ବାଲେଶ୍ୱର ( ଭିଓଭି ) ୦୭/୦୩ – ଆଜି ରେମୁଣାର ଐତିହାସିକ, ପୌରାଣିକ ଓ କିମ୍ବଦନ୍ତୀ ଯୁକ୍ତ ବିଭିନ୍ନ ପୀଠସ୍ଥଳୀକୁ ନେଇ ପର୍ଯ୍ୟଟନ ବଳୟ ଗଠନ ନିମନ୍ତେ ପର୍ଯ୍ୟଟନ କୋରିଡୋର ପାଇଁ କିଛି ପ୍ରମୁଖ ପୀଠସ୍ଥଳୀ ଯଥା ତ୍ରିବେଣୀ, ସପ୍ତସରା, କ୍ଷୀରଚୋରା ଗୋପୀନାଥ ମନ୍ଦିର, ବ୍ରଜପୋଖରୀ, କନକଦୁର୍ଗା ମନ୍ଦିର, ଶ୍ରୀଧରସ୍ୱାମୀ ପୀଠ, କଙ୍କାଳୀମଠ, ଦୁର୍ଗାଦେବୀ ମନ୍ଦିର, ଭୀମେଶ୍ୱର ମନ୍ଦିର ଓ ଇମାମି ଜଗନ୍ନାଥ ମନ୍ଦିର ଭଳି ପବିତ୍ର ସ୍ଥାନଗୁଡ଼ିକୁ ଅବଲୋକନ କରାଗଲା।
ରେମୁଣା ଅଞ୍ଚଳର ଏହି ସମସ୍ତ ପବିତ୍ର ଓ ଐତିହାସିକ ସ୍ଥାନଗୁଡ଼ିକୁ ଏକ ପର୍ଯ୍ୟଟନ ବଳୟ ମାଧ୍ୟମରେ ସଂଯୋଗ କରି ପର୍ଯ୍ୟଟନ ମାନଚିତ୍ରରେ ଆଗକୁ ଆଣିବା ସହିତ ଅଞ୍ଚଳର ସାଂସ୍କୃତିକ ଐତିହ୍ୟକୁ ଅଧିକ ପ୍ରଚାର ଓ ପ୍ରସାର କରିବା ଆମ ସମସ୍ତଙ୍କର ଲକ୍ଷ୍ୟ । ଏହା ଦ୍ୱାରା ଅଞ୍ଚଳର ପର୍ଯ୍ୟଟନ ବିକାଶ ସହ ଅର୍ଥନୈତିକ ଉନ୍ନତିର ନୂତନ ଦିଗ ଖୋଲିବ। ଯାହାଦ୍ବାରା ଏହି ପବିତ୍ର ପୀଠସ୍ଥଳୀମାନଙ୍କର ସମୃଦ୍ଧ ଐତିହ୍ୟ ଓ ଧାର୍ମିକ ମହତ୍ତ୍ୱ ଆଗାମୀ ଦିନରେ ଅଧିକ ଲୋକଙ୍କୁ ଆକର୍ଷିତ କରିବ ।
ଏହି ଅବସରରେ ବାଲେଶ୍ଵରର ମାନ୍ୟବର ସାଂସଦ ଶ୍ରୀଯୁକ୍ତ ପ୍ରତାପ ଚନ୍ଦ୍ର ଷଡ଼ଙ୍ଗୀ , ସରକାରୀ ଉପମୁଖ୍ୟ ସଚେତକ ତଥା ରେମୁଣା ବିଧାୟକ ଶ୍ରୀଯୁକ୍ତ ଗୋବିନ୍ଦ ଚନ୍ଦ୍ର ଦାସ , ଜିଲ୍ଲାପାଳ ବାଲେଶ୍ଵର ଶ୍ରୀ ସୂର୍ଯ୍ୟବଂଶୀ ମୟୂର ବିକାଶ, ଏବଂ ସମସ୍ତ ବିଭାଗୀୟ ଅଧିକାରୀଙ୍କ ସହ ରେମୁଣା ଅଞ୍ଚଳର ବୁଦ୍ଧିଜୀବୀ ତଥା ବରିଷ୍ଠ ବ୍ୟକ୍ତିମାନେ ପରିଦର୍ଶନ ରେ ଉପସ୍ଥିତ ଥିଲେ ।
