ନୂଆଦିଲ୍ଲୀ: ଟିମ୍ ଇଣ୍ଡିଆର ଷ୍ଟାର କ୍ରିକେଟର ରିଷଭ ପନ୍ତ ମହାନତାର ପରିଚୟ ଦେଇଛନ୍ତି । ଭାରତ-ଇଂଲଣ୍ଡ ମଧ୍ୟରେ ଚାଲିଥିବା ଟେଷ୍ଟ ସିରିଜର ୪ର୍ଥ ମ୍ୟାଚରେ ନିକଟରେ ଭଙ୍ଗାପାଦରେ ବ୍ୟାଟିଂ କରିବାକୁ ଆସି ଖେଳ ପ୍ରତି ଆଗ୍ରହ ଦେଖାଇ ଫ୍ୟାନ୍ସଙ୍କ ମନ ଜିଣିନେଇଥିଲେ । ଏବେ କର୍ଣ୍ଣାଟକ ବାଗଲକୋଟ ଜିଲ୍ଲାର ଜଣେ ଛାତ୍ରୀଙ୍କ ଉଚ୍ଚଶିକ୍ଷା ପାଇଁ ସାହାଯ୍ୟର ହାତ ବଢ଼ାଇଛନ୍ତି ସମସ୍ତଙ୍କ ମନ ଜିଣିନେଇଛନ୍ତି । ଏହି ୱିକେଟକିପର-ବ୍ୟାଟର ଉଚ୍ଚଶିକ୍ଷା ପାଇଁ କର୍ଣ୍ଣାଟକର ଜଣେ ମେଧାବୀ ଛାତ୍ରୀଙ୍କୁ ୪୦ ହଜାର ଟଙ୍କାର ଆର୍ଥିକ ସହାୟତା ଦେଇଛନ୍ତି ।
କର୍ଣ୍ଣାଟକ ବାଗଲକୋଟ ଜିଲ୍ଲାର ତାଲୁକର ରାବକାଭି ଗାଁର ବାସିନ୍ଦା ଜ୍ୟୋତି କାନାବୁର ମଠ, ତାଙ୍କ ପ୍ରି-ୟୁନିଭର୍ସିଟି କୋର୍ସରେ (PUC) ୮୫% ନମ୍ବର ରଖିଥିଲେ । ହେଲେ ମଧ୍ୟ ଆର୍ଥିକ ସମସ୍ୟା ଯୋଗୁଁ ଉଚ୍ଚଶିକ୍ଷା ଲାଭ କରିବେ କି ନାହିଁ ତାହାକୁ ନେଇ ଦ୍ବନ୍ଦ୍ବରେ ଥିଲେ । ସେ ଜାମଖଣ୍ଡିର ବିଜାପୁର ଲିଙ୍ଗାୟତ ଶିକ୍ଷା ସଂସ୍ଥାନରେ ବ୍ୟାଚେଲର ଇନ୍ କମ୍ପ୍ୟୁଟର ଆପ୍ଲିକେସନ (BCA) ପାଠ୍ୟକ୍ରମରେ ଆଡମିସନ ପାଇଁ ଯୋଗ୍ୟତା ହାସଲ କରିଥିଲେ, କିନ୍ତୁ ତାଙ୍କ ବାପା ତୀର୍ଥୟା କାନାବୁର ମଠ କଲେଜ ଫିସ୍ ଦେବାକୁ ଅସମର୍ଥ ଥିଲେ । ବାପା ଏକ ଛୋଟ ଚା’ ଦୋକାନ କରି ନିଜ ପରିବାର ଭରଣପୋଷଣ କରୁଥିଲେ ।
ସାହାଯ୍ୟ ପାଇଁ ପରିବାର ଲୋକେ ଜଣେ ସ୍ଥାନୀୟ ବ୍ୟକ୍ତିଙ୍କ ନିକଟକୁ ଯାଇଥିଲେ । ଛାତ୍ରୀଙ୍କ ସହାୟତା ପାଇଁ ସମ୍ପୃକ୍ତ ବ୍ୟକ୍ତି ଜଣକ ବେଙ୍ଗାଲୁରୁରେ ଥିବା ତାଙ୍କର ସମ୍ପର୍କୀୟଙ୍କ ସହ ଯୋଗାଯୋଗ କରିଥିଲେ । ଆଉ ଏହି ସହାୟତା ଅନୁରୋଧ ରିଷଭ ପନ୍ତଙ୍କ ପାଖରେ ପହଞ୍ଚିଥିଲା ଏବଂ ସେ ତୁରନ୍ତ ଏଥିରେ ପ୍ରତିକ୍ରିୟା ପ୍ରକାଶ କରିଥିଲେ । ସେ ତୁରନ୍ତ ୪୦ ହଜାର ଟଙ୍କା ଫିସ୍ ସିଧାସଳଖ କଲେଜ ଆକାଉଣ୍ଟରେ ଜମା କରିଥିଲେ । ଯାହାଫଳରେ ଜ୍ୟୋତିଙ୍କ ଉଚ୍ଚଶିକ୍ଷା ଲାଭରେ କୌଣସି ଅସୁବିଧା ହେବନି । ଏହାକୁ ନେଇ କୃତଜ୍ଞତା ପ୍ରକାଶ କରିଛନ୍ତି ଜ୍ୟୋତି । ସେ ରିଷ ପନ୍ତ ଓ କଲେଜ କର୍ତ୍ତୃପକ୍ଷଙ୍କୁ ଏକ କୃତଜ୍ଞତାପୂର୍ଣ୍ଣ ଚିଠି ଲେଖିଛନ୍ତି । ଚିଠିରେ ଜ୍ୟୋତି କୃତଜ୍ଞତା ଜଣାଇବା ସହ ଭବିଷ୍ୟତରେ ଏଭଳି ସହାୟତାପୂର୍ଣ୍ଣ କାର୍ଯ୍ୟ କରିବାକୁ ଇଚ୍ଛା ପ୍ରକାଶ କରିଛନ୍ତି ।ଜ୍ୟୋତି କହିଛନ୍ତି, ମୁଁ ରିଷଭ ପନ୍ତଙ୍କୁ ଧନ୍ୟବାଦ ଜଣାଉଛି ଏବଂ ଭଗବାନଙ୍କ ନିକଟରେ ତାଙ୍କର ଉତ୍ତମ ସ୍ୱାସ୍ଥ୍ୟ କାମନା କରୁଛି । ମୁଁ ଅନୀଲ ଆନ୍ନା ଏବଂ ଅକ୍ଷୟ ନାୟକ ସାରଙ୍କୁ ମଧ୍ୟ କୃତଜ୍ଞତା ଜଣାଉଛି । ମୁଁ ସେମାନଙ୍କ ସାହାଯ୍ୟ କେବେବି ଭୁଲିବି ନାହିଁ ।”
ଜଣେ ସଫ୍ଟୱେୟାର ଇଞ୍ଜିନିୟର ହେବା ପରେ ଗରିବ ପିଲାମାନଙ୍କୁ ସାହାଯ୍ୟ କରିବେ ବୋଲି ଜ୍ୟୋତି କହିଛନ୍ତି । ମାଞ୍ଚେଷ୍ଟର ଟେଷ୍ଟରେ ଗୋଡ଼ରେ ଫାକ୍ଚର ହେବା ସତ୍ତ୍ବେ ଦଳକୁ ଦରକାର ଥିବା ସମୟରେ ବ୍ୟାଟିଂ କରିବାକୁ ଆସି ଅର୍ଦ୍ଧଶତକ କରିଥିଲେ ରିଷଭ ପନ୍ତ । ଯାହା ପାଇଁ ସମସ୍ତଙ୍କ ହୃଦୟରେ ଏକ ସ୍ବତନ୍ତ୍ର ସ୍ଥାନ ସୃଷ୍ଟି କରିଛନ୍ତି । ଆଉ ଏବେ ଛାତ୍ରୀଙ୍କୁ ଆର୍ଥିକ ସହଯୋଗ କରି ସେ ପୁଣି ନିଜ ମହାନତାର ପରିଚୟ ଦେଇଛନ୍ତି ।
