ଇରାନ: ଇରାନର ଚାବାହାର ପୋର୍ଟକୁ ଫେରିଲା କଟକଣା । ପୋର୍ଟ ପାଇଁ ନିଷେଧାଜ୍ଞା ଛାଡ଼କୁ ବାତିଲ କଲା ଆମେରିକା । ଏହା ଭାରତ ପାଇଁ ବଡ଼ ଝଟକା । ଏହି ପୋର୍ଟର ବିକାଶ କାର୍ଯ୍ୟରେ ନିୟୋଜିତ ଅଛି ଭାରତ । ୨୦୧୮ରୁ ଏହି ପୋର୍ଟ ଉପରୁ କଟକଣାକୁ କୋହଳ କରିଥିଲା ଆମେରିକା । ଏବେ ତାହାକୁ ବାତିଲ କରିଛି । କଟକଣା ଆସନ୍ତା ୨୯ ତାରିଖରୁ ଲାଗୁ ହେବ । ଆମେରିକା ତରଫରୁ କୁହାଯାଇଛି, ଯିଏ ବି ପୋର୍ଟ ପରିଚାଳନା କରୁଛି କିମ୍ବା ପୋର୍ଟ ସହିତ ଜଡିତ ସେମାନେ କଟକଣାର ସମ୍ମୁଖୀନ ହେବେ । ତେଣୁ ଆମେରିକାର ଏହି ପଦକ୍ଷେପ ଦ୍ବାରା ଭାରତ ବିଶେଷ ପ୍ରଭାବିତ ହେବ ।
ଭାରତର ଇଣ୍ଡିଆ ପୋର୍ଟସ ଗ୍ଲୋବାଲ ଲିମିଟେଡ୍ (IPGL) ଚଳିତ ବର୍ଷ ମେ ମାସରେ ଏହି ପୋର୍ଟ ପରିଚାଳନା ପାଇଁ ୧୦ ବର୍ଷର ଚୁକ୍ତି କରିଥିଲା । ଯେଉଁଥିରେ ୨୫୦ ମିଲିଅନ୍ ଡଲାର ନିବେଶ କରିବ ଭାରତ । ଆମେରିକାର ପଦକ୍ଷେପରେ ଭାରତର IPGL କମ୍ପାନୀର ସମ୍ପତ୍ତି ଫ୍ରିଜ୍ ହେବା ଆଶଙ୍କା ରହିଛି । ଏହାସହ ପୋର୍ଟ ସହ ଜଡିତ କମ୍ପାନୀଗୁଡିକ ବ୍ୟାଙ୍କ କଟକଣାର ସମ୍ମୁଖୀନ ହୋଇ ପାରନ୍ତି । ଯାହା ଦ୍ୱାରା ପ୍ରକଳ୍ପର ବିକାଶ କାର୍ଯ୍ୟ ବାଧାପ୍ରାପ୍ତ ହେବ । ଚାବାହାର ପୋର୍ଟ ଉପରେ କଟକଣା ଫଳରେ ପାକିସ୍ତାନର ଗ୍ବାଦାର ପୋର୍ଟ ଓ ଚୀନ୍ ର Belt and Road Initiativeକୁ ଅଧିକ ଫାଇଦା ମିଳିପାରେ । ଗଲଫ ଅଫ ଓମାନରେ ଥିବା ଇରାନ ଚାହାବାହର ପୋର୍ଟ ଭାରତ ପାଇଁ ଏକ ମହତ୍ବାକାଂକ୍ଷୀ ପ୍ରକଳ୍ପ । ଏହି ପୋର୍ଟ ରଣନୈତିକ ଦୃଷ୍ଟିରୁ ଭାରତ ପାଇଁ ଗୁରୁତ୍ବପୂର୍ଣ୍ଣ । ଭାରତ-ଇରାନ-ଆଫଗାନିସ୍ତାନକୁ ଯୋଡୁଥିବା ଚାବାହାର ପୋର୍ଟ, ମଧ୍ୟ-ଏସିଆରେ ବ୍ୟାପର ପାଇଁ ଭାରତକୁ ସାହାଯ୍ୟ କରୁଛି ।
ଏହାସହ ମାନବୀୟ ସହାୟତା ପଠାଇବା ପାଇଁ ଭାରତ ଏହି ପୋର୍ଟକୁ ବ୍ୟବହାର କରୁଛି । ତେଣୁ ଆମେରିକାର କଟକଣା ଭାରତ ପାଇଁ ଝଟକା । ବର୍ତ୍ତମାନ ଭାରତ ମାନବୀୟ ସହାୟତା ଉଦାହରଣ ଦେଇ କଟକଣା କୋହଳ ପାଇଁ ଆମେରିକାକୁ କହିପାରେ କିମ୍ବା ବିକଳ୍ପ ପରିବହନ ପଥ ଖୋଜିବ ଭାରତ । କିନ୍ତୁ ଆମେରିକାର ଏହି କଟକଣା ଭାରତ-ଆମେରିକା ସମ୍ପର୍କକୁ ପୁଣି ଥରେ ଜଟିଳ କରିପାରେ । ବର୍ତ୍ତମାନ ସୁଦ୍ଧା ଭାରତ ତରଫରୁ କୌଣସି ପ୍ରତିକ୍ରିୟା ଆସି ନାହିଁ ।
