ତେଇଶି ବର୍ଷ ଶାସନ କରି ମଧ୍ୟ ଆମ ମୁଖ୍ୟମନ୍ତ୍ରୀ ମନରୁ ପଦେ ବି ଓଡ଼ିଆ କୁହନ୍ତି ନାହିଁ । ଓଡ଼ିଆ ନକହିବାର କାରଣ ସେ ଓଡ଼ିଶାର ସାଧାରଣ ଲୋକଙ୍କ ସହ ପ୍ରାୟ କଣ ଆଦୌ ମିଶନ୍ତି ନାହିଁ । ବିଧାନସଭାର ୧୪୭ ବିଧାୟକ ଭିନ୍ନ ଭିନ୍ନ ସ୍ଥାନରୁ ନିର୍ବାଚିତ ହୋଇ ଆସିଥିବାରୁ ଏବଂ ସାଧାରଣ ଜୀବନରେ ନିଜ ଅଞ୍ଚଳର ଲୋକଙ୍କ ସହିତ ମିଶୁଥିବାରୁ ଓଡ଼ିଆ ସହିତ ସ୍ଥାନୀୟ ଭାଷାରେ ମଧ୍ୟ ଦଖଲ ରଖିଛନ୍ତି । ତହିଁର ଏକ ଝଲକ ଗତ ସ୍ୱଳ୍ପ ଦିନର ବିଧାନସଭାରେ ଦେଖିବାକୁ ମିଳିଥିଲା । ଅଞ୍ଚଳ ପ୍ରେମ କି ଶସ୍ତା ରାଜନୀତି ବୁଝାପଡୁନି, କିନ୍ତୁ ନିଜର ରାଜନୈତିକ ଜୀବନର ସାୟାହ୍ନରେ ପହଞ୍ଚିସାରିଥିବା ନରସିଂହ ମିଶ୍ର ବିଧାନସଭାରେ କୋଶଳୀ ଭାଷାରେ ପ୍ରଶ୍ନ ପଚାରି କ’ଣ ପ୍ରତିପାଦିତ କରିବାକୁ ଚେଷ୍ଟା କଲେ ତାହା ବର୍ତ୍ତମାନ ଏକ ଗୁରୁତ୍ୱପୂର୍ଣ୍ଣ ପ୍ରଶ୍ନ । କିନ୍ତୁ ଆଗକୁ ନିଜର ଲମ୍ବା ରାଜନୈତିକ ଜୀବନ ରହିଥିବା ସତ୍ତ୍ୱେ ପୂର୍ବତନ ମନ୍ତ୍ରୀ ତଥା ଯୁବ ବିଧାୟକ ରୋହିତ ପୂଜାରୀ ଯେ କାହିଁକି କୋଶଳୀ ଭାଷାରେ ସୀମିତ ରହିବାକୁ ଚାହିଁଲେ ସେକଥା ବି ସେ ନିଜେ ଜାଣିଥିବେ । ଅନ୍ୟତମ ଆଶ୍ଚର୍ଯ୍ୟତମ କଥାଟି ହେଉଛି ଉପକୂଳ ଓଡ଼ିଶାର ଟାଣୁଆ ନେତା ଓ ମନ୍ତ୍ରୀ ପ୍ରତାପ ଦେବ କୋଶଳୀ ଭାଷାରେ ବିଧାନସଭାରେ ଉତ୍ତର ରଖିବା । ଅନୁବାଦକ ନାହାନ୍ତି କହି ବାଚସ୍ପତି ମହୋଦୟା ଯଦି ମନ୍ତ୍ରୀ ସୁଦାମ ମାରାଣ୍ଡିଙ୍କୁ ବାରଣ କରିନଥାନ୍ତେ ତେବେ ବିଧାନସଭା ରେ ସେଦିନ କୋଶଳୀ ସହିତ ସାନ୍ତାଳି ଭାଷାର ପ୍ରୟୋଗ ଜମିଥାନ୍ତା ।
“ଆପଣମାନେ ଖୁସି ତ? ମୁଁ ବି ବହୁତ ଖୁସି’ ଏଇ ଦୁଇପଦ ଓଡ଼ିଆ ବ୍ୟତୀତ ଆଉ କିଛି ଓଡ଼ିଆରେ ମନରୁ କହୁନଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଯଦି ଓଡ଼ିଶାବାସୀ ଏତେ ଭଲ ପାଉଛନ୍ତି, ତେବେ ଅଞ୍ଚଳ ଓ ଭାଷା ଭିତ୍ତିରେ ଓଡ଼ିଶାକୁ ଭାଗ କରିବାର କ’ଣ ଆବଶ୍ୟକତା ଥାଇପାରେ । ଅନ୍ୟପଟରେ ମୁଖ୍ୟମନ୍ତ୍ରୀଙ୍କଠୁ ବୟସରେ ବହୁତ ସାନ ଏବେକାର ଚର୍ଚ୍ଚିତ ଚେହେରା ଭି. କେ. ପାଣ୍ଡିୟାନ ବାବୁ ଭଲ ଓଡ଼ିଆ କୁହନ୍ତି । ସାଧାରଣ ଲୋକଙ୍କ ସହ ମିଶନ୍ତି ଓ ଅଭିଯୋଗ ଶୁଣି ସମାଧାନ କରିବାକୁ ଚେଷ୍ଟା ବି କରନ୍ତି । ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଓଡ଼ିଆ ନ ହୋଇ ବି ଭଲ ଓଡ଼ିଆ କହିପାରନ୍ତି । ଉଭୟ ସାଧାରଣ ଲୋକଙ୍କ ମନକୁ ଜିତିବା ପାଇଁ ବିଭିନ୍ନ କୈାଶଳ ବି ଆପଣାଇଥାନ୍ତି । ଏଥିରେ ଅସ୍ୱାଭାବିକତା ବି ନାହିଁ । ଆମର ଜନପ୍ରିୟ ମୁଖ୍ୟମନ୍ତ୍ରୀ ଓଡ଼ିଶାରେ ଜନ୍ମ ହୋଇ ଓଡ଼ିଆ କୁହନ୍ତି ନାହିଁ । ଭି. କେ. ପାଣ୍ଡିୟାନ ଓଡ଼ିଶାର ଜ୍ୱାଇଁ ଓ ଅପରାଜିତା ଷଡ଼ଙ୍ଗୀ ଓଡିଶାର ବୋହୂ ହୋଇ ମଧ୍ୟ ଓଡ଼ିଆ କୁହନ୍ତି । ତେଣୁ ଭାଷାଗତ ଦୃଷ୍ଟିରୁ ଦେଖିଲେ କିଏ ଅଣଓଡ଼ିଆ? ମୁଖ୍ୟମନ୍ତ୍ରୀ ନା ପାଣ୍ଡିୟାନ ନା ଅପରାଜିତା? ଆଜି ରାଜ୍ୟର ଅଧିକାଂଶ ସାମ୍ବାଦିକ ଓ ତଥାକଥିତ ବୁଦ୍ଧିଜୀବୀମାନେ ଜାତୀୟତାବାଦ ଚିନ୍ତାରେ ଉବୁଟୁବୁ ହେଉଛନ୍ତି । କେହି କାହାରିକୁ ଏଥିରୁ ବାରଣ ବି କରିପାରିବେନି । ଜାତୀୟତାବାଦ ପାଇଁ ହିଁ ମୁଖ୍ୟମନ୍ତ୍ରୀ ମନରୁ ଓଡ଼ିଆ ନ କହିବାକୁ କେହି ଧରୁ ନାହାନ୍ତି କି ବିରୋଧରେ କହୁନାହାନ୍ତି । ଯଦି ଅଣଓଡ଼ିଆମାନେ ଭଲ ଓ ସୁନ୍ଦର ଓଡିଆ କହି ଓଡିଶାବାସୀଙ୍କର ନେତୃତ୍ୱ ନେବାପାଇଁ ସମର୍ଥ ହୋଇପାରୁଛନ୍ତି ତେବେ ଆମେ ଓଡିଆମାନେ ଓଡ଼ିଆ ନକହି କୋଶଳୀ, ସାନ୍ତାଳି କିମ୍ବା ଆଦିବାସୀ ଭାଷା ଜାଣିଛୁ ବୋଲି ବାହାଦୁରି ଦେଖାଇ ବିଧାନସଭାରେ କହିବାର କ’ଣ ପ୍ରୟୋଜନ । ପ୍ରଥମେ ଓଡ଼ିଶା ତାପରେ ଆଉ ସବୁକିଛି । ଜୟ ଜଗନ୍ନାଥ ମହାପ୍ରଭୁ ।
କୈଳାସ ଚନ୍ଦ୍ର ଶତପଥୀ
ଆଇନଜୀବୀ, ଓଡ଼ିଶା ହାଇକୋର୍ଟ, କଟକ-୨
