ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୁଣିଥରେ ଲାଲକିଲ୍ଲାରେ ରେକର୍ଡ କରିଛନ୍ତି । ସବୁଠାରୁ ଲମ୍ବା ଭାଷଣ ଦେଇ ନିଜର ରେକର୍ଡ ଭାଙ୍ଗିଛନ୍ତି ମୋଦି । ଦେଶ ଆଜି ୭୯ତମ ସ୍ବାଧୀନତା ଦିବସ ପାଳନ କରୁଛି । ଏହି ଅବସରରେ ଦିଲ୍ଲୀର ଲାଲକିଲ୍ଲାରେ ୧୦୩ ମିନିଟ ଭାଷଣ ଦେଇ ରେକର୍ଡ କରିଛନ୍ତି ପ୍ରଧାନମନ୍ତ୍ରୀ । ଏହାପୂର୍ବରୁ ଗତବର୍ଷ ତାଙ୍କର ସବୁଠାରୁ ଲମ୍ବା ଭାଷଣ ୯୮ ମିନିଟର ରହିଥିଲା । କିନ୍ତୁ ଏବର୍ଷ ୧୦୩ ମିନିଟର ଭାଷଣ ଦେଇ ସମସ୍ତ ରେକର୍ଡ ଭାଙ୍ଗିଛନ୍ତି ମୋଦି ।
ପ୍ରଧାନମନ୍ତ୍ରୀ ମୋଦି ପ୍ରଧାନମନ୍ତ୍ରୀ ହେବାର ଏକବର୍ଷ ପରେ ୨୦୧୫ରେ ଲାଲକିଲ୍ଲାରୁ ସବୁଠାରୁ ଲମ୍ବା ଭାଷଣ ଦେବାର ରେକର୍ଡ କରିଥିଲେ । ୨୦୧୫ରେ ୮୮ ମିନିଟର ଭାଷଣ ଦେଇଥିଲେ । ଏହାସହିତ ସେ ପୂର୍ବ ପ୍ରଧାନମନ୍ତ୍ରୀ ଜବାହରଲାଲ ନେହରୁଙ୍କ ୭୨ ମିନିଟର ରେକର୍ଡକୁ ଭାଙ୍ଗିଥିଲେ । ଏହାପରେ ନିଜର ରେକର୍ଡକୁ ଅନେକ ଥର ଭାଙ୍ଗି ଚାଲିଛନ୍ତି । କିନ୍ତୁ ଏଥର ୧୦୩ ମିନିଟର ଭାଷଣ ଦେଇ ରେକର୍ଡ କରିଛନ୍ତି ।
ସେହିପରି ସବୁଠାରୁ ଛୋଟ ଭାଷଣ ରେକର୍ଡ ଜବାହରଲାଲ ନେହରୁ ଏବଂ ଇନ୍ଦିରା ଗାନ୍ଧିଙ୍କ ନାମରେ ରହିଛି । ଲାଲକିଲ୍ଲାରୁ ସବୁଠାରୁ ଛୋଟ ଭାଷଣ ଦେଇଥିଲେ । ମାତ୍ର ୧୪ ମିନିଟର ଭାଷଣ ଦେଇଥିଲେ । ଏହାପରେ ଅଟଳ ବିହାରୀ ବାଜପେୟୀ ୨୫ ମିନିଟର ଭାଷଣ, ମନମୋହନ ସିଂ ୩୨ ମିନିଟର ସବୁଠାରୁ ଛୋଟ ଭାଷଣ ଦେଇଥିଲେ । ଏହାପରେ ମୋଦି ୨୦୧୪ରେ ସବୁଠାରୁ ଛୋଟ ଭାଷଣ ୬୫ ମିନିଟର ଦେଇଥିଲେ ।
ପ୍ରଧାନମନ୍ତ୍ରୀ ଆଉ ଏକ ରେକର୍ଡ ମଧ୍ୟ କରିଛନ୍ତି । ଲାଲ କିଲ୍ଲାରେ ଲଗାତାର ୧୨ଥର ତ୍ରିରଙ୍ଗା ଉତ୍ତୋଳନ କରିଛନ୍ତି ମୋଦି । ଏହାପୂର୍ବରୁ ଜବାହରଲାଲ ନେହରୁ ଏଭଳି କରିଛନ୍ତି । ନେହରୁ ଲଗାତାର ୧୭ ଥର ଲାଲକିଲ୍ଲାରେ ତ୍ରିରଙ୍ଗା ଉତ୍ତୋଳନ କରିଛନ୍ତି । ଇନ୍ଦିରା ଗାନ୍ଧିଙ୍କ ନାମରେ ୧୧ ଥର ତ୍ରିରଙ୍ଗା ଉତ୍ତୋଳନ କରିବାର ରେକର୍ଡ ରହିଥିଲା । ଯାହାକୁ ପ୍ରଧାନମନ୍ତ୍ରୀ ମୋଦି ଭାଙ୍ଗିଦେଇଛନ୍ତି ।
