ଭୁବନେଶ୍ୱର: ଗୁରୁବାର ପୁଣି ଥରେ ଖୋଲିବ ଭିତର ରତ୍ନଭଣ୍ଡାର । ଶୁଭ ମୁହୂର୍ତ୍ତ ସକାଳ ୯ଟା୫୧ରୁ ୧୨ଟା୧୫ ମଧ୍ୟରେ ଟ୍ରେଜେରୀରୁ ନୂଆ ଚାବି ଆଣି ଭିତର ରତ୍ନଭଣ୍ଡାର ଖୋଲାଯିବ । ପୂର୍ବ ଏସ୍ଓପିକୁ ଅନୁପାଳନ କରାଯିବ । ତଥା ସନ୍ଧ୍ୟା ସୁଦ୍ଧା ହିଁ ଭିତର ରତ୍ନଭଣ୍ଡାରରୁ ସମସ୍ତ ରତ୍ନ ଅଳଙ୍କାର ସୁରକ୍ଷିତ ଭାବେ ଅସ୍ଥାୟୀ ଭିତର ରତ୍ନଭଣ୍ଡାରକୁ ସ୍ଥାନାନ୍ତର ପାଇଁ ନିଷ୍ପତ୍ତି ନିଆଯାଇଛି । ଗତ ୧୪ତାରିଖ ଦିନ ୧୧ ଜଣିଆ କମିଟି ଦ୍ୱାରା ପ୍ରଥମେ ଚଳନ୍ତି ଓ ବାହାର ରତ୍ନଭଣ୍ଡାର ଖୋଲାଯାଇ ସମସ୍ତ ଅଳଙ୍କାର ଚାଙ୍ଗଡ଼ା ଘର ଓ ଫୁଲ ଶେଜଘରକୁ ସ୍ଥାନାନ୍ତର କରାଯାଇଥିଲା । ଆସନ୍ତାକାଲି ୧୧ ଜଣିଆ ଅଧିକୃତ କମିଟି ଭିତରକୁ ଯିବ । କମିଟିର କୌଣସି ସଦସ୍ୟ ଧାତୁ ପଦାର୍ଥ କିମ୍ବା ସୁନା ଜିନିଷପତ୍ର ପିନ୍ଧି ଯିବେ ନାହିଁ । ଭିତର ରତ୍ନଭଣ୍ଡାର ସିନ୍ଦୁକ ଓ ଆଲମିରାରୁ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ନୂତନ ସିନ୍ଦୁକ ଓ ଆଲମିରାକୁ ରତ୍ନ ଅଳଙ୍କାର ସ୍ଥାନନ୍ତର ହେବ । ଅସ୍ଥାୟୀ ଭିତର ଓ ବାହାର ରତ୍ନଭଣ୍ଡାରରେ ନୂତନ ତାଲା ଓ ଚାବି ପକାଯାଇଛି । ରତ୍ନ ଅଳଙ୍କାର ସ୍ଥାନନ୍ତର ପରେ ଅସ୍ଥାୟୀ ଭିତର ଓ ବାହାର ରତ୍ୱଭଣ୍ଡାରରେ ପୁଣି ତାଲା ଓ ଚାବି ପକାଯିବ । ତଥା ଭିତର ରତ୍ନଭଣ୍ଡାରରେ ଥୂବା ସିନ୍ଦୁକ ଓ ଆଲମିରାକୁ ମ୍ୟୁଜିୟମ୍ରେ ରଖାଯିବ । ଆସନ୍ତାକାଲି ପ୍ରଥମେ ବାହାର ରତ୍ନଭଣ୍ଡାର ଚାବି ଖୋଲାଯିବ । ତାପରେ ଟ୍ରେଜେରୀରୁ ନୂଆ ଚାବି ଅଣାଯାଇ ଭିତର ରତ୍ନଭଣ୍ଡାର ଖୋଲାଯାଇ ରତ୍ନଅଳଙ୍କାର ସ୍ଥାନାନ୍ତର ହେବ । ସ୍ନେକ ହେଲ୍ପ ଲାଇନ, ଓଡ୍ରାଫ , ସ୍ୱେଚ୍ଛାସେବୀ, ଡାକ୍ତରୀ ଟିମ, ମାଜିଷ୍ଟ୍ରେଟ , ବୈଷୟିକ ଟିମ ମୁତୟନ ହେବେ । ଚାଙ୍ଗଡ଼ା ଘର ଓ ଫୁଲ ଶେଜ ଘରେ ଅସ୍ଥାୟୀ ଭିତର ରତ୍ନଭଣ୍ଡାର ଓ ଭିତର ରତ୍ନଭଣ୍ଡାର ଷ୍ଟ୍ରଙ୍ଗ ରୁମ କରାଯାଇଛି । ଅସ୍ଥାୟୀ ଭିତର ରତ୍ନଭଣ୍ଡାରରେ ସିସିଟିଭି କ୍ୟାମେରା, ଅଗ୍ନି ନିର୍ବାପକ ବ୍ୟବସ୍ଥା, ସୁରକ୍ଷା ବ୍ୟବସ୍ଥା ଏସଓପି ଅନୁଯାୟୀ କରାଯାଇଛି । ଭିତର ରତ୍ନଭଣ୍ଡାରରୁ ସମସ୍ତ ରତ୍ନଅଳଙ୍କାର ସ୍ଥାନାନ୍ତର ପରେ ହିଁ ଏଏସଆଇ କୁ ମରାମତି ପାଇଁ ଅନୁମତି ଦିଆଯିବ । ପରେ ରତ୍ନଭଣ୍ଡାର ରତ୍ନଅଳଙ୍କାର ଗଣତି ମଣତି ପାଇଁ ପ୍ରତିଦିନ ଟ୍ରେଜେରୀରୁ ଜଉମୁଦରେ ଥୂବା ଚାବି ପ୍ରତିଦିନ ଅଣାଯିବ ବୋଲି ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ ସୂଚନା ଦେଇଥିଲେ । ତେବେ ଭିତର ରତ୍ୱଭଣ୍ଡାରରେ କେତୋଟି ସିନ୍ଦୁକ ଓ ଆଲମିରା ରହିଛି, କାନ୍ଥ ପର୍ଶ୍ୱକୁ ଥିବା ସିନ୍ଦୁକ ଓ ଆଲମିରା ପଛ ପଟେ ଆଉ କୋଠରୀ ରହିଛି ନାଁ ନାହିଁ, ତଥା ଗୋଟିଏ ଦିନରେ ଭିତର ରତ୍ନଭଣ୍ଡାର ଅଳଙ୍କାର ସ୍ଥାନନ୍ତର ସମ୍ଭବ ପର କି ନୁହେଁ ତାହା ଆସନ୍ତାକାଲି ହିଁ ସ୍ପଷ୍ଟ ହେବ । ରତ୍ନଭଣ୍ଡାର ଖୋଲିବା ବେଳେ ସାମୟିକ କଟକଣା ରହିବ ବୋଲି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ ସୂଚନା ପ୍ରଦାନ କରିଛନ୍ତି । ସକାଳ ୮ଟାରୁ ସିଂହଦ୍ୱାରକୁ ଛାଡ଼ି ବାକି ଦ୍ୱାର ବନ୍ଦ ରହିବ । ଯେଉଁମାନେ ସେବା ଓ ପୂଜା ପାଇଁ ଅଧିକୃତ ସେମାନଙ୍କୁ ଛଡ଼ାଯିବ । ଅର୍ଥାତ ସାଧାରଣ ଭକ୍ତଙ୍କ ପ୍ରବେଶ ନେଇ କଟକଣା ରହିବ । ଆଶା କରାଯାଉଛି ଯେ ଆସନ୍ତାକାଲି ରତ୍ନଭଣ୍ଡାରରୁ ରତ୍ନ ସ୍ଥାନାନ୍ତର ପ୍ରକ୍ରିୟା କରାଯିବ । ଅନ୍ୟପଟେ ରତ୍ନଭଣ୍ଡାର ସଂପର୍କରେ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଥିଲେ ଯେ ରତ୍ନଭଣ୍ଡାର ମରାମତି କେତେ ଦିନ ଲାଗିବ ଏଏସ୍ଆଇ ନିର୍ଦ୍ଧାରଣ କରିବ । ଏଏସ୍ଆଇ ଦ୍ୱାରା ମରାମତି ସରିବା ପରେ ଅଳଙ୍କାର ଭିତର ଭଣ୍ଡାରକୁ ନିଆଯିବ । ରତ୍ନ ଅଳଙ୍କାର ଗଣତି ମଣତି ପାଇଁ ୩୦-୪୦ ଦିନ ସମୟ ଲାଗିବ ।
ଆଜି ଖୋଲିବ ଭିତର ରତ୍ନଭଣ୍ଡାର: ସିଂହଦ୍ୱାର ବ୍ୟତୀତ ୩ ଦ୍ୱାର ବନ୍ଦ ରହିବ
