରତର ଦୀର୍ଘକାଳୀନ ଅଭିବୃଦ୍ଧି କାହାଣୀ ପ୍ରତି ଆମର ଦୃଢ଼ ବିଶ୍ୱାସକୁ ପ୍ରତିଫଳିତ କରେ। ଏହି ସହଭାଗୀତା ପୋସ୍କୋର ପ୍ରଯୁକ୍ତିବିଦ୍ୟା ବିଶେଷଜ୍ଞତା ଏବଂ ପ୍ରକଳ୍ପ କାର୍ଯ୍ୟାନ୍ୱୟନ ଏବଂ ମୂଲ୍ୟ ନେତୃତ୍ୱ କ୍ଷେତ୍ରରେ JSWର କ୍ଷମତାକୁ ଉପଯୋଗ କରିବା ସହିତ ଆମର ଦୃଷ୍ଟିକୋଣ ଏବଂ ପ୍ରତିବଦ୍ଧତାର ସମନ୍ୱୟ ସୁନିଶ୍ଚିତ କରିବ। ଆମେ ଏହାକୁ ଭାରତର ଇସ୍ପାତ ଇକୋସିଷ୍ଟମକୁ ମଜବୁତ କରିବା ଏବଂ ଦେଶର ଶିଳ୍ପ ମୂଲ୍ୟ ଶୃଙ୍ଖଳକୁ ସମର୍ଥନ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖୁଛୁ।”
୩୫ ହଜାର କୋଟି ଟଙ୍କାର ଆନୁମାନିକ ନିବେଶ ସହିତ ପ୍ରତିଷ୍ଠିତ ହେବାକୁ ଥିବା ଏହି ପ୍ରକଳ୍ପ, ଅଟୋମୋଟିଭ୍ ଏବଂ ଅନ୍ୟାନ୍ୟ ପ୍ରୟୋଗ ପାଇଁ ହାଇ-ଗ୍ରେଡ୍ ଫ୍ଲାଟ୍ ଇସ୍ପାତ ଉତ୍ପାଦ ନିର୍ମାଣ କରିବାକୁ ସକ୍ଷମ ହେବ। ପ୍ରସ୍ତାବିତ ପ୍ଲାଣ୍ଟରେ ଇସ୍ପାତ ତିଆରି, ହଟ୍ ରୋଲିଂ ଏବଂ କୋଲ୍ଡ ରୋଲିଂ/ଆବରଣ ପ୍ରକ୍ରିୟା ଅନ୍ତର୍ଭୁକ୍ତ ହେବ। ପ୍ରକଳ୍ପ ପାଇଁ ଜମି ପୂର୍ବରୁ ସୁରକ୍ଷିତ କରାଯାଇଛି ବୋଲି ସରକାରୀ ପ୍ରେସ୍ ବିଜ୍ଞପ୍ତିରେ କୁହାଯାଇଛି।
