ନୂଆଦିଲ୍ଲୀ: ପୁଣି ଅଳ୍ପକେ ଟଳିଲା ବିମାନ ଅଘଟଣ । ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦରରେ କୋଚିରୁ ଆସୁଥିବା ଏୟାର ଇଣ୍ଡିଆର ଏକ ବିମାନ ଅବତରଣ କରିବା ସମୟରେ ରନୱେରୁ ଖସି ଯାଇଥିଲା । ପ୍ରବଳ ବର୍ଷା ଯୋଗୁଁ ବିମାନଟି ଅବତରଣ ସମୟରେ ରନୱେ ଠାରୁ ଆଗକୁ ଚାଲିଯାଇଥିଲା ।
ଖବର ମୁତାବକ, ଆଜି ସକାଳ ପ୍ରାୟ ୯.୨୭ ମିନିଟରେ.ବିମାନ AI-2744, ଏକ ଏୟାରବସ୍ A320 (VT-TYA) ରନୱେ ୨୭ ରେ ଅବତରଣ କରିଥିଲା । କିନ୍ତୁ ପ୍ରବଳ ବର୍ଷା ଯୋଗୁଁ ବିମାନଟି ରନୱେରେ ନ ଅଟକି ଆଗକୁ ଚାଲିଯାଇଥିଲା । ହେଲେ କିଛି ଅଘଟଣ ହେବା ଆଗରୁ ବିମାନକୁ ସଠିକ୍ ସମୟରେ ରୋକିପାରିଥିଲେ ପାଇଲଟ । ଏହାପରେ ସମସ୍ତ ଯାତ୍ରୀ ଏବଂ କର୍ମଚାରୀ ସୁରକ୍ଷିତ ଭାବରେ ଓହ୍ଲାଇଥିଲେ ।
ଏୟାର ଇଣ୍ଡିଆର ଜଣେ ମୁଖପାତ୍ର କହିଛନ୍ତି, “୨୧ ଜୁଲାଇ ୨୦୨୫ରେ କୋଚିରୁ ମୁମ୍ବାଇ ଅଭିମୁଖେ ଯାତ୍ରା କରୁଥିବା ବିମାନ AI2744, ଅବତରଣ ସମୟରେ ପ୍ରବଳ ବର୍ଷା ହେଉଥିଲା । ଫଳରେ ବିମାନଟି ଅବତରଣ କରିବା ସମୟରେ ରନୱେରୁ ଆଗକୁ ଚାଲିଯାଇଥିଲା । ଏହାପରେ ବିମାନଟି ସୁରକ୍ଷିତ ଭାବରେ ଗେଟ୍ ପାଖରେ ପହଞ୍ଚିଥିଲା ଏବଂ ସମସ୍ତ ଯାତ୍ରୀ ଏବଂ କ୍ରୁ ସଦସ୍ୟମାନେ ସେଠାରୁ ଓହ୍ଲାଇଥିଲେ । ଯାଞ୍ଚ ପାଇଁ ବିମାନକୁ ଗ୍ରାଉଣ୍ଡେଡ୍ କରାଯାଇଛି ।
ଏହି ଘଟଣା ପରେ, ବିମାନବନ୍ଦରର ମୁଖ୍ୟ ରନୱେକୁ ଯାଞ୍ଚ ଏବଂ ମରାମତି ପାଇଁ ବନ୍ଦ କରିଦିଆଯାଇଥିଲା । ରନୱେ ପୃଷ୍ଠରେ ସାମାନ୍ୟ କ୍ଷତି ହୋଇଥିବା ରିପୋର୍ଟ କରାଯାଇଥିଲା ।
