ଭୁବନେଶ୍ବର: ଦୀର୍ଘ ୧୦ ଦିନ ଧରି ଏକ ଅଣ ପଞ୍ଜୀକୃତ ପ୍ରାଣୀ ଚିକିତ୍ସା ସେବା ସଂସ୍ଥାର କିଛି ପ୍ରାଣୀ ଚିକିତ୍ସକ ଗୋଷ୍ଠି ଆନ୍ଦୋଳନ ଡାକରା ଦେଇଛି। ମାତ୍ର ଆନ୍ଦୋଳନରେ ଯୋଗ ନଦେବା ପାଇଁ ଚାହୁଁଥିବା କିଛି ନିରୀହ ଓ କର୍ତ୍ତବ୍ୟ ପରାୟଣ ପ୍ରାଣୀ ଚିକିତ୍ସକଙ୍କୁ ଆନ୍ଦୋଳନରେ ଯୋଗଦେବାକୁ ବାଧ୍ୟ କରାଯାଉଥିବା ଅଭିଯୋଗ ହେଉଛି। ଏହାର ସବୁଠାରୁ ଅଧିକ ପ୍ରଭାବ ପଡ଼ୁଛି ଖୋର୍ଦ୍ଧା ଜିଲ୍ଲାରେ। ଏଠାରେ ଥିବା ମୁଖ୍ୟ ଜିଲ୍ଲା ପ୍ରାଣୀ ଚିକିତ୍ସା ସେବା ଅଧିକାରୀ (ସି ଡି ଭି ଓ) ଏହି ଆନ୍ଦୋଳନରତ ଅଣ ପଞ୍ଜୀକୃତ ସଂଘର କର୍ମକର୍ତ୍ତାଙ୍କୁ ଉତ୍ସାହିତ କରିବା ସହିତ ପ୍ରତ୍ୟେକ ଦିନ ସେମାନଙ୍କ ସହ ମିଶି ଭୋଜି ଭାତର ଆସର ଜମାଇ ଘଟଣାକୁ ଅଧିକ ଜଟିଳ କରୁଥିବାର ଅଭିଯୋଗ ହୋଇଛି। ପ୍ରାୟ ପ୍ରତ୍ୟେକ ଦିନ ଏହି ଜିଲ୍ଲାର କିଛି ପ୍ରାଣୀ ଚିକିତ୍ସକ ଅଣ ପଞ୍ଜୀକୃତ ସଂସ୍ଥାର ଆନ୍ଦୋଳନକାରି ମାନଙ୍କ ସହ ମିଶି ପ୍ରାଣୀ ଚିକିତ୍ସା ସେବାରେ ବିଶୃଙ୍ଖଳା ସୃଷ୍ଟି କରିବାରୁ ଅନେକ ପ୍ରାଣୀ ଧନ ଜୀବନ ହାନି ଘଟିବାର ଖବର ଆସି ପହଞ୍ଚିଛି। ବାଲିପାଟଣା, ବାଳକାଟି, ଓଲ୍ଡ ଟାଉନ ଏବଂ ଟାଙ୍ଗୀ ପ୍ରଭୃତି ପ୍ରାଣୀ ଚିକିତ୍ସାଳୟ ଅଞ୍ଚଳରେ ପ୍ରାଣୀପାଳକମାନେ ବିଶେଷ ଭାବେ କ୍ଷତିଗ୍ରସ୍ତ ହେଉଛନ୍ତି। ଏ ସବୁ ବ୍ଲକ୍ ରେ ଥିବା ପ୍ରାଣୀଧନ ନିରୀକ୍ଷକ ମାନଙ୍କର ଅକ୍ଲାନ୍ତ ଉଦ୍ୟମ ଓ ସେବା ଦ୍ଵାରା ପ୍ରାଣୀ ପାଳକ ମାନେ କିଛିଟା ଆଶ୍ବସ୍ତ ଲାଭ କରୁଛନ୍ତି। କିନ୍ତୁ ଆଶ୍ଚର୍ଯ୍ୟର ବିଷୟ ସରକାର ଯଦିଓ ଜାଣିଛନ୍ତି ଏକ ଅଣ ପଞ୍ଜୀକୃତ ପ୍ରାଣୀ ଚିକିତ୍ସକ ସେବା ସଂଘ ଆନ୍ଦୋଳନକୁ ଓହ୍ଲାଇ ପ୍ରାଣୀ ଚିକିତ୍ସା ସେବାକୁ ସମ୍ପୂର୍ଣ୍ଣ ଅକାମୀ କରିଦେବାର ହିନ ପ୍ରୟାସ ଜାରି ରଖିଛନ୍ତି। ତଥାପି ସେମାନଙ୍କ ବିରୁଦ୍ଧରେ କିଛି ଆଖିଦୃଶିଆ କିମ୍ବା ଦୃଷ୍ଟାନ୍ତ ମୂଳକ ଦଣ୍ଡ ବିଧାନ ର ପଦକ୍ଷେପ ନ ନେଇ ନୀରବ ରହିଛନ୍ତି। ପ୍ରାଣୀ ଧନ ଜୀବନକୁ ଏମିତି ଦୁର୍ଦ୍ଦିନ ଭିତରକୁ ଠେଲି ଦେବାକୁ ବୁଦ୍ଧିଜୀବୀମାନଙ୍କ ମନରେ ପ୍ରଶ୍ନବାଚୀ ସୃଷ୍ଠି କରିଛି। ପ୍ରାଣୀ ଚିକିତ୍ସା ଠପ୍ ହୋଇଯାଇଥିବା ସମୟରେ ଏକ ଗୁରୁତର ଅଭିଯୋଗ ଟାଙ୍ଗୀ ବ୍ଲକ ବି.ଭି.ଓ ଏବଂ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଙ୍କ ନାମରେ ହୋଇଥିବାର ଖବର ଚର୍ଚ୍ଚାର ବିଷୟ ହୋଇଛି। ଟାଙ୍ଗୀ ବ୍ଲକ ର ଗୋଷ୍ଠି ପ୍ରାଣୀ ଚିକିତ୍ସା ଅଧିକାରୀ ଭୁବନେଶ୍ୱର ରେ ରହି ଟାଙ୍ଗୀ ଯିବା ଆସିବା କରି ଟାଙ୍ଗୀ ରେ ରହୁ ଥିବାର ମିଥ୍ୟା ପ୍ରମାଣ ପତ୍ର ଦେଇ ଘର ଭଡା ନିଅନ୍ତି ଓ ସପ୍ତାହ ରେ ଅନେକ ଦିନ ଅନୁପସ୍ଥିତ ରହିବା ଦ୍ଵାରା ପ୍ରାଣୀ ଚିକିତ୍ସା ସେବା ପାଇବାରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖିନ ହେଉଛନ୍ତି। ସମାନ ଭାବେ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ ସପ୍ତାହରେ ୩-୪ ଦିନ ଖୋର୍ଦ୍ଧା କାର୍ଯ୍ୟାଳୟ ରେ ରହି ବାକି ଦିନ ଗୁଡ଼ିକ ରେ କେଉଁଝର ଜିଲ୍ଲାରେ ଥିବା ନିଜ ବ୍ୟବସାୟର ଦେଖାଶୁଣା କରନ୍ତି। ଏସବୁ ଅଧିକାରୀ ମାନଙ୍କ ବିରୁଦ୍ଧରେ ସରକାର ବିହିତ ପଦକ୍ଷେପ ନେବା ନିମନ୍ତେ ସ୍ଥାନୀୟ ବୁଦ୍ଧିଜୀବୀମାନେ ଦାବି କରିଛନ୍ତି।
ଓଡ଼ିଶାରେ ବିପର୍ଯ୍ୟସ୍ତ ପ୍ରାଣୀ ଚିକିତ୍ସା ସେବା: ୧୦ ଦିନରେ ପହଞ୍ଚିଲା ଅଣ ପଞ୍ଜୀକୃତ ସଂସ୍ଥା ଓ.ଭି.ଏସ.ଏ ର ଆନ୍ଦୋଳନ
