ଢେଙ୍କାନାଳ(ଭିଓଭି): ଢେଙ୍କାନାଳ ଜିଲ୍ଲା ଗ଼ଁଦିଆ ବ୍ଲକ ପ୍ରସିଦ୍ଧ ମହିମା ଧର୍ମ ପୀଠ ଯୋରନ୍ଦାଠାରୁ ମାତ୍ର ୬ କିମି ତଥା ବାଇଁଶିଆ ଗ୍ରାମ ପଞ୍ଚାୟତ ଅନ୍ତର୍ଗତ କଙ୍କା ଗ୍ରାମକୁ ସଂଯୋଗ କରୁଥିବା ପ୍ରଧାନମନ୍ତ୍ରୀ ସଡ଼କ ଯୋଜନା ଉପରେ ଥିବା ଏକ ନାଳ ଉପରେ ଦୀର୍ଘ ୨୦ ବର୍ଷରୁ ଅଧିକ ହେବ ଏକ ସ୍ଥାୟୀ ପୋଲ ନିର୍ମାଣ ପାଇଁ ଗ୍ରାମବାସୀଙ୍କ ଦ୍ୱାରା ଦାବି ହୋଇଆସୁଛି ।
ପ୍ରତ୍ୟେକ ବର୍ଷ ବର୍ଷା ଓ ବନ୍ୟାରେ ଏହି ପୋଲ ଉପରେ ପାଣି ଚାଲେ ଓ କଙ୍କା ଗ୍ରାମର ପ୍ରାୟ ୬୦୦ ଗ୍ରାମବାସୀ ପ୍ରାୟ ବର୍ଷକୁ ୪ମାସ ଜଳବନ୍ଦୀ ହୋଇ ରହିଥାନ୍ତି । ଏଥିପାଇଁ ନାଳ ଉପରେ ଏକ ସ୍ଥାୟୀ ପୋଲ ନିର୍ମାଣ ପାଇଁ ଗ୍ରାମବାସୀମାନେ ମିଳିତ ହୋଇ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଢେଙ୍କାନାଳ ଜିଲ୍ଲାପାଳଙ୍କୁ ଏକ ଦାବିପତ୍ର ପ୍ରଦାନ କରିବା ସହ ଢେଙ୍କାନାଳ ବିଧାୟକ ସୁଧିର ସାମଲଙ୍କୁ ମଧ୍ୟ ଦାବିପତ୍ର ଦେଇଥିଲେ । ବାରମ୍ବାର ଦାବି ପରେ ତା ୨୫/୦୭/୨୩ ରିଖ ରେ ଜିଲ୍ଲା ଗ୍ରାମ୍ୟ ଉନ୍ନୟନ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ଓ ସହକାରୀ ଯନ୍ତ୍ରୀ କ୍ଷେତ୍ର ପରିଦର୍ଶନ କରିଥିଲେ ।
ଗ୍ରାମବାସୀଙ୍କ ୍ୱାରମ୍ବାର ଦାବି ପରେ ଗ୍ରାମ୍ୟ ଉନ୍ନୟନ ବିଭାଗ, ଢେଙ୍କାନାଳ ଓ ଭୁ୍ୱନେଶ୍ୱରଙ୍କ ପ୍ରସ୍ତାବ ସତ୍ତ୍ୱେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଏପର୍ଯ୍ୟନ୍ତ ପତ୍ର ଆସିପାରୁ ନାହିଁ କି କାର୍ଯ୍ୟ ଆରମ୍ଭ ହୋଇପାରୁନାହିଁ । ଏପରିକି ୫-ଟି ରେ ପୋଲ ନିର୍ମାଣ ପାଇଁ ଅଭିଯୋଗ ଯାଇଥବା ୩୧୪ ଟି ପୋଲ ନିର୍ମାଣାର୍ଥେ ଥିବା ଭି.ଆଇ.ପି. ଲିଷ୍ଟରେ ଏହି ମୁଖ୍ୟ ନାଳ ଉପରେ ପୋଲ ନିର୍ମାଣ ସ୍ଥାନ ପାଇଛି । କିନ୍ତୁ ବିଡ଼ମ୍ବନାର ବିଷୟ ହେଉଛି ଯେ ଏପର୍ଯ୍ୟନ୍ତ ଏହା କାର୍ଯ୍ୟକାରୀ ହେଉନାହିଁ ।
ତେଣୁ କଙ୍କା-ବାଇଁଶିଆ ମୁଖ୍ୟ ରାସ୍ତା ଉପରେ ଥିବା ଏହି ନାଳ ଉପରେ ସ୍ଥାୟୀ ପୋଲ ନିର୍ମାଣ କାର୍ଯ୍ୟ ପ୍ରସ୍ତାବ ପାଳିତ ଓ କାର୍ଯ୍ୟକାରୀ ହେଲେ ଗ୍ରାମବାସୀ ମାନେ ଉପକୃତ ହେବେ ବୋଲି ଗ୍ରାମ ସଭାପତି ବିରଞ୍ଚି ନାରାୟଣ ଇନ୍ଦ୍ରଜିତ ସିଂ, ସମ୍ପାଦକ ଶରତ ଚନ୍ଦ୍ର ସ୍ତମ୍ଭ, ଯୁବ ସମାଜସେବୀ ସୁଦର୍ଶନ ସ୍ତମ୍ଭ ତଥା ଅନ୍ୟ ନେତୃବୃନ୍ଦ ମାନେ ଗୁହାରି କରିଛନ୍ତି ।
ରତ୍ନାକର ମହାମାନସିଂ
ରିପୋର୍ଟର୍
