ଭୁବନେଶ୍ୱର, ତା ୨୮/୫: ବିଗତ କିଛିଦିନ ହେବ ରାଜ୍ୟର ବିଭିନ୍ନ ସ୍ଥାନରେ କାର୍ଯ୍ୟରତ ସାମ୍ବାଦିକଙ୍କ ଉପରେ ସମ୍ବାଦ ପରିବେଷଣ କୁ ନେଇ ଆକ୍ରମଣ ଘଟଣା କ୍ରମାଗତ ଭାବେ ବଢ଼ି ଚାଲିଛି। ଏହି ପରିପେକ୍ଷୀରେ ବଲାଙ୍ଗିର, ପଈଁତଳା ଥାନା ଅନ୍ତର୍ଗତ କୁଇଥିପାଲ୍ଲି ରେ “ବଡ ଖବର” ଗଣମାଧ୍ୟମର ପ୍ରତିନିଧି ବିଜୟ କୁମାର ପ୍ରଧାନଙ୍କୁ ଗୋଡ ହାତ ବାନ୍ଧି ବର୍ବୋରୋତିତ ଆକ୍ରମଣ କରିବା ଓ ଅମାନୁଷିକ ବ୍ୟବହାର ପ୍ରଦର୍ଶନ କରିବା ନେଇ ସାରା ରାଜ୍ୟରେ ସାମ୍ୱାଦିକ ମାନଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଘଟଣାର ତିନିଦିନ ପାରେ ୪ଜଣ ସହ ଅଭିଯୁକ୍ତ ଗିରଫ ହୋଇଥିବା ବେଳେ ମୂଖ୍ୟ ଅଭିଯୁକ୍ତ ଠିକାଦାର ଗଜେନ୍ଦ୍ର ଦଳେଇ କୁ ବଲାଙ୍ଗିର ପୋଲିସ ଧରିବାରେ ସକ୍ଷମ ହୋଇ ନାହିଁ।
ଅତଏବ ମୂଖ୍ୟ ଆସାମୀକୁ ଗିରଫ କରାଯିବା ସହ କାର୍ଯ୍ୟରତ ସାମ୍ୱାଦିକଙ୍କ ଉପରେ ବୃଦ୍ଧି ପାଇଥିବା ଆକ୍ରମଣ ଘଟଣା ପରିପ୍ରେକ୍ଷୀରେ ତଥା ମୁକ୍ତ ସାମ୍ବାଦିକତାକୁ ସୁରକ୍ଷା ଦେବାରେ ପ୍ରତିବାଦ ସ୍ଵରୂପ ରାଜ୍ୟରେ “ସାମ୍ୱାଦିକ” ସୁରକ୍ଷା ଆଇନ୍ ପ୍ରଣୟନ ହେବାନେଇ ଦୃଷ୍ଟି ଆକର୍ଷଣ ପୂର୍ବକ ସରକାରଙ୍କ ସମୀପରେ ଉତ୍କଳ ସାମ୍ୱାଦିକ ସଂଘ, ଭୁବନେଶ୍ୱର ଜିଲ୍ଲା ଶାଖା ପକ୍ଷରୁ ଅତିରିକ୍ତ ଜିଲ୍ଲାପାଳ ରୁଦ୍ର ନାରାୟଣ ମହାନ୍ତିଙ୍କ ଜରିଆରେ ଆଜି ମୂଖ୍ୟମନ୍ତ୍ରୀଙ୍କ ଉଦେଶ୍ଯରେ ଦାବିପତ୍ର ପ୍ରଦାନ କରାଯାଇଛି। ଭୁବନେଶ୍ୱର ଜିଲ୍ଲା ଶାଖା ସଭାପତି ପ୍ରତାପ ଚନ୍ଦ୍ର ପ୍ରଧାନଙ୍କ ନେତୃତ୍ୱରେ ସଂଘର ଅନ୍ୟତମ ସଦସ୍ୟ ତଥା ରାଜ୍ଯ ସଂଘ କୋଷାଧ୍ୟକ୍ଷ ରାଜେନ ଚୌଧୁରୀ, ଭୁବନେଶ୍ୱର ସାମ୍ବାଦିକ ସଂଘର କାର୍ଯ୍ୟନିର୍ବାହୀ ସଦସ୍ଯ ମନୋଜ ପ୍ରଧାନ, ଟୁଲୁ କୁମାର ପାତ୍ର ଓ ପ୍ରକାଶ କୁମାର ସାହୁ ଏବଂ ସଭ୍ଯ ସନ୍ତୋଷ କୁମାର ପଣ୍ଡା, ଲୁକେସ ସାହୁ ପ୍ରମୁଖ ଉପସ୍ଥିତିରେ ଦାବିପତ୍ର ପ୍ରଦାନ କରାଯାଇଛି।
