ପୁରୀ (ଭିଓଭି) : ସୂଚନା ଅଧିକାର ଆଇନ ବଳରେ ନିର୍ଦ୍ଧାରିତ ସମୟ ସୀମା ମଧ୍ୟରେ ସୂଚନା ପ୍ରଦାନ କରି ନଥିବାରୁ ପୁରୀ ଜିଲ୍ଲା ଗୋପ ବ୍ଲକ୍ର ପୂର୍ବତନ ସୂଚନା ଅଧିକାରୀ ଏବଂ ଗୋପ ବ୍ଲକ୍ ବଡ଼ଗାଁ ପଂଚାୟତର ପୂର୍ବତନ ପିଇଓ ପ୍ରତ୍ୟେକଙ୍କୁ ଓଡିଶା ସୂଚନା କମିଶନ ଦଶହଜାର ଟଙ୍କା ଲେଖାଏଁ ଅର୍ଥଦଣ୍ଡରେ ଦଣ୍ଡିତ କରିଛନ୍ତି ।
ମିଳିଥିବା ସୂଚନା ମୁତାବକ ପୁରୀ ଜିଲ୍ଲା ଗୋପ ବ୍ଲକ୍ ବଡଗାଁ ପଂଚାୟତରେ ପାଇଖାନା ତିଆରି, ଇନ୍ଦିରା ଆବାସ ଏବଂ ଅନ୍ୟାନ୍ୟ ଉନ୍ନୟନ ମୂଳକ କାର୍ଯ୍ୟ ସମ୍ବନ୍ଧରେ କିଛି ତଥ୍ୟ ଜାଣିବା ନିମନ୍ତେ ଉକ୍ତ ପଂଚାୟତ ଅନ୍ତର୍ଗତ ଭୂଆଁ ଗ୍ରାମର ସୁଦାମ ଚରଣ ସାହୁ ନାମକ ଜଣେ ବ୍ୟକ୍ତି ସୂଚନା ଅଧିକାର ଆଇନ ବଳରେ ଗୋପ ବ୍ଲକ ସୂଚନା ଅଧିକାରୀ ଙ୍କୁ ୨୦୧୯ ମସିହାରେ ଆବେଦନ କରିଥିଲେ । ମାତ୍ର ସୂଚନା ପାଇବା ନିମନ୍ତେ ଉଦ୍ଦିଷ୍ଟ ଦରଖାସ୍ତ ପାଇବାର ୩୦ ଦିନ ମଧ୍ୟରେ ବ୍ଲକ୍ ସୂଚନା ଅଧିକାରୀଙ୍କ ତରଫରୁ ତାଙ୍କୁ କୌଣସି ସୂଚନା ପ୍ରଦାନ କରା ନଯିବାରୁ ସେ ଗୋପ ବ୍ଲକ ବିଡିଓ ତଥା ଫାର୍ଷ୍ଟ ଅପିଲେଟ ଅଥରିଟି ଙ୍କ ନିକଟରେ ଅଭିଯୋଗ ଦାଖଲ କରିଥିଲେ । ମାତ୍ର ଏଠି ମଧ୍ୟ ତାଙ୍କ ଦରଖାସ୍ତ ର ବିଚାର କରା ନଯିବାରୁ ସେ ୨୦୨୦ ମସିହା ଏପ୍ରିଲ ମାସରେ ଓଡ଼ିଶା ସୂଚନା କମିଶନଙ୍କ ନିକଟରେ ଦ୍ୱିତୀୟ ଅପିଲ ଦାଖଲ କରିଥିଲେ । ମାନ୍ୟବର ସୂଚନା କମିଶନ ତାଙ୍କର ଦରଖାସ୍ତ ଟିକୁ ବିଚାରକୁ ନେଇ କେସ୍ ନଂ.୧୦୩୪/୨୦୨୦ ର ବିଚାର କରି ଘଟଣାରେ ସଂପୃକ୍ତ ଗୋପ ବ୍ଲକ୍ ଏ.ପି.ଓ. ତଥା ପୂର୍ବତନ ସୂଚନା ଅଧକାରିଣୀ ଶ୍ରୀମତୀ ମୋନାଲିସା ଶତପଥି ଏବଂ ବର୍ତମାନ କଣାସ ବ୍ଲକ୍ ରେ କାର୍ଯ୍ୟରତ ପି.ଇ.ଓ. ତଥା ବଡଗାଁ ପଂଚାୟତ ପୂର୍ବତନ ପି.ଇ.ଓ. ଶିବ ସୁନ୍ଦର ବେହେରାଙ୍କୁ ଦୋଷୀ ସାବ୍ୟସ୍ତ କରି ଉଭୟଙ୍କୁ ଦଶହଜାର ଟଙ୍କା ଲେଖାଏଁ ଅର୍ଥଦଣ୍ଡ ରେ ଦଣ୍ଡିତ କରିଛନ୍ତି । ଏହି ଦଣ୍ଡିତ ଅର୍ଥରାଶି କୁ ଅଭିଯୁକ୍ତ ମାନେ ଆଦେଶ ପାଇବାର ତିରିଶ ଦିନ ମଧ୍ୟରେ ଟ୍ରେଜେରି ଚାଲାଣ ମାଧ୍ୟମରେ ଦାଖଲ କରିବେ ନଚେତ୍ ଜୁଲାଇ ଏବଂ ଅଗଷ୍ଟ ମାସର ଦରମାରୁ ମାସକୁ ପାଂଚ ହଜାର ଟଙ୍କା ହିସାବରେ ଦୁଇ ମାସରେ ମୋଟ ଦଶହଜାର ଟଙ୍କା ଲେଖାଏଁ ଉଭୟଙ୍କ ଦରମାରୁ ଭରଣା କରିବାକୁ ଉଭୟ ଗୋପ ବ୍ଲକ୍ ଏବଂ କଣାସ ବ୍ଲକ୍ ବିଡିଓଙ୍କୁ ଓଡ଼ିଶା ସୂଚନା କମିଶନ ସ୍ପଷ୍ଟ ନିର୍ଦେଶ ଦେଇଛନ୍ତି । ଆବେଦନକାରୀ ଜାଣିବାକୁ ଚାହିଁଥିବା ସୂଚନାରୁ କିଛି ପ୍ରଦାନ କରାଯାଇ ଅଛି ଏବଂ ସେ ବ୍ୟକ୍ତିଗତ ଭାବେ ତନଖି କରିବାକୁ ଥିବା ଅଫିସ୍ କାଗଜାତ ଗୁଡିକ ନିର୍ବାଚନ ପରେ ଉଭୟ ବ୍ଲକ୍ ଅଫିସ୍ ଏବଂ ପଂଚାୟତ ଅଫିସ୍ ରେ ଉପସ୍ଥିତ ରହି ତନଖି କରି ଅବଶିଷ୍ଟ ଆଉ କିଛି ସୂଚନା ନେଇ ପାରିବେ ବୋଲି ଆଦେଶନାମାରେ ଉଲ୍ଲେଖ କରିଛନ୍ତି । ମାନ୍ୟବର ଓଡ଼ିଶା ସୂଚନା କମିଶନ ବାଳକୃଷ୍ଣ ମହାପାତ୍ରଙ୍କ ଅଦାଲତରେ ଉକ୍ତ ମାମଲାର ବିଚାର ଚାଲିଥିଲା ଏବଂ ପୁରୀ ବାର ଆସୋସିଏସନର ବରିଷ୍ଟ ଆଇନଜୀବି ନୃସିହ ଚରଣ ମହାନ୍ତି ଆବେଦନକାରୀ ଙ୍କ ତରଫରୁ ମାମଲା ପରିଚାଳନା କରିଥିଲେ । ଏ ସମ୍ବନ୍ଧରେ ସୂଚନା ଅଧିକାର କର୍ମୀ ସୁଦାମ ଚରଣ ସାହୁ କୁହନ୍ତି, ଆମ ବଡଗାଁ ପଂଚାୟତରେ ଇନ୍ଦିରା ଆବାସ, ପାଇଖାନା ତିଆରି ତଥା ଅନେକ ଉନ୍ନୟନ ମୂଳକ କାର୍ଯ୍ୟରେ ହୋଇଥିବା ଆର୍ଥିକ ଦୁର୍ନୀତି ର ପର୍ଦ୍ଦାଫାସ କରିବା ପାଇଁ ଆମର ପ୍ରୟାସ ଜାରୀ ରହିଛି । ଆମକୁ ଏ ସମ୍ବନ୍ଧରେ ସୂଚନା ପ୍ରଦାନ ନ କରିବାକୁ ଯଥା ସମ୍ଭବ ଚେଷ୍ଟା କରା ଯାଇଥିଲା ମାତ୍ର ବିଳମ୍ବରେ ହେଉ ପଛେ ଆମ୍ଭକୁ ନ୍ୟାୟ ମିଳିଛି ଏବଂ ମିଳିଥିବା ସୂଚନା ଆମକୁ ନିଶ୍ଚିନ୍ତ ସହାୟକ ହେବ ।
ସମୟ ସୀମା ମଧ୍ୟରେ ସୂଚନା ପ୍ରଦାନ ନକରି କୋଡିଏ ହଜାର ଟଙ୍କା ଅର୍ଥ ଦଣ୍ଡରେ ଦଣ୍ଡିତ ହେଲେ ଦୁଇ ସୂଚନା ଅଧିକାରୀ
