ନୂଆଦିଲ୍ଲୀ : ଫେବୃୟାରୀ ୧୪ ତାରିଖ ପର୍ଯ୍ୟନ୍ତ ଗିରଫ ହେବେନି ପୂଜା । ବହିଷ୍କୃତ ଆଇଏଏସ ଅଧିକାରୀ ପୂଜା ଖେଡକରଙ୍କ ଗିରଫଦାରୀ ଉପରେ ଅନ୍ତରୀଣ ରହିତାଦେଶ ଜାରି କରିଛନ୍ତି ସୁପ୍ରିମକୋର୍ଟ । ସିଭିଲ ସର୍ଭିସ ପରୀକ୍ଷାରେ ବେଆଇନ ଭାବେ ଅନ୍ୟ ପଛୁଆ ବର୍ଗ ଓ ଦିବ୍ୟାଙ୍ଗ କୋଟା ହାତେଇବା ଅଭିଯୋଗରେ ପୂଜାଙ୍କ ଆଗୁଆ ଜାମିନ ଆବେଦନକୁ ଦିଲ୍ଲୀ ହାଇକୋର୍ଟ ଖାରଜ କରିବା ପରେ ତାଙ୍କର ଗିରଫଦାରୀ ସମ୍ଭାବନା ବଢିଥିଲା । ପୂଜା ଖେଡକର ଏହି ମାମଲାରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଜଷ୍ଟିସ ବିଭି ନାଗରତ୍ନା ଓ ସତୀଶ ଚନ୍ଦ୍ର ଶର୍ମାଙ୍କ ଖଣ୍ଡପୀଠ ପୂଜାଙ୍କ ଗିରଫଦାରୀ ଉପରେ ଅନ୍ତରୀଣ ରହିତାଦେଶ ଜାରି କରିବା ସହ କେନ୍ଦ୍ର ଲୋକସେବା ଆୟୋଗ ଓ ଦିଲ୍ଲୀ ସରକାରଙ୍କୁ ନୋଟିସ ଜାରି କରିଛନ୍ତି । ଫେବୃୟାରୀ ୧୪ ତାରିଖ ସୁଦ୍ଧା ଖେଡକରଙ୍କ ଜାମିନ ଆବେଦନ ନେଇ କେନ୍ଦ୍ର ଲୋକସେବା ଆୟୋଗ ଓ ଦିଲ୍ଲୀ ସରକାର ଜବାବ ଦେବେ । ୨୦୨୨ ମସିହା ସିଭିଲ ସର୍ଭିସ ପରୀକ୍ଷାରେ ମିଥ୍ୟା ତଥ୍ୟ ଦେବା ଅଭିଯୋଗରେ କେନ୍ଦ୍ର ଲୋକସେବା ଆୟୋଗ ଆଇଏଏସ ଅଧିକାରୀ ଭାବେ ପୂଜା ଖେଡକରଙ୍କ ଚୟନକୁ ରଦ୍ଦ କରିବା ସହ ଭବିଷ୍ୟତରେ ସିଭିଲ ସର୍ଭିସ ପରୀକ୍ଷା ଦେବାରୁ ବାରଣ କରିଥିଲେ । ଏହାସହିତ କେନ୍ଦ୍ର ଲୋକସେବା ଆୟୋଗ ପୂଜା ଖେଡକରଙ୍କ ବିରୋଧରେ ଦିଲ୍ଲୀ ପୋଲିସ ନିକଟରେ ଅପରାଧ ମାମଲା ରୁଜୁ କରିଥିଲେ । ପୂର୍ବରୁ ଏହି ମାମଲାରେ ଗିରଫଦାରୀ ଏଡାଇବା ପାଇଁ ପୂଜା ଖେଡକର ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ଦିଲ୍ଲୀ ହାଇକୋର୍ଟ ତାଙ୍କ ଆଗୁଆ ଜାମିନ ଆବେଦନକୁ ଖାରଜ କରିବା ପରେ ପୂଜା ଖେଡକର ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ।
ପୂଜା ଖେଡକରଙ୍କୁ ଆଶ୍ବସ୍ତି, ଗିରଫଦାରୀ ଉପରେ ସୁପ୍ରିମକୋର୍ଟଙ୍କ ଅନ୍ତରୀଣ ରହିତାଦେଶ
