କଟକ: ସେକେଣ୍ଡାରୀ ବୋର୍ଡ ହାଇ ସ୍କୁଲରପୁରୁଣା ଦିନମାନଙ୍କରେ କୌଣସି ଦିନ ଶ୍ରେଣୀରେ ପୂର୍ଣ୍ଣ ଉପସ୍ଥାନ ହେଲେ ଶ୍ରେଣୀ ସମ୍ମୁଖରେ ମେରୁନ ବା ନାଲି ରଙ୍ଗର ପତକା ଉଡାଇବାର ଏକ ସୁନ୍ଦର ପରମ୍ପରା ଥିଲା। ସେହିପରି ସାତ ଦିନ ପୂର୍ଣ୍ଣ ଉପସ୍ଥାନ ହେଲେ ନୀଳ ପତାକା ଏବଂ ଏକମାସ ପୂର୍ଣ୍ଣ ଉପସ୍ଥାନ ହେଲେ ସବୁଜ ପତାକା ଉଡାଯାଉଥିଲା। କାଳକ୍ରମେ ସେ ସବୁ ପ୍ରଥା ଆଉ ଏବେ ଦେଖିବାକୁ ମିଳୁନଥିଲା। କିଛି ବର୍ଷ ହେଲା ପୂର୍ଣ୍ଣ ଉପସ୍ଥାନ ପାଇଁ ରଙ୍ଗୀନ ପତାକା ଉଡାଇବା ସମ୍ପୂର୍ଣ୍ଣ ବନ୍ଦ ହୋଇଗଲାଣି। ଆସନ୍ତା ଜାନୁଆରୀ ମାସରେ ହେବାକୁ ଥିଵା ହୀରକ ଜୟନ୍ତୀ ଉତ୍ସବ ପରିପ୍ରେକ୍ଷୀରେ ସେହି ପୁରୁଣା ଓ ସୁନ୍ଦର ପ୍ରଥା ସବୁକୁ ପୁଣି ଥରେ ଆରମ୍ଭ କରିବା ପାଇଁ ୧୯୮୬ ବ୍ୟାଚ୍ ର ଛାତ୍ର-ଛାତ୍ରୀମାନେ ଉଦ୍ୟମ କରିଛନ୍ତି।
ସ୍କୁଲ ପ୍ରଧାନ ଶିକ୍ଷକ, ଶିକ୍ଷକ-ଶିକ୍ଷୟିତ୍ରୀ ଓ ପୁରାତନ ଛାତ୍ର ସଂସଦର ମିଳିତ ଉଦ୍ୟମରେ ଆଜି ପୁରୁଣା ପରମ୍ପରାକୁ ପୁଣି ଥରେ ଆରମ୍ଭ କରଯାଇଥିଲା। ଆଜିର ଏହି କାର୍ଯ୍ୟକ୍ରମକୁ ପ୍ରାକ୍ତନ ପ୍ରଧାନ ଶିକ୍ଷକ ଦୈତ୍ୟାରୀ ସାହୁ ପତାକା ଧରି ଆରମ୍ଭ କରିଥିଲେ। ଏହି ଅବସରରେ ପ୍ରଧାନ ଶିକ୍ଷକ ଅଶୋକ କୁମାର ଶତପଥୀ, ପୁରାତନ ଛାତ୍ର ସଂସଦ ସମ୍ପାଦକ ସୁବ୍ରତ ମହାନ୍ତି, କାର୍ଯ୍ୟକାରୀ କମିଟି ସଭ୍ୟ ମୋତିପ୍ରକଶ ରଥ, ୧୮୯୬ ବ୍ୟାଚ୍ ର ଛାତ୍ର-ଛାତ୍ରୀ, ବିଦ୍ୟାଳୟର ଶିକ୍ଷକ-ଶିକ୍ଷୟିତ୍ରୀ ପ୍ରମୁଖ ଉପସ୍ଥିତ ଥିଲେ। ଆସନ୍ତା ଜାନୁଆରୀ ମାସରୁ ଅନ୍ୟ ଏକ ବିଲୁପ୍ତ ପରମ୍ପରା ଆମ ଭାରତ ଯୋଜନା କୁ ଆରମ୍ଭ କରାଯିବ ବୋଲି ୧୯୮୬ ବ୍ୟାଚ୍ ତରଫରୁ ସ୍ଥିର କରାଯାଇଥିଲା।
