ସୂଚନା ଅଧିକାର କର୍ମୀଙ୍କୁ ବ୍ଲକ୍ ପରିସରରେ ମରଣାନ୍ତକ ଆକ୍ରମଣ

ଗୋପ(ଭିଓଭି): ପଂଚାୟତରେ ହୋଇଥିବା ବିଭିନ୍ନ ଆର୍ôଥକ ଦୁର୍ନୀତି ସଂପର୍କରେ ସୂଚନା ନେବାକୁ ଆସିଥିବା ସୂଚନା ଅଧିକାର କର୍ମୀଙ୍କୁ ବ୍ଲକ୍ ପରିସରରେ ସରପଂଚଙ୍କ ସ୍ୱାମୀ ଏବଂ ଦେଢ଼ଶୁର ମାଡ ମାରି ଲହୁ ଲୁହାଣ କରିଛନ୍ତି। ମିଳିଥିବା ସୂଚନା ଅନୁସାରେ ଗୋପ ବ୍ଲକ୍ ବଡ଼ଗାଁ ପଂଚାୟତରେ ବ୍ୟାପକ ଆର୍ôଥକ ଦୁର୍ନୀତିର ପର୍ଦାଫାସ୍ କରିବାକୁ ଭୂଆଁ ଗ୍ରାମର ପୂର୍ବତନ ୱାର୍ଡମେମ୍ବର ତଥା ବର୍ତମାନ ବଡଗାଁ ପଂଚାୟତ ବିଜେପି ସଭାପତି ସୁଦାମ ଚରଣ ସାହୁ ଗତ କିଛିଦିନ ତଳେ ସୂଚନା ଅଧିକାର ବଳରେ କିଛି ତଥ୍ୟ ମାଗିଥିଲେ। ସେଥିପାଇଁ ବଡଗାଁ ପଂଚାୟତର ସରପଂଚ ଶୁଭଦ୍ରା ପ୍ରଧାନଙ୍କ ସ୍ୱାମୀ ହର୍ଷବର୍ଦ୍ଧନ ପାଇକରାୟ ଏବଂ ଦେଢ଼ଶୁର ମେରୁନୁ ପାଇକରାୟ ତାଙ୍କୁ ଜୀବନରେ ମାରି ଦେବାକୁ ଧମକ ଦେଇଥିଲେ। ଗତକାଲି ବଡଗାଁ ପଂଚାୟତ ସମ୍ପର୍କିତ ଏକ ଆର ଟି ଆଇ ତଥ୍ୟ ପାଇଁ ସୁଦାମ ସାହୁ ଏବଂ ଶ୍ରୀଧର ସାମନ୍ତରାୟଙ୍କୁ ଗୋପ ବ୍ଲକ୍ ବିଡିଓ ଛବିରାଣୀ ସାହୁ ବ୍ଲକ୍ କୁ ଡକାଇଥିବା ବେଳେ ହର୍ଷବର୍ଦ୍ଧନ ଏବଂ ମେରୁନୁ ସେଠାରେ ପହଁଚି ବ୍ଲକ ପରିସର ମଧ୍ୟରେ ସୁଦାମ ସାହୁଙ୍କୁ ମାଡ ମାରି ଧାରୁଆ ଅସ୍ତ୍ରରେ ମରଣାନ୍ତକ ଆକ୍ରମଣ କରି ଲହୁ ଲୁହାଣ କରିଛନ୍ତି। ପାଟିତୁଣ୍ଡ ଶୁଣି ସେଠାରେ ଅନ୍ୟ ଲୋକମାନେ ପହଁଚି ଯିବାରୁ ଆକ୍ରମଣକାରୀ ଦୁଇଜଣ ସେଠାରୁ ଖସି ପଳାଇଥିଲେ। ଘଟଣା ପରେ ସୁଦାମ ଗୋପ ଡାକ୍ତରଖାନାକୁ ଯାଇ ଚିକିତ୍ସିତ ହୋଇ ଗତକାଲି ସନ୍ଧ୍ୟାରେ ଗୋପ ଥାନାରେ ଏତଲା ଦେଇଥିଲେ ମଧ୍ୟ ଆଜି ଖବର ଲେଖା ହେବା ପର୍ଯ୍ୟନ୍ତ ଥାନା ତରଫରୁ କୌଣସି ପଦକ୍ଷେପ ନିଆଯାଇ ଥିବାର ଜଣାପଡି ନାହିଁ। ଟେଲିଫୋନ ଯୋଗେ ଥାନା ସହ ଯୋଗାଯୋଗ କରାଯିବାକୁ ଉଦ୍ୟମ ହୋଇଥିଲେ ମଧ୍ୟ ସମ୍ଭବ ହୋଇନାହିଁ। ଖବର ନେବାରେ ଜଣା ଯାଇଛି ଯେ, ସୁଦାମ ସାହୁ ସୂଚନା ଅଧିକାର ବଳରେ ବଡଗାଁ ପଂଚାୟତ ରେ ହୋଇଥିବା ଆର୍ଥିକ ଅନିୟମିତତା ସଂପର୍କିତ କିଛି ତଥ୍ୟ ଜାଣିବାକୁ ଚାହିଁଥିଲେ। କୌଣସି ଚାପର ବଶବର୍ତି ହୋଇ ଗୋପ ବ୍ଲକ ସୂଚନା ଅଧିକାରୀ ଏବଂ ବଡଗାଁ ପଂଚାୟତ ସୂଚନା ଅଧିକାରୀ ଜାଣିଶୁଣି ଏହି ତଥ୍ୟ ତାଙ୍କୁ ପ୍ରଦାନ କରି ନଥିଲେ। ତେଣୁ ମାନ୍ୟବର ଓଡିଶା ସୂଚନା କମିଶନ ଏହି ମାମଲାର ବିଚାର କରି ସୂଚନା ଅଧିକାରୀ ଦୁଇ ଜଣଙ୍କୁ କୋଡିଏ ହଜାର ଟଙ୍କା ଅର୍ଥ ଦଣ୍ଡରେ ଦଣ୍ଡିତ କରିଥିଲେ। ସେଥିପାଇଁ ବଡଗାଁ ପଂଚାୟତ ସରପଂଚ ଶୁଭଦ୍ରା ପ୍ରଧାନଙ୍କ ସ୍ୱାମୀ ହର୍ଷବର୍ଦ୍ଧନ ପାଇକରାୟ ଏବଂ ଦେଢ଼ଶୁର ମେରୁନୁ ପାଇକରାୟ ତାଙ୍କୁ ଜୀବନରେ ମାରି ଦେବାକୁ ଧମକ ଦେଇ ଆସୁଥିଲେ। ସୁଦାମ ସାହୁ ବର୍ତମାନ ବଡଗାଁ ପଂଚାୟତ ବିଜେପି କ଼ମିଟି ସଭାପତି ଅଛନ୍ତି।