ଭୁବନେଶ୍ବର: ଯେତେବେଳେ ବାପା ଉତ୍ତମ ମହାନ୍ତିଙ୍କ ପରଲୋକ ଘଟିଥିଲା ସେତେବେଳେ ପୁତ୍ର ବାବୁଶାନ ଲଣ୍ଡା ହୋଇ ନ ଥିଲେ। ହେଲେ ଆଜି ସେ ଲଣ୍ଡା ହୋଇ ପିତୃକର୍ମ କରିଛନ୍ତି। ଉତ୍ତମ ମହାନ୍ତି ଫେବୃଆରୀ ୨୭ ତାରିଖରେ ନୂଆଦିଲ୍ଲୀରେ ଚିକିତ୍ସିତ ଅବସ୍ଥାରେ ପରଲୋକ ଗମନ କଲେ। ତାଙ୍କ ଦଶାହ ବେଳକୁ ପୁତ୍ର ବାବୁଶାନ ଲଣ୍ଡା ହେବା କଥା ହେଲେ ଚଳଚିତ୍ର ସୁଟିଂ ଚାଲିଥିବାରୁ ସେ ଲଣ୍ଡା ହୋଇପାରିଲେ ନାହିଁ।
ତେବେ ଆଜି ସପରିବାର ବାବୁଶାନ ପୁରୀ ଯାଇ ମହୋଦଧିରେ ବାପାଙ୍କ ଅସ୍ଥି ବିସର୍ଜନ କରିବା ସହିତ ମୁଣ୍ଡନ ହୋଇଛନ୍ତି। ଏଥିସହିତ ସେ ମହୋଦଧିରେ ଶ୍ରାଦ୍ଧ ମଧ୍ୟ ଦେଇଛନ୍ତି। ଏହି ସମୟରେ ତାଙ୍କର ମାଆ ଅପରାଜିତା ମହାନ୍ତି, ପତ୍ନୀ ତୃପ୍ତୀ ମହାନ୍ତି ମଧ୍ୟ ଉପସ୍ଥିତ ଥିଲେ। ପୂର୍ବରୁ ସେ ପ୍ରୟାଗରାଜରେ ମଧ୍ୟ ବାପାଙ୍କ ଅସ୍ଥି ବିସର୍ଜ୍ଜନ କରିଛନ୍ତି।
ଏହାକୁ ନେଇ ବାବୁଶାନ କହିଛନ୍ତି ଯେ, ଆଜି ବାପାଙ୍କର ସମସ୍ତ କାର୍ଯ୍ୟ ଶେଷ ହେଲା। ସେ ଆମକୁ ଆର୍ଶିବାଦ କରନ୍ତୁ। ତେବେ ତାଙ୍କର ପରଲୋକର ଏକ ବର୍ଷ ହୋଇ ନ ଥିବାରୁ ନିୟମ ଅନୁସାରେ ମୁଁ ଶ୍ରୀମନ୍ଦିର ଭିତରକୁ ଯାଇପାରୁ ନାହିଁ। ପୂର୍ବରୁ ସିନେମା କାମ ଶେଷ ହୋଇ ନ ଥିବାରୁ ଏଥିରେ ବିଳମ୍ବ ହେଲା। ବର୍ତ୍ତମାନ ଚଳଚିତ୍ର ସୁଟିଂ ଶେଷ ହୋଇ ଥିବାରୁ ଆଜି ବାପାଙ୍କ ବାକି ଥିବା କାମ ଶେଷ କଲି ବୋଲି ବାବୁଶାନ କହିଛନ୍ତି।
