କଟକ: ଓଟିପିସିଏଲର ଅର୍ଥ ବିଭାଗ ପୂର୍ବତନ ନିର୍ଦ୍ଦେଶକ ସମୀର ସ୍ୱାଇଁଙ୍କ ସେବାକୁ କୌଣସି କାରଣ ଉଲ୍ଲେଖ ନକରି, “ତାଙ୍କର ସେବାର ଅବ୍ୟାହତତା ସଂସ୍ଥାର ହିତପ୍ରତି କ୍ଷତିକାରକ ହେବ” ବୋଲି କହି, ତାଙ୍କୁ ତରବରିଆ ଭାବରେ ସେବା ନିବୃତ କରାଯାଇଥିଲା। ଏହି ବିଷୟକୁ ଚ୍ୟାଲେଞ୍ଜ କରି ଶ୍ରୀ ସ୍ଵାଇଁ ଓଡିଶା ହାଇକୋର୍ଟର ଦ୍ଵାରସ୍ଥ ହୋଇଥିଲେ। ବିଚାର ଶେଷ ନହେବା ପର୍ଯ୍ଯନ୍ତ ହାଇକୋର୍ଟ ସେହି ଆଦେଶକୁ ସ୍ଥଗିତ କରି, ଶ୍ରୀ ସ୍ୱାଇଁଙ୍କୁ ଅର୍ଥ ବିଭାଗର ନିର୍ଦ୍ଦେଶକ ଭାବେ କାର୍ଯ୍ୟରତ ରହିବାକୁ ଅନୁମତି ଦେଇଥିଲେ।
ଏହା ମଧ୍ୟରେ, ଶ୍ରୀ ସ୍ୱାଇଁ ଉତ୍ତରପ୍ରଦେଶ ପାଓ୍ଵାର ଟ୍ରାନସମିଶନର ଅର୍ଥ ଭିଭାଗ ନିର୍ଦ୍ଦେଶକ ପଦବୀ ପାଇଁ ଚୟନିତ ହୋଇ ଓଟିପିସିଏଲରରୁ ପଦତ୍ୟାଗ କରି ନୂତନ କାର୍ଯ୍ୟରେ ଯୋଗଦେଇ କାର୍ଯ୍ୟ କରୁଅଛନ୍ତି। ଓଡ଼ିଶା ହାଇକୋର୍ଟ, “ତାଙ୍କର ସେବାର ଅବ୍ୟାହତତା ସଂସ୍ଥାର ହିତପ୍ରତି କ୍ଷତିକାରକ” ବୋଲି କମ୍ପାନୀ କରିଥିବା ମତାମତକୁ ରଦ୍ଦ କରିଛନ୍ତି, କାରଣ ଏହା ସପକ୍ଷରେ ସରକାରଙ୍କ ପକ୍ଷରୁ ପକ୍ଷରୁ କୌଣସି ଯୁକ୍ତିଯୁକ୍ତ ପ୍ରମାଣ ପ୍ରଦାନ କରା ଯାଇ ପାରିନଥିଲା।
ଯେହେତୁ ଶ୍ରୀ ସ୍ୱାଇଁ ଅନ୍ୟ ସଂସ୍ଥାରେ ଯୋଗ ଦେଇସାରିଛନ୍ତି ଓଟିପିସିଏଲରେ ପୁନଃନିଯୁକ୍ତିର ପ୍ରଶ୍ନ ଉଠୁନାହିଁ। କିନ୍ତୁ, ହାଇକୋର୍ଟ ରାଜ୍ୟ ସରକାରଙ୍କର ମତାମତକୁ ରଦ୍ଦ କରିବା ଦ୍ଵାରା ତାଙ୍କ କ୍ୟାରିୟର୍ ସହ ଯୋଡ଼ି ହୋଇଥିବା କଳଙ୍କ ଦୂର ହୋଇପାରିବ। ଶ୍ରୀ ସ୍ଵାଇଁଙ୍କ ପକ୍ଷରୁ ବରିଷ୍ଠ ଆଇନଜୀବୀ ଲକ୍ଷ୍ମୀଧର ପଙ୍ଗାରୀ ଓ ସ୍ଵପ୍ନକୁମାର ଓଝା ମାମଲା ପରିଚାଳନା କରୁଥିଲେ।
