ଭୁବନେଶ୍ୱର: ଏମ୍ସ ମେଡିକାଲରେ ଡାକ୍ତର ଦେଖାଇବାକୁ ଯାଇ ଅସୁବିଧାର ସମ୍ମୁଖୀନ ହେଉଛନ୍ତି କି ? ଏମ୍ସର ମେଡିକାଲ ଫିସ କେତେ ଆଉ କେମିତି ପଞ୍ଜିକରଣ କରିବେ ଜାଣି ପାରୁନାହାନ୍ତି ? ଏସବୁ ସମସ୍ୟାର ସମାଧାନ ଏବେ ଚୁଟକିରେ ସମାଧାନ ହୋଇଯିବ । କେମିତି ଭାବୁଛନ୍ତି । ତେବେ ଚାଲନ୍ତୁ ଆମେ ଆପଣଙ୍କୁ ସମ୍ପୂର୍ଣ୍ଣ ପ୍ରକ୍ରିୟା ବିଷୟରେ କହିବୁ ।
ଦର୍ଶକବନ୍ଧୁ ଏମ୍ସ ହସ୍ପିଟାଲକୁ ସବୁ ରୋଗୀ ଯିବା ପାଇଁ ପସନ୍ଦ କରିଥାନ୍ତି କାରଣ ଏଠାରେ ସ୍ୱଳ୍ପ ମୂଲ୍ୟ ଏବଂ ଉନ୍ନତ ଧରଣର ଚିକିତ୍ସା ହୋଇଥାଏ । ଗରିବ ଠୁ ନେଇ ଧନୀ ବ୍ୟକ୍ତି ପର୍ଯ୍ୟନ୍ତ ସମସ୍ତେ ଏମ୍ସ ହସ୍ପିଟାଲର ସୁବିଧା ପାଇବାକୁ ଆଗ୍ରହୀ ଥିଲେ ମଧ୍ୟ ଏହାର ଡ଼ାକ୍ତରୀପ୍ରକ୍ରିୟା ସୁବିଧାରେ ପାଇ ପାରନ୍ତି ନାହିଁ କାରଣ ସେମାନେ କେଉଁଠିକୁ ଯାଇ ଟିକେଟ କାଟିବେ ଓ ଚିକିତ୍ସା ପାଇଁ ଆବଶ୍ୟକୀୟ ପରୀକ୍ଷା ଓ ପଦ୍ଧଜଟି ପାଇଁ କେଉଁଠିକୁ ଯିବେ ବାଟବଣା ହୋଇଯା’ନ୍ତି । ଏହା ପ୍ରାୟତଃ ଦୂର ଓ ମଫସଲ ଅଞ୍ଚଳରୁ ଆସିଥିବା ରୋଗୀମାନଙ୍କ କ୍ଷେତ୍ରରେ ଦେଖାଯାଇଥାଏ । ତେବେ ଆପଣମାନେ ଜାଣିଲେ ଖୁସି ହେବେ ଏମ୍ସ ବର୍ତ୍ତମାନ ଏକ ଅନଲାଇନ୍ ଟିକେଟ ବୁକିଂ ବ୍ୟବସ୍ଥା ଆରମ୍ଭ କରିଛି । ଯାହା ସାହାଯ୍ୟରେ ଆପଣଙ୍କୁ ଆଉ ହସ୍ପିଟାଲରେ ଲମ୍ବା ଧାଡ଼ିରେ ଠିଆ ହେବାର ଆବଶ୍ୟକ ପଡ଼ିବନି । ଆପଣ ଏଥର ଘରେ ବସି ମଧ୍ୟ ପଞ୍ଜୀକରଣ କରିପାରିବେ ଏବଂ ଆପଣଙ୍କ ସମୟ ମଧ୍ୟ ବଞ୍ଚାଇପାରିବେ ।
ତେବେ ବର୍ତ୍ତମାନ ଚାଲନ୍ତୁ ଜାଣିବା ଏମ୍ସ ହସ୍ପିଟାଲରେ ଆପଣ ପଞ୍ଜିକରଣ ନମ୍ବର କିପରି କରିବେ ଓ ସୁବିଧାରେ ଚିକିତ୍ସା କିପରି ପାଇବେ ? ଦର୍ଶକବନ୍ଧୁ ଭାରତ ସରକାରଙ୍କ ଦ୍ୱାରା ପରିଚାଳିତ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ ଅର୍ଥାତ ଏମ୍ସ ଏକ ସୁଲଭ ଏବଂ ନିର୍ଭରଯୋଗ୍ୟ ପ୍ରତିଷ୍ଠାନ । ସାରା ଦେଶରେ 26 ଟି ଏମ୍ସ ହସ୍ପିଟାଲ ଅଛି ଯେଉଁଠାରେ ପ୍ରତିଦିନ ଲକ୍ଷ ଲକ୍ଷ ଲୋକ ଚିକିତ୍ସା ପାଇଁ ଯାଆନ୍ତି । ଏମ୍ସ ହସ୍ପିଟାଲଗୁଡ଼ିକରେ ବହୁ ସଂଖ୍ୟକ ରୋଗୀଙ୍କ ଭିଡ଼ ଥାଏ । ଅନେକ ଲୋକ ଏମ୍ସରେ ଚିକିତ୍ସା କିପରି କରିବେ କିମ୍ବା ପଞ୍ଜୀକରଣ କିପରି କରିବେ ତାହା ମଧ୍ୟ ଜାଣି ନଥାନ୍ତି । ଏହି କାରଣରୁ, ଅନେକ ଲୋକ ଏମ୍ସରେ ଚିକିତ୍ସା ସେବାରୁ ବଞ୍ଚିତ ହୋଇଥାନ୍ତି । ସ୍ପଷ୍ଟ ଭାବରେ କହିବାକୁ ଗଲେ, ଦିନକୁ ଦିନ ବଢ଼ୁଥିବା ଭିଡ଼ ଯୋଗୁଁ ରୋଗୀଟିର ଚିକିତ୍ସା ସେବା ପାଇବାରେ ସମସ୍ୟା ଉପୁଜିଥାଏ, ତେଣୁ ଏଥିପ୍ରତି ଗରୁତ୍ବ ଦେଇ ଏମ୍ସ ଏକ ଅନଲାଇନ୍ ପଞ୍ଜିକରଣ ବ୍ୟବସ୍ଥା ଆରମ୍ଭ କରିଛି । ଯାହା ସାହାଯ୍ୟରେ ଲୋକମାନେ ଘରେ ବସି ପଞ୍ଜୀକରଣ କରିପାରିବେ ଏବଂ ହସ୍ପିଟାଲରେ ଲମ୍ବା ଧାଡ଼ିରେ ଠିଆ ହେବାର ଆବଶ୍ୟକତା ନାହିଁ । ଆସନ୍ତୁ ଜାଣିବା ଏମ୍ସରେ ଅନଲାଇନ ଟିକେଟ ବୁକିଂ କରିବାର ସମ୍ପୂର୍ଣ୍ଣ ପ୍ରକ୍ରିୟା କ’ଣ ।
ରୋଗୀଙ୍କ ସୁବିଧା ପାଇଁ ଏମ୍ସ ଏହି ଓଆରଏସ ପୋର୍ଟାଲ୍ ତିଆରି କରିଛି । ଏଠାରେ ଆପଣ ସହଜରେ ପଞ୍ଜୀକରଣ କରିପାରିବେ, ଡାକ୍ତରଙ୍କ ସହିତ ପରାମର୍ଶ ପ୍ରକ୍ରିୟା ମଧ୍ୟ ସ୍ଥିର କରିପାରିବେ ଏବଂ ଆପଣଙ୍କର ମେଡିକାଲ୍ ରେକର୍ଡ ମଧ୍ୟ ଦେଖିପାରିବେ । ଏହି ସେବା ବିଶେଷ ଭାବରେ ସେମାନଙ୍କ ପାଇଁ ଲାଭଦାୟକ ଯେଉଁମାନେ ବାରମ୍ବାର ହସ୍ପିଟାଲକୁ ଆସିବାକୁ ଚାହାଁନ୍ତି ନାହିଁ ଏବଂ ସମଗ୍ର ପ୍ରକ୍ରିୟା ପୂର୍ବରୁ ନିଷ୍ପତ୍ତି ନେବାକୁ ଚାହାଁନ୍ତି । ସର୍ବପ୍ରଥମେ, ଆପଣଙ୍କୁ ଏହି ପୋର୍ଟାଲ୍ ମାଧ୍ୟମରେ ଏମ୍ସ ଓପିଡ଼ି ସେବାକୁ ବୁକ୍ କରିବାକୁ ପଡିବ ।
ଦର୍ଶକବନ୍ଧୁ ଏମ୍ସ ହସ୍ପିଟାଲରେ ଚାରି ପ୍ରକାରର ପଞ୍ଜିକରଣ ସେବା ଅଛି, ଯାହାକୁ ଆପଣ ଅନଲାଇନ କିମ୍ବା ଅଫଲାଇନରେ ବୁକ୍ କରିପାରିବେ । ପ୍ରଥମଟି ହେଉଛି ଓପିଡ଼ି ପଞ୍ଜିକରଣ – ଏହା ସବୁଠାରୁ ସାଧାରଣ ପଦ୍ଧତି, ଯେତେବେଳେ ରୋଗୀମାନେ ଏକ ନୂତନ କିମ୍ବା ପୁରୁଣା ରୋଗ ପାଇଁ ଡାକ୍ତରଙ୍କୁ ଦେଖା କରିବାକୁ ଚାହାଁନ୍ତି । ଦ୍ୱିତୀୟଟି ହେଉଛି ସ୍ପେଶାଲିଟି କ୍ଲିନିକ୍ ସେବା – ଏଥିରେ, ରୋଗୀମାନେ ହୃଦରୋଗ, ନ୍ୟୁରୋଲୋଜି କିମ୍ବା କର୍କଟ ରୋଗ ସହିତ ଜଡିତ ଡାକ୍ତର ଭଳି ବିଶେଷଜ୍ଞ ଡାକ୍ତରଙ୍କୁ ଭେଟନ୍ତି । ତୃତୀୟରେ ଫଲୋ-ଅପ୍ ସେବା- ଯେଉଁ ରୋଗୀମାନେ ଏମ୍ସରେ ପୂର୍ବରୁ ଡାକ୍ତରଙ୍କୁ ଦେଖା କରିସାରିଛନ୍ତି ସେମାନେ ଡାକ୍ତରୀ ପରୀକ୍ଷା କିମ୍ବା ଚିକିତ୍ସା ପ୍ରକ୍ରିୟା ଦେଖିବା ପାଇଁ ପୁଣି ଏହି ପଦ୍ଧତି ଲୋଡ଼ିଥାନ୍ତି । ଅନ୍ୟଟି ହେଲା ଜରୁରୀକାଳୀନ ସେବା – ଏହି ସେବା ତୁରନ୍ତ ଏବଂ ଆବଶ୍ୟକୀୟ ଚିକିତ୍ସା ପାଇଁ । ଜରୁରୀକାଳୀନ ସେବା ଅନଲାଇନରେ ବୁକ୍ କରାଯାଇପାରିବ ନାହିଁ । ଏପରି ପରିସ୍ଥିତିରେ, ରୋଗୀଙ୍କୁ ସିଧାସଳଖ ଜରୁରୀକାଳୀନ କେନ୍ଦ୍ରକୁ ଯିବାକୁ ପଡିବ, ଯେଉଁଠାରେ ତୁରନ୍ତ ଚିକିତ୍ସା ଉପଲବ୍ଧ ।
