ଭୁବନେଶ୍ୱର: ରାଜ୍ୟର ୮୩୦୦ ଗ୍ରାମକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ସଡ଼କ ସଂଯୋଗ ହୋଇପାରିନାହିଁ। ଏଥି ମଧ୍ୟରେ କୋରାପୁଟ ଜିଲ୍ଲାର ସର୍ବାଧିକ ୧୩୭୪ଟି ଗ୍ରାମ ଥିବାବେେବେଳେ ରାୟଗଡ଼ାର ୧୦୯୯, ନବରଙ୍ଗପୁରର ୬୪୧, କଳାହାଣ୍ଡିର ୫୭୪ ଓ ଝାରସୁଗୁଡ଼ା ଜିଲ୍ଲାର ୩୪ ଗ୍ରାମ ରହିଛି। ମଙ୍ଗଳବାର ବିଧାନସଭାରେ ରାଜ୍ୟ ଗ୍ରାମ୍ୟ ଉନ୍ନୟନ ମନ୍ତ୍ରୀ ରବି ନାରାୟଣ ନାୟକ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ ୨୦୧୧ ଜନଗଣନା ଭିତ୍ତିରେ ୨୦୧୭-୧୮ ମସିହାରେ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯେଜାନା ପାଇଁ ପ୍ରସ୍ତୁତ ହୋଇଥିବା ଜିଲ୍ଲା ଗ୍ରାମ ସଡ଼କ ଯୋଜନା ଅନୁସାରେ ରାଜ୍ୟରେ ୫୯,୯୭୧ ଗ୍ରାମ ରହିଥିଲା । ସେଥିମଧ୍ୟରୁ ୫୧,୬୭୧ ଗ୍ରାମକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା ଓ ରାଜ୍ୟ ସରକାରଙ୍କ ଅନ୍ୟାନ୍ୟ ଯୋଜନାରେ ପର୍ଯ୍ୟାୟକ୍ରମେ ସଂଯୋଗୀକରଣ କରାଯାଇଥିଲା। ନିୟମ ଅନୁଯାୟୀ ଯୋଗ୍ୟ ବିବେଚିତ ହେଉନଥିବାରୁ ୮,୩୦୦ ଗ୍ରାମକୁ ସଂଯୋଗୀକରଣ କରାଯାଇନଥିଲା। ବର୍ତ୍ତମାନ କେନ୍ଦ୍ର ସରକାର ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାର ଚତୁର୍ଥ ପର୍ଯ୍ୟାୟକୁ କ୍ୟାବିନେଟ୍ ମଞ୍ଜୁରୀ ଦେଇଛନ୍ତି। ଏହା ନିମନ୍ତେ ଅସଂଯୋଜିତ ଗ୍ରାମଗୁଡ଼ିକର ସର୍ଭେ କାମ ସମସ୍ତ ରାଜ୍ୟରେ ଚାଲୁ ରହିଛି। ସର୍ଭେ ପ୍ରକ୍ରିୟା ସମାପ୍ତି ପରେ କେତେ ଗାଁ ଓ ପଡ଼ାଗାଁକୁ ଏଯାବତ୍ ସବୁଦିନିଆ ରାସ୍ତା ନାହିଁ, ତାହାର ପ୍ରକୃତ ତଥ୍ୟ ସାମ୍ନାକୁ ଆସିପାରିବ ବୋଲି ବିଜେପି ବିଧାୟକ ଟଙ୍କଧର ତ୍ରିପାଠୀଙ୍କ ପ୍ରଶ୍ନର ଉତ୍ତରରେ ଗ୍ରାମ୍ୟ ଉନ୍ନୟନ ମନ୍ତ୍ରୀ ଶ୍ରୀ ନାୟକ ସ୍ପଷ୍ଟ କରିିଛନ୍ତି।
ବିଧାନସଭାରେ ମାନିଲେ ଗ୍ରାମ୍ୟ ଉନ୍ନୟନ ମନ୍ତ୍ରୀ, ୮,୩୦୦ ଗ୍ରାମକୁ ନାହିଁ ପିଏମ୍ଏସ୍ଜିୱାଇ ସଡ଼କ
