ଭୁବନେଶ୍ବର: ଆଜି ଓଡ଼ିଶା ଆସୁଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନ। ଦଳର ସର୍ବୋଚ୍ଚ ସାଂଗଠନିକ ପଦବୀ ସମ୍ଭାଳିବା ପରେ ଏହା ତାଙ୍କର ପ୍ରଥମ ଓଡ଼ିଶା ଗସ୍ତ। ଫୋକସରେ ସାଂଗଠନିକ ସମୀକ୍ଷା ସହ ପଞ୍ଚାୟତ ନିର୍ବାଚନ ପାଇଁ ରଣନୀତି ପ୍ରସ୍ତୁତି । ବିଜେପିର ସାଂଗଠନିକ ପ୍ରକ୍ରିୟାକୁ ସୁଦୃଢ଼ କରିବା ଲକ୍ଷ୍ୟରେ ଦଳର ଜାତୀୟ ଅଧ୍ୟକ୍ଷ ନୀତିନ ନବୀନ ପ୍ରଥମ ଥର ପାଇଁ ଓଡ଼ିଶା ଗସ୍ତରେ ଆସୁଛନ୍ତି । ଆଜି ରାତି ୧୦ଟା ୩୫ ରେ ଭୁବନେଶ୍ୱରରେ ପହଞ୍ଚିବେ । ଆସନ୍ତାକାଲି ଦିନ ସାରା ବିଭିନ୍ନ କାର୍ଯ୍ୟକ୍ରମରେ ଯୋଗଦେଇ ସନ୍ଧ୍ୟାରେ ଦିଲ୍ଲୀ ଫେରିଯିବେ। ୨୦୨୪ ବିଧାନସଭା ନିର୍ବାଚନରେ ସଫଳତା ପରେ ରାଜ୍ୟରେ ମୋହନ ଚରଣ ମାଝୀଙ୍କ ନେତୃତ୍ୱରେ ସରକାର ଗଠନ ହୋଇଛି । ଆସନ୍ତା ବର୍ଷ ହେବାକୁ ଥିବା ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ଦଳୀୟ ପ୍ରସ୍ତୁତି ଓ ବୁଥ୍ ସ୍ତରୀୟ ସଂଗଠନକୁ ସଜାଡ଼ିବା ଦିଗରେ ଏହି ଗସ୍ତକୁ ଗୁରୁତ୍ୱପୂର୍ଣ୍ଣ ମନେ କରାଯାଉଛି । କାଲି ଇ-ବାଇକ୍ ର୍ୟାଲି ମାଧ୍ୟମରେ ସ୍ୱାଗତ କରାଯିବ । ଇନ୍ଧନ ସଂରକ୍ଷଣର ବାର୍ତ୍ତା ଦେଇ ଦଳୀୟ କର୍ମୀମାନେ ଇଲେକ୍ଟ୍ରିକ ବାଇକ୍ ରାଲି ମାଧ୍ୟମରେ ଜାତୀୟ ଅଧ୍ୟକ୍ଷଙ୍କୁ ଜଟଣୀ ପର୍ଯ୍ୟନ୍ତ ନେବାର କାର୍ଯ୍ୟକ୍ରମ ରହିଛି । ରାଜ୍ୟ ସଭାପତି ମନମୋହନ ସାମଲ ଓ ଅନ୍ୟ ବରିଷ୍ଠ ନେତା ଏହାର ସମୀକ୍ଷା କରୁଛନ୍ତି ।
ଜଟଣୀଠାରେ ଆୟୋଜିତ ଭୁବନେଶ୍ୱର ଜିଲ୍ଲା ବିଜେପିର ପ୍ରଶିକ୍ଷଣ କାର୍ଯ୍ୟକ୍ରମରେ ଯୋଗଦେବେ । ଏହା ‘ପଣ୍ଡିତ ଦୀନଦୟାଲ ଉପାଧ୍ୟାୟ ପ୍ରଶିକ୍ଷଣ ମହାଭିଯାନ’ର ଏକ ଅଂଶ। ଏଥିରେ ବୁଥ୍ ସ୍ତରୀୟ ପରିଚାଳନା, ଡିଜିଟାଲ୍ ଯୋଗାଯୋଗ ଏବଂ ସରକାରଙ୍କ ଯୋଜନା ବିଷୟରେ ଆଲୋଚନା ହେବ। ଯେଉଁଥିରେ ପ୍ରାୟ ୫ହଜାର କର୍ମୀ ଓ ସ୍ଥାନୀୟ ପଦାଧିକାରୀ ସାମିଲ ହେବାର ଲକ୍ଷ୍ୟ ରଖାଯାଇଛି । ଗସ୍ତର ଦ୍ୱିତୀୟ ଭାଗରେ ନୀତିନ ନବୀନ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ମନ୍ତ୍ରୀମଣ୍ଡଳର ସଦସ୍ୟମାନଙ୍କ ସହ ଆଲୋଚନା କରିବେ । ଆସନ୍ତା ଜୁନ୍ ୧୨ ରେ ମୋହନ ସରକାର ୨ ବର୍ଷ ପୂରଣ କରୁଥିବାରୁ ସରକାରଙ୍କ ପ୍ରଦର୍ଶନ ଓ ଦଳ ସହ ସମନ୍ୱୟ ରକ୍ଷା ଉପରେ ଆଲୋଚନା ହେବ । ଏହାସହ ରାଜ୍ୟ କୋର୍ କମିଟି ବୈଠକରେ ଆଗାମୀ ନିର୍ବାଚନ ଗୁଡ଼ିକ ପାଇଁ ସାଂଗଠନିକ ସମୀକ୍ଷା କରାଯିବ ।
ରାଜନୈତିକ ଦୃଷ୍ଟିକୋଣରୁ ଜାତୀୟ ଅଧ୍ୟକ୍ଷଙ୍କ ଏହି ଓଡ଼ିଶା ଗସ୍ତ ଦଳ ପାଇଁ ସାଂଗଠନିକ ଭିତ୍ତିଭୂମିକୁ ମଜବୁତ କରିବାର ଏକ ସୁଯୋଗ । ବିଜେପିର ସବୁଠାରୁ ଯୁବ ରାଷ୍ଟ୍ରୀୟ ଅଧ୍ୟକ୍ଷ ଭାବେ ନୀତିନ ନବୀନ ଦଳୀୟ କାର୍ଯ୍ୟକ୍ରମକୁ ତୃଣମୂଳ ସ୍ତରରେ ପହଞ୍ଚାଇବା ପାଇଁ ବଡ଼ ସାଧାରଣ ସଭା ବଦଳରେ ପ୍ରଶିକ୍ଷଣ ଶିବିର ଉପରେ ଅଧିକ ଧ୍ୟାନ ଦେଉଛନ୍ତି । ଆସନ୍ତା ପଞ୍ଚାୟତ ନିର୍ବାଚନ ପୂର୍ବରୁ ଦଳର ଆଭ୍ୟନ୍ତରୀଣ ସମନ୍ୱୟକୁ ଠିକ୍ କରିବା ଏହି ଗସ୍ତର ମୂଳ ଉଦ୍ଦେଶ୍ୟ ବୋଲି ମନେ କରାଯାଉଛି । ଏହି ଗସ୍ତ ଏପରି ଏକ ସମୟରେ ହେଉଛି ଯେତେବେଳେ ରାଜ୍ୟରେ କେତେକ ପ୍ରଶାସନିକ ଓ ସାମାଜିକ ସମସ୍ୟାକୁ ନେଇ ଚର୍ଚ୍ଚା ଚାଲିଛି । ବର୍ତ୍ତମାନ ରାଜ୍ୟରେ ତେଲ ଯୋଗାଣରେ ସମସ୍ୟା, ନିଟ୍ ପରୀକ୍ଷା ବାତିଲକୁ ନେଇ ଚାଲିଥିବା ପ୍ରତିବାଦ କାରଣରୁ ଶାସକ ଦଳ ଉପରେ ଚାପ ରହିଛି ।
