ଶ୍ରୀହରିକୋଟା: ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ଗୁରୁବାର ୟୁରୋପୀୟ ମହାକାଶ ଏଜେନ୍ସି (ESA)ର ‘ପ୍ରୋବା-୩’ ମିଶନକୁ ସଫଳତାପୂର୍ବକ ଲଞ୍ଚ୍ କରିଛି । ଆନ୍ଧ୍ର ପ୍ରଦେଶର ଶ୍ରୀହରିକୋଟାରୁ PSLV-C59/PROBA-3କୁ ଆଜି ମହାକାଶକୁ ପଠାଯାଇଛି । ଏହି ମିଶନକୁ ବୈଷୟିକ ତ୍ରୁଟି କାରଣରୁ ଗତକାଲି ସ୍ଥଗିତ ରଖାଯାଇଥିଲା । ଆଜି ୪ଟା ୪ ମିନିଟରେ ଏହାକୁ ଲଞ୍ଚ୍ କରାଯାଇଛି । PROBA-3 ହେଉଛି ୟୁରୋପୀୟ ସ୍ପେସ୍ ଏଜେନ୍ସି (ESA)ର ଏକ ମିଶନ୍ । PROBA-3 ମିଶନ୍ ସୂର୍ଯ୍ୟଙ୍କ କରୋନା ଅଧ୍ୟୟନ କରିବ । ESA ମୁତାବକ, ଏହି ମିଶନ୍ ସୂର୍ଯ୍ୟଙ୍କ ବାୟୁମଣ୍ଡଳର ବାହ୍ୟ ଏବଂ ଉତ୍ତପ୍ତ ସ୍ତରକୁ ଅଧ୍ୟୟନ କରିବ । ସୂର୍ଯ୍ୟଙ୍କ ବାହ୍ୟ ବାୟୁ ମଣ୍ଡଳକୁ ସୂର୍ଯ୍ୟଙ୍କ କରୋନା କୁହାଯାଏ । ଏହି ମିଶନରେ ISRO ର ବାଣିଜ୍ୟିକ ଶାଖା ନ୍ୟୁ ସ୍ପେସ୍ ଇଣ୍ଡିଆ ଲିମିଟେଡ୍ (NSIL) ସହଯୋଗ କରୁଛି । ISRO ଏହା ପୂର୍ବରୁ ଦୁଇଟି ପ୍ରୋବା ମିଶନ୍ ଲଞ୍ଚ୍ କରି ସାରିଛି । ୨୦୦୧ରେ ପ୍ରଥମ PROBA-1 ଲଞ୍ଚ୍ କରାଯାଇଥିଲା । ୨୦୦୯ରେ ଦ୍ୱିତୀୟ PROBA-2 ମିଶନ୍ ଲଞ୍ଚ୍ ହୋଇଥିଲା । ଉଭୟ ମିଶନରେ ଇସ୍ରୋକୁ ସଫଳତା ମିଳିଥିଲା । ‘PROBA-3’ ମିଶନ୍ ଦୁଇଟି ମୁଖ୍ୟ ମହାକାଶ ଯାନରୁ ଉତକ୍ଷେପଣ ହେବ । ପ୍ରଥମଟି ହେଉଛି ଅକଲ୍ଟର୍, ଯାହାର ଓଜନ ୨୦୦ କିଲୋଗ୍ରାମ । ଅନ୍ୟଟି କରୋନାଗ୍ରାଫ୍, ଏହାର ଓଜନ ୩୪୦ କିଲୋଗ୍ରାମ । ଲଞ୍ଚିଂ ପରେ ଉଭୟ ସାଟେଲାଇଟ୍ ଅଲଗା ହୋଇଯିବ । ପରେ ସୋଲାର କରୋନାଗ୍ରାଫ୍ ଗଠନ ପାଇଁ ସେଗୁଡ଼ିକୁ ଏକ ସାଥୀରେ ପୋଜିସନ କରାଯିବ । ଏହି ମିଶନ ହେଉଛି ଅନେକ ୟୁରୋପୀୟ ଦେଶର ଏକ ସହଭାଗୀତା ପ୍ରକଳ୍ପ । ଏହି ଦେଶ ଗୁଡିକ ଗ୍ରୁପରେ ସ୍ପେନ୍, ପୋଲାଣ୍ଡ, ବେଲଜିୟମ, ଇଟାଲୀ ଓ ସ୍ୱିଜରଲାଣ୍ଡ ଅନ୍ତର୍ଭୁକ୍ତ । ମିଶନର ମୋଟ ମୂଲ୍ୟ ପାଖାପାଖି ୨୦୦ ମିଲିୟନ ୟୁରୋ ବୋଲି କୁହାଯାଉଛି । ‘PROBA-3’ ମିଶନ୍ ଦୁଇ ବର୍ଷ ଧରି ଚାଲିବ ।
‘PROBA-3’ ମିଶନ ଲଞ୍ଚ୍ କଲା ଇସ୍ରୋ, ସୂର୍ଯ୍ୟଙ୍କ ଉତ୍ତାପ ଉପରେ କରିବ ଅଧ୍ୟୟନ
