ଉମରକୋଟ : ସାଧାରଣ ନିର୍ବାଚନକୁ ଶାନ୍ତି ଶୃଙ୍ଖଳା ସହ ପରିଚାଳନା ପାଇଁ ନକ୍ସଲ ପ୍ରବଣ ଖୁଡୁକୁ ଜିପିରେ ପୁଲିସ ଏବଂ ସୁରକ୍ଷାକର୍ମୀଙ୍କ ପକ୍ଷରୁ ଫ୍ଲାଗ ମାର୍ଚ୍ଚ କରାଯାଇଛି। ନବରଙ୍ଗପୁର ଜିଲ୍ଲା ଉମରକୋଟ ନିର୍ବାଚନ ମଣ୍ଡଳୀ ଅନ୍ତର୍ଗତ କିଛି ସୀମାନ୍ତ ଅଞ୍ଚଳ ପ୍ରବଳ ମାଓ ପ୍ରବଣ ଅଞ୍ଚଳ ଭାବେ ଜଣା ଶୁଣା। ବିଗତ ଦିନରେ ମାଓବାଦୀମାନେ ସୀମାନ୍ତର ଏକ ଥାନାକୁ ଟାର୍ଗେଟ କରି ବୋମା ସାହାଯ୍ ରେ ସମ୍ପୂର୍ଣ ଉଡାଇଦେଇଥିଲେ। ସମ୍ପୂର୍ଣ ଭାବେ ଘନ ଜଙ୍ଗଲରେ ପରିପୂର୍ଣ୍ଣ ତଥା ପଡୋଶୀ ରାଜ୍ୟର ସୀମାନ୍ତ ସହ ଲାଗି ରହିଥିବାରୁ ମାଓବାଦୀଙ୍କ ଚଳପ୍ରଚଳ ରହୁଛି। ରାଜ୍ୟରେ ସାଧାରଣ ନିର୍ବାଚନ ଲାଗି ନବରଙ୍ଗପୁର ଏସପି ରୋହିତ ବର୍ମାଙ୍କ ନିର୍ଦ୍ଦେଶ କ୍ରମେ ଉମରକୋଟ ଏସ୍ଡ଼ିପିଓ ମଧୁ ଶିକ୍ତା ମିଶ୍ରଙ୍କ ତତ୍ତ୍ବାବଧାନରେ କୁନ୍ଦେଇ ଥାନା ଆଇଆଇସି ପ୍ରଶାନ୍ତ କୁମାର ସେଠୀ, ଏକ ପ୍ଲାଟୁନ ପୋଲିସ ଫୋର୍ସ ଓ ସିଆରପିଏଫ ଆସିଷ୍ଟାଣ୍ଟ କମାଣ୍ଡେଣ୍ଟ ମିଥିଳେଶ କୁମାର, ସବ ଇନ୍ସପେକ୍ଟର କେ. ଏସ. ମାଥିଉ ଓ ତାଙ୍କ ଏକ ପ୍ଲାଟୁନ ଯବାନଙ୍କ ମିଳିତ ଉଦ୍ୟମରେ ରାଇଘର ବିଡିଓ ଲକ୍ଷୀ ସାଗର ମାଝୀ ଓ ରାଇଘର ଆଡିସିନାଲ ତହସିଲଦାର ସୀମାଞ୍ଚଳ ପାତ୍ରଙ୍କ ଉପସ୍ଥିତିରେ ସୀମାନ୍ତ ଖୁଡୁକୁ ପଞ୍ଚାୟତର ଅତି ସମ୍ବେଦନଶୀଳ ଅଞ୍ଚଳ ଏବଂ ମୁଖ୍ୟ ପଞ୍ଚାୟ ରେ ଫ୍ଲାଗ ମାର୍ଚ୍ଚ କରାଯାଇଥିଲା। ସାଧାରଣ ଜନତାଙ୍କୁ ପୋଲିସ ଉପରେ ବିଶ୍ୱାସ ରଖିବା ପାଇଁ ଏଥିରେ ବାର୍ତ୍ତା ଦିଆଯାଇଛି।
