ଭୁବନେଶ୍ଵର: ଯଦି ଆପଣ ଫ୍ଲାଇଟ୍ ଟିକେଟ୍ ବୁକ୍ କରିଛନ୍ତି ଏବଂ କୌଣସି କାରଣରୁ ଫ୍ଲାଇଟ୍ ବାତିଲ ହୋଇଯାଏ, ତେବେ ଟିକେଟ୍ ଭଡ଼ା ସହ ତା ଉପରେ ଦେଇଥିବା ଜିଏସଟି ରିଫଣ୍ଡ ମଧ୍ୟ ଗୁରୁତ୍ୱପୂର୍ଣ୍ଣ। ଏହି ମାମଲାରେ ଗୁଡ୍ସ ଆଣ୍ଡ ସର୍ଭିସେସ୍ ଟ୍ୟାକ୍ସ ଆପିଲେଟ୍ ଟ୍ରିବ୍ୟୁନାଲ (GSTAT) ଏୟାରଲାଇନ୍ସକୁ ଆଶ୍ୱସ୍ତି ଦେଇଛି। ଟ୍ରିବ୍ୟୁନାଲ କହିଛି ଯେ, ଯଦି ଏୟାରଲାଇନ୍ ବାତିଲ ଟିକେଟ୍ ର ଭଡ଼ା ଏବଂ ତା ଉପରେ ଲାଗିଥିବା ଜିଏସଟି ଯାତ୍ରୀଙ୍କୁ ଫେରାଇ ଦିଏ, ତେବେ ସେ ଜମା କରିଥିବା ଜିଏସଟି ରିଫଣ୍ଡ ମାଗିପାରିବ।
ତେବେ ଏଥିପାଇଁ ଆବଶ୍ୟକ ଡକ୍ୟୁମେଣ୍ଟ ଜରିଆରେ ପ୍ରମାଣ କରିବାକୁ ପଡ଼ିବ ଯେ, ଟ୍ୟାକ୍ସ ଟଙ୍କା ଯାତ୍ରୀଙ୍କୁ ଫେରାଇ ଦିଆଯାଇଛି। ଏହି ନିଷ୍ପତ୍ତି ସିଙ୍ଗାପୁର ଏୟାରଲାଇନ୍ସ ଏବଂ ସିଜିଏସଟି ଓ ସେଣ୍ଟ୍ରାଲ ଏକ୍ସାଇଜ୍ କମିଶନର, କୋଚି ମଧ୍ୟରେ ହୋଇଥିବା ମାମଲାରେ ଆସିଛି। ଟ୍ରିବ୍ୟୁନାଲ ଏୟାରଲାଇନ୍ ର ରିଫଣ୍ଡ ଦାବିକୁ ମଞ୍ଜୁର କରି ସମ୍ପୃକ୍ତ ବିଭାଗକୁ ଦୁଇ ସପ୍ତାହ ମଧ୍ୟରେ ଏହାକୁ ପ୍ରସେସ୍ କରି ଲାଗୁ ସୁଧ ସହ ପେମେଣ୍ଟ କରିବାକୁ ନିର୍ଦ୍ଦେଶ ଦେଇଛି।
ସିଙ୍ଗାପୁର ଏୟାରଲାଇନ୍ସ କେତେ ଜିଏସଟି ରିଫଣ୍ଡ ମାଗିଥିଲା?
ଏହି ମାମଲା ଅକ୍ଟୋବର ୨୦୧୯ ଏବଂ ମାର୍ଚ୍ଚ ୨୦୨୧ ମଧ୍ୟରେ ସିଙ୍ଗାପୁର ଏୟାରଲାଇନ୍ସ ପକ୍ଷରୁ ଫାଇଲ୍ କରାଯାଇଥିବା ଆଠଟି ଜିଏସଟି ରିଫଣ୍ଡ କ୍ଲେମ୍ ସହ ଜଡ଼ିତ। ଏହାର ମୋଟ ରାଶି ୪୫,୯୨,୫୨୮ ଟଙ୍କା ଥିଲା। କୋଭିଡ-୧୯ ମହାମାରୀ ସମୟରେ ଅନେକ ଉଡ଼ାଣ ବାତିଲ ହେବା ପରେ ଏୟାରଲାଇନ୍ ଯାତ୍ରୀମାନଙ୍କୁ ଟିକେଟ୍ ଭଡ଼ା ଏବଂ ଜିଏସଟି ଉଭୟ ଫେରାଇ ଦେଇଥିଲା।
ତେବେ ଏୟାରଲାଇନ୍ କ୍ରେଡିଟ୍ ନୋଟ୍ସକୁ ନିଜ ଆଉଟପୁଟ୍ ଟ୍ୟାକ୍ସ ସହ ଆଡଜଷ୍ଟ କରିପାରିନଥିଲା ଏବଂ ଏହା ପରେ ରିଫଣ୍ଡ ଦାବି କରିଥିଲା। ପ୍ରଥମେ ଜିଏସଟି ଜଏଣ୍ଟ କମିଶନର ରିଫଣ୍ଡ ଦାବି ଖାରଜ କରିଦେଇଥିଲେ। ଏହା ପରେ ଏୟାରଲାଇନ୍ ଟ୍ରିବ୍ୟୁନାଲର ଦ୍ୱାରସ୍ଥ ହୋଇଥିଲା। GSTATର ଏର୍ଣ୍ଣାକୁଲମ୍ ବେଞ୍ଚ ପୂର୍ବ ନିର୍ଦ୍ଦେଶକୁ ଖାରଜ କରି ବିଭାଗକୁ ଦୁଇ ସପ୍ତାହ ମଧ୍ୟରେ ରିଫଣ୍ଡ କ୍ଲେମ୍ ଉପରେ କାର୍ଯ୍ୟାନୁଷ୍ଠାନ ନେଇ ଲାଗୁ ସୁଧ ସହ ରାଶି ପେମେଣ୍ଟ କରିବାକୁ ନିର୍ଦ୍ଦେଶ ଦେଇଛି।
ସବୁ ଏୟାରଲାଇନ୍ସକୁ ଜିଏସଟି ରିଫଣ୍ଡ ମିଳିବ କି?
ଏହି ନିଷ୍ପତ୍ତିର ଅର୍ଥ ଏହା ନୁହେଁ ଯେ, ପ୍ରତ୍ୟେକ ବାତିଲ ଫ୍ଲାଇଟ୍ ରେ ଏୟାରଲାଇନ୍ କୁ ଆପେ ଆପେ ଜିଏସଟି ରିଫଣ୍ଡ ମିଳିଯିବ। ରିଫଣ୍ଡ ଦାବି କରୁଥିବା କମ୍ପାନୀକୁ ପ୍ରମାଣ କରିବାକୁ ପଡ଼ିବ ଯେ, ସେମାନେ ଯାତ୍ରୀଙ୍କୁ ଭଡ଼ା ସହ ଟ୍ୟାକ୍ସ ରାଶି ମଧ୍ୟ ଫେରାଇ ଦେଇଛନ୍ତି। ବିଶେଷ କରି ଏଜେଣ୍ଟଙ୍କ ଜରିଆରେ ବିକ୍ରି ହୋଇଥିବା ଟିକେଟ୍ ମାମଲାରେ ଟିକେଟ୍, କ୍ରେଡିଟ୍ ନୋଟ୍, ଯାତ୍ରୀ ସ୍ତରରେ ରିଫଣ୍ଡ ଓ ପେମେଣ୍ଟ ସହ ଜଡ଼ିତ ରେକର୍ଡ ରଖିବା ଜରୁରୀ ହୋଇପାରେ।
