ରଣପୁର(ଭିଓଭି): ନିର୍ବାଚନ ପାଖେଇ ଆସୁଥିବା ବେଳେ ନେତା-ନେତା, ଦଳ-ଦଳଙ୍କ ମଧ୍ୟରେ ଆରୋପ ପ୍ରତ୍ୟାରୋପ ମଧ୍ୟ ଦେଖିବାକୁ ମିଳୁଛି। ରଣପୁରରେ ଏହାର ବ୍ୟତିକ୍ରମ ସ୍ଥିତି ଦେଖିବାକୁ ମିଳିଛି। ଏଠାରେ ନେତା ବିଷ ଓଗାଳିଛନ୍ତି ଅନ୍ୟ ଦଳ ଭୋଟର ବା ବିରୋଧୀ ଦଳକୁ ସମର୍ଥନ କରୁଥିବା ଜନତାଙ୍କ ଉପରେ। ଗତ ୪ ତାରିଖ ଦିନ ନୟାଗଡ ଜିଲ୍ଲା ରଣପୁରଠାରେ ପୁରୀ ଏମପି ପ୍ରାର୍ଥୀ ଅରୂପ ପଟ୍ଟନାୟକ, ନୟାଗଡ ଏବଂ ରଣପୁର ବିଧାୟକ ପ୍ରାର୍ଥୀ ଦ୍ୱୟ ଅରୁଣ ସାହୁ ଓ ସତ୍ୟନାରାୟଣ ପ୍ରଧାନଙ୍କ ଉପସ୍ଥିତିରେ ଏକ କର୍ମୀ ସମ୍ମିଳନୀ ନିର୍ବାଚନ ପ୍ରସ୍ତୁତି ସଭାରେ ବିରୋଧୀଙ୍କ ଉଦ୍ଦେଶ୍ୟରେ ଵୋପା ବୁନିଆଦି ଭଳି ଅପମାନ ସୂଚକ ଶବ୍ଦ ବ୍ୟବହାର କରି ଉତ୍ତେଜନା ମୂଳକ ଭାଷଣ ପ୍ରଦାନ କରିଛନ୍ତି ନୟାଗଡ ଜିଲ୍ଲାପରିଷଦ ଅଧ୍ୟକ୍ଷ ଦେବାଶିଷ ପଟ୍ଟନାୟକ ଓରଫ କାଳୁ।
ସେହି ଭିଡିଓକୁ ରଣପୁର ବ୍ଲକ ବିଜେଡି ସଭାପତି ନିଜର ଫେସବୁକ୍ ଆକାଉଣ୍ଟରେ ବି ପୋଷ୍ଟ କରିଛନ୍ତି। ଏଭଳି ଉତ୍ତେଜନାମୂଳକ ଭାଷଣ ଓ ବରିଷ୍ଠଙ୍କୁ ଅପମାନଜନକ ଶବ୍ଦ ବ୍ୟବହାର ସମ୍ପର୍କରେ ନିର୍ବାଚନ କମିଶନରଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ବିଜେପି ଦଳ ପ୍ରକାଶ କରିଥିବା ବେଳେ ଦୁଇ ଦିନ ପର୍ଯ୍ୟନ୍ତ ଚେଷ୍ଠା କରି ମଧ୍ୟ ଦେବାଶିଷ ପଟ୍ଟନାୟକଙ୍କ ପ୍ରତିକ୍ରିୟା ମିଳିପାରିନାହିଁ।
