ରଣପୁର (ଭି ଓ ଭି) ରଣପୁର ବ୍ଲକ ଅନ୍ତର୍ଗତ ବୃନ୍ଦାବନପୁର ଗ୍ରାମପଞ୍ଚାୟତରେ ହେଉଥିବା “ପଞ୍ଚାୟତ ବ୍ୟାଙ୍କ ଗୃହ ” ବେନିୟମ ଭାବେ ସ୍ଥାନାନ୍ତରକୁ ନେଇ ଗ୍ରାମବାସୀଙ୍କ ଜିଲ୍ଲାପାଳଙ୍କୁ ବାରମ୍ବାର ଅଭିଯୋଗ ପରେ ବି କାର୍ଯ୍ୟାନୁଷ୍ଠାନ ଶୂନହୋଇପଡ଼ିଥିବାବେଳେ ଏବେ ଜୋରଜବରଦସ୍ତ ଗୃହ ନିର୍ମାଣ ଚାଲିଥିବା ଜଣାଯାଇଛି l ଫଳରେ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ସାଙ୍ଗକୁ ବିବାଦ ବଢ଼ିବାରେ ଲାଗିଛି l ଅଭିଯୋଗ ମୁତାବକ ଲୋକମାନଙ୍କର ବୃହତ୍ତର ସ୍ୱାର୍ଥ ଦୃଷ୍ଟିରୁ ସରକାରଙ୍କ ତରଫରୁ ପ୍ରତି ପଞ୍ଚାୟତରେ ବ୍ୟାଙ୍କ ସେବା ଉଦେଶ୍ୟରେ “ପଞ୍ଚାୟତ ବ୍ୟାଙ୍କ ଗୃହ” ନିର୍ମାଣ ହେଉଛି l ସରକାରଙ୍କ ନିୟମ ଅନୁଯାୟୀ ପଞ୍ଚାୟତର ହେଡ୍ କ୍ୱାଟର ରେ ଏହା ନିର୍ମାଣ କରାଯିବାର ନିୟମ ରହିଛି। ଆବଶ୍ୟକୀୟ ସ୍ଥଳେ ଯଦି ଜାଗାର ଅଭାବ ଥାଏ ତେବେ ପଞ୍ଚାୟତ ଅଧିନରେ ଅନ୍ୟ କୌଣସି ଗ୍ରାମରେ ଏହି ବ୍ୟାଙ୍କ ଗୃହ ନିର୍ମାଣ କରାଯାଇ ପାରିବ। ବୃନ୍ଦାବନପୁର ପଞ୍ଚାୟତରେ ଏଭଳି ଏକ ଗୃହ ନିର୍ମାଣ ନିମନ୍ତେ ସରକାରୀ ଅର୍ଥ ମଞ୍ଜୁର ହୋଇଛି l ପଞ୍ଚାୟତ ର କେନ୍ଦ୍ର ସ୍ଥଳୀ ତଥା ପଞ୍ଚାୟତ ଗୃହ ନିକଟରେ ଗୃହ ନିର୍ମାଣ ନିମନ୍ତେ ଜାଗା ବି ରହିଛି। ଜାଗାର ପ୍ରମାଣ ସହ ଅଞ୍ଚଳ ବାସୀଙ୍କ ଜିଲ୍ଲାପାଳଙ୍କୁ ବାରମ୍ବାର ଅନୁରୋଧ ସତ୍ୱେ କିଛି ନ୍ୟସ୍ଥସ୍ୱାର୍ଥ ଗୋଷ୍ଠୀଙ୍କ ପ୍ରରୋଚନାରେ ପଡି ଏହି ଗୃହ ପଞ୍ଚାୟତ ଠାରୁ ଅନତି ଦୂରରେ ଅର୍ଥାତ ଲେଖନପୁର ଗ୍ରାମ ଠାରେ ନିର୍ମାଣ ହେଉଛି l ଏପରିକି ଯେଉଁ ସ୍ଥାନରେ ଉକ୍ତ ଗୃହ ନିର୍ମାଣ ହେଉଛି ସେହି ସ୍ଥାନର ଅତି ନିକଟରେ ଏକ ଓଡିଶା ଗ୍ରାମ୍ୟ ବ୍ୟାଙ୍କର ଶାଖା ରହିଛି l ଅପରପକ୍ଷେ ପଞ୍ଚାୟତ ନିକଟବର୍ତ୍ତୀ ସାତଟି ମୌଜା ଯଥା ବୃନ୍ଦାବନପୁର ସମେତ ବ୍ରଜସୁନ୍ଦରପୁର, ମଳିପଡ଼ା,ଗାଈଝର,ଅଁଳାପଲ୍ଲୀ, ଚାରପଲ୍ଲୀ, ପାଇକରାପୁର ଆଦି ଗାଁର ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେବେ ବୋଲି ଅଭିଯୋଗ ହୋଇ ଆସୁଛି l ଏ ନେଇ ଗ୍ରାମବାସୀ ପ୍ରଥମେ ଜିଲ୍ଲାପାଳଙ୍କୁ କାର୍ଯ୍ୟାଳୟରେ ଅଭିଯୋଗ କରିବା ପରେ ପୁଣି ଦ୍ୱିତୀୟ ଥର ଜିଲ୍ଲାପାଳଙ୍କ ଜନଶୁଣାଣୀ ଶିବିର ରେ ଅଭିଯୋଗ କରିଥିଲେ l ଏପରିକି ଏ ନେଇ ରାଜ୍ୟର ଏକ ଜଣାଶୁଣା ସାମାଜିକ ସଂଗଠନ ଭାବେ ପରିଚିତ ” ଭଏସ ଅଫ ଭିକ୍ଟିମସ୍ ” ତରଫରୁ ରାଜ୍ୟ ମୁଖ୍ୟ ଶାସନ ସଚିବ ଓ ଜିଲ୍ଲାପାଳଙ୍କୁ ଅବଗତ କରାଯାଇଥିଲା l ତୁରନ୍ତ ଏହାର ସମାଧାନ କରିବାକୁ ସ୍ଥାନୀୟ ତହସିଲଦାରଙ୍କୁ ଚିଠି ମାଧ୍ୟମରେ ଜିଲ୍ଲପାଳ ଅଫିସରୁ ତାଗିଦ କରାଯାଇଥିଲା l ହେଲେ ଫଳ ଓଲଟା,ଯଥା ପୂର୍ବ ତଥା ପର ସଦୃଶ ଏବେ ଯୁଦ୍ଧ କାଳୀନ ଭିତ୍ତିରେ କାମ ଯୋରସୋର ଚାଲିଛି l ଯାହାକି ପଞ୍ଚାୟତରେ ଏକ ଚାପା ଉତ୍ତେଜନା ଲାଗିରହିଥିବା ଚର୍ଚ୍ଚା ହେଉଛି l ଫଳରେ ରେ ଅଞ୍ଚଳରେ ଅସନ୍ତୋଷ ବଢିବା ସାଙ୍ଗକୁ ଭାଇଚାରା ନଷ୍ଟ ହେବାରେ ଲାଗିଛି l କିନ୍ତୁ ଏହାର ପ୍ରାଥମିକ ଅନୁସନ୍ଧାନ ପରେ ବ୍ୟବସ୍ଥା କରାଯିବ ବୋଲି ତହସିଲଦାର ରବୀନ ଚର୍ଚ୍ଚିଲ ମିଶ୍ର କହିଥିଲେ ହେଁ ଏହାର ପଦକ୍ଷେପ ନନେବାରୁ ଏବେ ଅଡୁଆ ଆଡ଼କୁ ଗତିକରୁଛି l ବେଳ ଥାଉ ଥାଉ ଏହାର ପ୍ରତିକାର କରାନଗଲେ ଆଗାମୀ ଦିନରେ ଏହା ବିସ୍ଫୋରକ ପରିସ୍ଥିତି ଉପୁଯିବ ବୋଲି ଚର୍ଚ୍ଚା ଯୋର ଧରିଛି l ତେବେ ବିଡ଼ିଓ ସୁଧୀର କୁମାର ନାୟକଙ୍କୁ ପଚାରିବାରେ ଏହାର ବ୍ୟବସ୍ଥା କରାଯିବ ବୋଲି ସଫେଇ ଦେଇଛନ୍ତି l
ବୃନ୍ଦାବନପୁର “ପଞ୍ଚାୟତ ବ୍ୟାଙ୍କ ଗୃହ”ସ୍ଥାନାନ୍ତର ଘଟଣା: ବିଭାଗୀୟ କାର୍ଯ୍ୟାନୁଷ୍ଠାନ ଶୂନ, ନିର୍ମାଣ ହେଉଛି ଗୃହ, ବଢୁଛି ବିବାଦ
