ରଣପୁର, ୦୧/୦୪ : ୨୦୨୭ ଜନଗଣନାର ପ୍ରଥମ ପର୍ଯ୍ୟାୟ ସ୍ୱ-ଗଣନା (Self Enumeration) ଏପ୍ରିଲ ୧ ରୁ ୧୫ ତାରିଖ ପର୍ଯ୍ୟନ୍ତ ଚାଲିଥିବାବେଳେ ରଣପୁର ବ୍ଲକରେ ଏହାକୁ ନେଇ ସଚେତନତା କାର୍ଯ୍ୟକ୍ରମ ଜୋରଦାର ହୋଇଛି। ଏହି ପରିପ୍ରେକ୍ଷିତରେ ରଣପୁର ତହସିଲଦାର ଡ଼. ଆର୍ଯ୍ୟ କୁମାର ସର୍ବଦାମନ ବ୍ଲକର ବିଭିନ୍ନ ପ୍ରମୁଖ ବ୍ୟକ୍ତିଙ୍କ ଘରକୁ ଯାଇ ସେମାନଙ୍କୁ ସ୍ୱ-ଜନଗଣନା ବିଷୟରେ ସଚେତନ କରିବା ସହିତ ଅନଲାଇନ ପୋର୍ଟାଲରେ ନିଜ ତଥ୍ୟ ପଞ୍ଜିକରଣ କରିବାରେ ସହାୟତା କରିଥିଲେ।
ପ୍ରଥମ ଦିନରେ ସେ ରଣପୁରର ଲତାର ଗ୍ରାମକୁ ଯାଇ ନୟାଗଡ଼ ଜିଲ୍ଲା ପରିଷଦ ଅଧ୍ୟକ୍ଷ ଦେବାଶିଷ ପଟ୍ଟନାୟକଙ୍କୁ ସ୍ୱ-ଗଣନାରେ ସହଯୋଗ କରିଥିଲେ। ପରବର୍ତ୍ତୀ ପର୍ଯ୍ୟାୟରେ ରଣପୁର ବ୍ଲକ ଚେୟାରମ୍ୟାନ ନିର୍ମଳା ବେହେରାଙ୍କ କନ୍ଧନୟାଗଡ଼ ସ୍ଥିତ ବାସଭବନକୁ ଯାଇ ସେଠାରେ ମଧ୍ୟ ସ୍ୱ-ଗଣନା ପଞ୍ଜିକରଣ କାର୍ଯ୍ୟ ସମ୍ପନ୍ନ କରାଯାଇଥିଲା।
ସେହିପରି ଶିଳ୍ପପତି ସର୍ବେଶ୍ୱର ସାହୁଙ୍କ ରାଜସୁନାଖଳା ସ୍ଥିତ ବାସଭବନକୁ ଯାଇ ତାଙ୍କୁ ମଧ୍ୟ ଏହି ଅଭିଯାନ ବିଷୟରେ ଅବଗତ କରାଯାଇ ସ୍ୱ-ଗଣନାରେ ପଞ୍ଜିକରଣ କରାଯାଇଥିଲା। ଏହାସହ ରଣପୁର ବ୍ଲକ ଉପାଧ୍ୟକ୍ଷ ପ୍ରଭାତ ଦଳବେହେରାଙ୍କର ମଧ୍ୟ ସଫଳତାର ସହିତ ସ୍ୱ-ଗଣନା ପଞ୍ଜିକରଣ ହୋଇଥିଲା। ଏହି ସଚେତନତା ଓ ପଞ୍ଜିକରଣ କାର୍ଯ୍ୟରେ ପ୍ରଶିକ୍ଷକ ଶକ୍ତି ପ୍ରସାଦ ଆଚାର୍ଯ୍ୟ, ନୀଳଚକ୍ର ଜ୍ୟୋତି ରଂଜନ ଓ ସୁଶୀଲ କୁମାର ରଣା ପ୍ରମୁଖ ଉପସ୍ଥିତ ରହି ବୈଷୟିକ ସହଯୋଗ ପ୍ରଦାନ କରିଥିଲେ।
ସ୍ୱ-ଜନଗଣନା ମାଧ୍ୟମରେ ନାଗରିକମାନେ ନିଜ ତଥ୍ୟ ନିଜେ ଅନଲାଇନରେ ପଞ୍ଜିକରଣ କରିପାରୁଥିବାରୁ ଏହାକୁ ନେଇ ଲୋକମାନଙ୍କ ମଧ୍ୟରେ ଆଗ୍ରହ ବୃଦ୍ଧି ପାଇଥିବା ଦେଖାଯାଉଛି। ସରକାରୀ ପକ୍ଷରୁ ସମସ୍ତଙ୍କୁ ଏହି ପ୍ରକ୍ରିୟାରେ ସ୍ୱୟଂ ଅଂଶଗ୍ରହଣ କରିବାକୁ ଆହ୍ୱାନ ଜଣାଯାଇଛି।
