ପୁରୀ (ଭିଓଭି): ଗାଁ ରେ ବିଦ୍ୟୁତ ସଂଯୋଗ ହେବାର ୪ ମାସ ନପୁରୁଣୁ ଗାଁକୁ ଆସିଥିବା ମୁଖ୍ୟ ବିଦ୍ୟୁତ୍ ଲାଇନର ୧୧ଟି ଖୁଣ୍ଟରୁ ତାରକୁ ଚୋରି କରିନେଲେ ଚୋର । ବିଦ୍ୟୁତ ବିଭାଗ ଜାଣିଲା, ହେଲେ ଆଉ ଲାଗି ପାରିଲା ନାହିଁ ଚୋରି ଯାଇଥିବା ତାର । ୧୯୯୧ ମସିହାରୁ ଆସି ୨୦୦୯ ମସିହା ହୋଇଗଲା । ଦୀର୍ଘ ୧୮ ବର୍ଷ ପରେ ଘରେ ପୁନର୍ବାର ଜଳିଲା ବିଦ୍ୟୁତ ବଲ । ହେଲେ ପ୍ରଥମ ବିଲ୍ରେ ବିଦ୍ୟୁତ ବିଭାଗ ଖାଉଟିଙ୍କ ଉପରେ ଲଦିଦେଲେ ଟ୩୧୦୦୦/- ଙ୍କାର ବକେୟା ବିଦ୍ୟୁତ୍ ବିଲ୍ । ତଳୁ ଉପର ପର୍ଯ୍ୟନ୍ତ ଏ ଅଫିସ୍ରୁ ସେ ଅଫିସ୍ ଦଉଡି ଦଉଡି ଶେଷରେ ୨୦୨୩ ମସିହାରେ ପୁରୀ ସ୍ଥାୟୀ ଲୋକ ଅଦାଲତରେ ହିତାଧିକାରୀଙ୍କୁ ମିଳିଛି ନ୍ୟାୟ! ବକେୟା ବିଦ୍ୟୁତ ବିଲ୍କୁ କାଟି ତୁରନ୍ତ ବିଦ୍ୟୁତ୍ ବିଲ୍ ସଂସୋଧନ କରିବାକୁ ଆଦେଶ ଦେଇଛନ୍ତି ମାନ୍ୟବର ଅଦାଲତ ।
ନିମାପଡ଼ା ଇଲେକ୍ଟ୍ରିକାଲ୍ ଡିଭିଜନ, ଗୋପ ସେକ୍ସନ ଅନ୍ତର୍ଗତ ବଡ଼ଗାଁ ଗ୍ରାମପଂଚାୟତର ଇଲାଜଙ୍ଗ ଗ୍ରାମକୁ ସଂଯୋଗ ହୋଇଥିବା ବିଦ୍ୟୁତ୍ ତାର ଚୋରୀ ହୋଇଯିବା ପରେ ଗ୍ରାମକୁ ଆଉ ନୂତନ ତାର ଲଗାଯାଇ ନଥିଲା । ପରେ ଗାଁକୁ ନୂତନ ତାର ଲଗାଇ ବିଦ୍ୟୁତ୍ ସଂଯୋଗ ହେବା ପରେ ଗ୍ରାମର ସର୍ବେଶ୍ୱର ମହାରଥା ୨୦୦୯ ମସିହାରେ ନିଜ ଘରକୁ ବିଦ୍ୟୁତ ସଂଯୋଗ ନେଇଥିଲେ । କିନ୍ତୁ ପରବର୍ତ୍ତି ସମୟରେ ବିଗତ ୧୮ ବର୍ଷର ବକେୟା ବିଦ୍ୟୁତ୍ ବିଲ୍ ବାବଦରେ ଟ୩୫,୦୦୦/- ଟଙ୍କା ଦାବି କରି ତାଙ୍କ ଘରୁ ଲାଇନ୍ କାଟି ଦିଆଗଲା । ବାରମ୍ବାର ବିଦ୍ୟୁତ୍ ବିଭାଗର ଉପରିସ୍ଥ ଅଫିସର ମାନଙ୍କୁ ଜଣାଇବା ପରେ ବି କିଛି ସୁଫଳ ନ ମିଳିବାରୁ ପରବର୍ତ୍ତି ସମୟରେ ସେ ପୁରୀ ଜିଲ୍ଲା ଖାଉଟି ଅଦାଲତ ର ଦ୍ୱାରସ୍ଥ ହୋଇଥିଲେ । ମାନ୍ୟବର ଖାଉଟି ଅଦାଲତ ମକଦମା ବିଚାର କରି ବିଦ୍ୟୁତ୍ ବିଭାଗକୁ ଦାୟୀ କରି ମକଦ୍ଦମା ଖର୍ଚ୍ଚ ବାବଦକୁ ଟ.୫୦୦/-ଙ୍କା ସହ ଟ.୧୦୦୦/-ଙ୍କା ଜୋରିମାନା ଆଦେଶ କରିଥିଲେ । ଏଥିସହ ବିଦ୍ୟୁତ୍ ବିଲ୍ ସଂଶୋଧନ କରାଇ ବିଭାଗ ତରଫରୁ ଦାବି କରାଯାଉଥିବା ଅଧିକା ଟଙ୍କାକୁ ବିଲ୍ରୁ ବାଦ୍ ଦେଇଥିଲେ । ମାତ୍ର କିଛି ମାସ ଗଲା ପରେ ତାଙ୍କ ବିଲ୍ରେ ପୁଣି ହଠାତ୍ ୨୬,୪୩୦/- ଟଙ୍କା ଦାବି କରି ବାରମ୍ବାର ଘରୁ ଲାଇନ୍ କାଟି ଦେବାକୁ ଧମକ ଦେବା ଆରମ୍ଭ କରିଦେଲେ । ଫଳରେ ଅନନ୍ୟୋପାୟ ହୋଇ ହିତାଧିକାରୀ ଜଣକ ପୁରୀ ଜିଲ୍ଲା ସ୍ଥାୟୀ ଲୋକ ଅଦାଲତ(ପିଏଲଏ)ର ଆଶ୍ରୟ ନେଇଥିଲେ । ସ୍ଥାୟୀ ଲୋକ ଅଦାଲତର ମାନ୍ୟବର ବିଚାରପତି ତଥା ଚେୟାରମ୍ୟାନ ପ୍ରତିମା ପଣ୍ଡା ଏବଂ ସଦସ୍ୟ ପିଆର ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ଏହି ମକଦ୍ଦମାର ଶୁଣାଣି କରି ସର୍ବେଶ୍ୱର ମହାରଥାଙ୍କ ବିଦ୍ୟୁତ୍ ବିଲ୍ରୁ ତୁରନ୍ତ ୨୬,୪୩୦/-ଟଙ୍କା ବାଦ୍ ଦେବାକୁ ଆଦେଶ ଦେବା ସହ ବିଲ୍ରେ ଆଉ ପୂର୍ବ ଟଙ୍କା ଦାବି ନ କରିବାକୁ କଡା ଚେତାବନୀ ଦେଇଛନ୍ତି ।
ଏ ସମ୍ପର୍କରେ ୭୫ ବର୍ଷ ବୟସ୍କ ସର୍ବେଶ୍ୱର କୁହନ୍ତି, “ମୁଁ ବୃଦ୍ଧ ଲୋକ, ବାରମ୍ବାର ଅଦାଲତକୁ ଦଉଡିବା ମୋ ପକ୍ଷରେ ସମ୍ଭବପର ନଥିଲା । କିନ୍ତୁ ବିଳମ୍ବ ହେଉ ପଛେ, ମାନ୍ୟବର ପୁରୀ ଜିଲ୍ଲା ସ୍ଥାୟୀ ଲୋକ ଅଦାଲତର ଦ୍ୱାରସ୍ଥ ହୋଇ ମୁଁ ଏବଂ ମୋ ପରିବାର ଉଚିତ୍ ନ୍ୟାୟ ପାଇଛନ୍ତି” । ହିତାଧିକାରୀଙ୍କ ତରଫରୁ ପୁରୀ ବାର୍ ଆସୋସିଏସନର ବରିଷ୍ଠ ଓକିଲ ଶ୍ରୀ ନୃସିଂହ ଚରଣ ମହାନ୍ତି ମାମଲା ପରିଚାଳନା କରୁଥିଲେ ।
ରଶ୍ମୀରଞ୍ଜନ ମହାରଥା
ଜିଲ୍ଲା ପ୍ରତିନିଧି, ପୁରୀ
