ପୁରୀ (ଭିଓଭି): ଜାତୀୟ ରାଜପଥରୁ ପୁରୀ ସହର ଭିତରକୁ ଗହଳି ଏଡ଼ାଇ ସିଧା ସଳଖ ପ୍ରବେଶ କରିବା ଲକ୍ଷ୍ୟରେ ନବୀନ ସରକାରଙ୍କ ଅମଳରେ ଟ୍ରମ୍ପେଟ଼୍ଙ ସଦୃଶ ନିର୍ମିତ ଶ୍ରୀସେତୁ ପୁରୀର ଅନ୍ୟତମ ଆକର୍ଷଣ ଅଟେ। ଏହି ସେତୁ କୁ ଏକ ସାଧାରଣ ସେତୁ ଠାରୁ ଅଧିକ ଆକର୍ଷଣୀୟ କରିବା ଲାଗି ଏଥିରେ ଆଲୋକ ସଜ୍ଜା ସହିତ ଉଭୟ ପାର୍ଶ୍ଵରେ ପ୍ରସ୍ତର ନିର୍ମିତ ସ୍ଥାପତ୍ୟ ସହିତ ଶଙ୍ଖ ଆକୃତିର ଏକ ସୁନ୍ଦର ପାର୍କ ନିର୍ମାଣ କରାଯାଇଥିଲା। ଯାହାକି ପୁରୀ ସହର ରେ ପ୍ରବେଶ କରିବା ପୂର୍ବରୁ ପର୍ଯ୍ୟଟକ ତଥା ଜଗନ୍ନାଥ ଦର୍ଶନାଭିଲାଷୀ ଙ୍କ ମନରେ ଏକ ନିଆରା ସକାରାତ୍ମକ ଭାବନା ସୃଷ୍ଟି କରୁଥିଲା। ପର୍ଯ୍ୟଟକ ତଥା ସ୍ଥାନୀୟ ଲୋକେ ପାର୍କ ରେ କିଛି ସମୟ ଅତିବାହିତ କରି ଫଟୋ ଉଠାଇବାର ମଜା ନେଉଥିଲେ।
ମାତ୍ର ନିର୍ମାଣ ପରବର୍ତ୍ତୀ ସମୟରେ ରକ୍ଷଣାବେକ୍ଷଣ ଅଭାବରୁ ଧୀରେ ଧୀରେ ଏହାର ସୌନ୍ଦର୍ଯ୍ୟ ନଷ୍ଟ ହେବାକୁ ଲାଗିଲା। ଏହାର ରକ୍ଷଣାବେକ୍ଷଣ ପାଇଁ ନିଯୁକ୍ତ ଦୁଇଜଣ ମାଳି ଙ୍କୁ କିଛି ମାସ ହେଲା ଅପସାରଣ କରାଯାଇଛି। ବର୍ତ୍ତମାନ ରଥଯାତ୍ରା ପାଇଁ ଗାଡି ରହଣିସ୍ଥଳ କରାଯିବାକୁ ଯୋଜନା କରି ଶଙ୍ଖ ପାର୍କର ସବୁଜିମା ଉପରେ ବୁଲ ଡୋଜର ଚଳାଇ ତାର ଅସ୍ଥିତ୍ଵ କୁ ଖିନଭିନ କରାଯାଇଛି। ଦିନେ ସବୁଜିମା ଏବଂ ଆଲୋକମାଳାରେ ଝଲସୁଥିବା ଶଙ୍ଖ ଉଦ୍ୟାନ ଆଜି ତାର ଅସ୍ତିତ୍ବ ହରାଇଛି। ସନ୍ଧ୍ୟା ନଇଁଲେ ସେଠାରେ ଏବେ ରାଜୁତି କରୁଛି ଘନ ଅନ୍ଧକାର। ଶ୍ରୀହୀନ ହୋଇଛି ଶ୍ରୀସେତୁ।
ପ୍ରଶାସନ ଚାହିଁଥିଲେ ଗାଡି ରହଣିସ୍ଥଳ ଅନ୍ୟତ୍ର କରି ପାର୍କ ର ପୁନରୁଦ୍ଧାର କରି ପାରି ଥାଆନ୍ତେ। ମାତ୍ର ସେପରି ନକରି ପାର୍କଟିକୁ ନିଶ୍ଚିହ୍ନ କରିଦେବାକୁ ସାଧାରଣ ରେ ନାପସନ୍ଦ କରାଯାଉଛି ଏବଂ ପାର୍କଟିର ପୂର୍ବାବସ୍ଥା ଫେରାଇ ଆଣିବାକୁ ବୁଦ୍ଧିଜୀବୀ ମହଲରେ ଦାବୀ ହେଉଛି।
