ନୂଆଦିଲ୍ଲୀ : ବିବାହର ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିବା ପରେ କୁଣ୍ଡଳୀ ମେଳକ ହେଉନାହିଁ କହି ବିବାହ ପାଇଁ ମନା କରିବା ଏକ ଅପରାଧ । ଶାରୀରିକ ସମ୍ପର୍କ ପରେ ଓଲଟିଲେ ହେବ ଜେଲ୍ । କୁଣ୍ଡଳୀ ମେଳକ ବାହାନା କରି ବିବାହ ମନା କରିବା ଅପରାଧ ବୋଲି କହିଛନ୍ତି ଦିଲ୍ଲୀ ହାଇକୋର୍ଟ ।
ଜଣେ ଯୁବକ ଏବଂ ଯୁବତୀ ଦୀର୍ଘ ବର୍ଷ ଧରି ପରସ୍ପରକୁ ଜାଣିଥିଲେ । ଯୁବକଜଣକ ବାରମ୍ବାର ତୁମକୁ ହିଁ ବିବାହ କରିବି” ବୋଲି ପ୍ରତିଶ୍ରୁତି ଦେଇଥିଲେ । ଏପରିକି ସେ କହିଥିଲେ ଯେ, “ଆମ ଦୁହିଁଙ୍କ କୁଣ୍ଡଳୀ ପୂରା ମେଳ ଖାଉଛି, କିଛି ଅସୁବିଧା ନାହିଁ । ଯୁବକଙ୍କ କଥାକୁ ବିଶ୍ୱାସ କରି ଯୁବତୀଜଣକ ତାଙ୍କ ସହ ଅନେକ ଥର ଶାରୀରିକ ସମ୍ପର୍କ ରଖିଥିଲେ। କିନ୍ତୁ ବିବାହ ସମୟ ଆସିଲା, ଯୁବକ ଜଣକ ହଠାତ୍ କହିଲେ, ଆମ କୁଣ୍ଡଳୀ ମେଳ ହେଉନାହିଁ । ମୋ ପରିବାର ଜ୍ୟୋତିଷ ଶାସ୍ତ୍ରକୁ ବହୁତ ମାନନ୍ତି, ତେଣୁ ମୁଁ ତୁମକୁ ବିବାହ କରିପାରିବି ନାହିଁ । ନିଜକୁ ପ୍ରତାରିତ ମନେକରି ଯୁବତୀଜଣକ ପୋଲିସର ଦ୍ୱାରସ୍ଥ ହୋଇଥିଲେ ।
ଦିଲ୍ଲୀ ହାଇକୋର୍ଟ ଉଭୟଙ୍କ ପୁରୁଣା ମେସେଜ୍ ଓ ଚାଟ୍ ଯାଞ୍ଚ କରିବା ପରେ ଦେଖିଲେ ଯେ, ଯୁବକ ଜଣକ ପୂର୍ବରୁ କୁଣ୍ଡଳୀ ଠିକ୍ ଅଛି ବୋଲି କହିଥିଲେ । ଏହା ଶୁଣି ବିଚାରପତି କହିଲେ, ଯଦି କୁଣ୍ଡଳୀ ମେଳକ ଆପଣଙ୍କ ପାଇଁ ଏତେ ଗୁରୁତ୍ୱପୂର୍ଣ୍ଣ ଥିଲା, ତେବେ ଶାରୀରିକ ସମ୍ପର୍କ ରଖିବା ପୂର୍ବରୁ ଆପଣ ଏହା ଯାଞ୍ଚ କରି ମନା କଲେ ନାହିଁ କାହିଁକି ? ଏତେ ବର୍ଷ ପରେ ‘କୁଣ୍ଡଳୀ ମେଳ ହେଉନି’ କହିବା କେବଳ ଦାୟିତ୍ୱରୁ ଖସିଯିବା ପାଇଁ ଏକ ମିଛ ବାହାନା ଭଳି ମନେହେଉଛି । କୋର୍ଟଙ୍କ କହିବା ଅନୁସାରେ, ଏହା ନୂତନ ଭାରତୀୟ ନ୍ୟାୟ ସଂହିତାର ଧାରା ୬୯ ଅନ୍ତର୍ଗତ ଏକ ଅପରାଧ । ଏହି ନିୟମ ଅନୁସାରେ, ଯଦି କେହି ବିବାହର ମିଥ୍ୟା ପ୍ରତିଶ୍ରୁତି ଦେଇ କିମ୍ବା ଛଳନା କରି କାହା ସହ ଶାରୀରିକ ସମ୍ପର୍କ ରଖିଲେ ୧୦ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ ହୋଇପାରେ ।
ଏହି ଆଧାରରେ କୋର୍ଟ ସେହି ଯୁବକଙ୍କୁ ଜାମିନ ଦେବାକୁ ମନା କରିଦେଇଛନ୍ତି । ସାଧାରଣ ବିବାହ କ୍ଷେତ୍ରରେ କୁଣ୍ଡଳୀ ମେଳକ ନ ହେବା ଏକ ଅଲଗା କଥା । କିନ୍ତୁ ଯଦି କେହି ଏହାକୁ ଅସ୍ତ୍ର କରି କାହାର ବିଶ୍ୱାସ ଭାଙ୍ଗନ୍ତି ଏବଂ ଶାରୀରିକ ସମ୍ପର୍କ ରଖିବା ପରେ ଧୋକା ଦିଅନ୍ତି, ତେବେ ଆଇନ ଏହାକୁ ଅପରାଧ ବୋଲି ବିଚାର କରିବ ।
