ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ‘‘ମନ୍ କି ବାତ୍” କାର୍ଯ୍ୟକ୍ରମ ସାରା ଦେଶରେ ଘଟୁଥିବା ସକାରାତ୍ମକ ପରିବର୍ତ୍ତନକୁ ପ୍ରଦର୍ଶିତ କରିବା ଏବଂ ଭାରତର ବିକାଶ ଯାତ୍ରାରେ ସକ୍ରିୟ ଭାବେ ଅଂଶଗ୍ରହଣ କରିବା ଲାଗି ନାଗରିକମାନଙ୍କୁ ଉତ୍ସାହିତ କରିବା ପାଇଁ ଏକ ଅନନ୍ୟ ମଞ୍ଚ ଭାବେ କାର୍ଯ୍ୟ କରିଥାଏ।ଏହି ମାସିକ ରେଡିଓ ଏପିସୋଡ୍ ମାଧ୍ୟମରେ ପ୍ରଧାନମନ୍ତ୍ରୀ ଶିକ୍ଷା, ସ୍ୱାସ୍ଥ୍ୟ, ପରିବେଶ, ନବସୃଜନ ଏବଂ ସମାଜ ସେବା ଭଳି କ୍ଷେତ୍ରରେ ପ୍ରଭାବଶାଳୀ କାର୍ଯ୍ୟ କରୁଥିବା ଭାରତୀୟଙ୍କ ପ୍ରେରଣାଦାୟୀ କାହାଣୀ ସେୟାର କରନ୍ତି।
ସେ ଯୁବକ, କୃଷକ, ମହିଳା, କାରିଗର, ଉଦ୍ୟୋଗୀ, କ୍ରୀଡ଼ାବିତ୍ ଏବଂ ସ୍ୱୟଂ ସହାୟକ ଗୋଷ୍ଠୀ ଦ୍ୱାରା ପରିଚାଳିତ ତୃଣମୂଳ ସ୍ତରର ପଦକ୍ଷେପ ଏବଂ ଗୋଷ୍ଠୀ ନେତୃତ୍ୱାଧୀନ ପ୍ରୟାସ ଉପରେ ଆଲୋକପାତ କରିଥିଲେ।
ଏହି କାହାଣୀଗୁଡ଼ିକ ପ୍ରାୟତଃ ଦୁର୍ଗମ ଏବଂ ବିବିଧ ଅଞ୍ଚଳରୁ ଆସିଥାଏ, ଯାହା ରାଷ୍ଟ୍ରର ସମୃଦ୍ଧ ଏବଂ ସମାବେଶୀ ଭାବନାକୁ ପ୍ରତିଫଳିତ କରିଥାଏ। ‘‘ମନ୍ କି ବାତ୍” ମଧ୍ୟ ଦେଶର ମାଇଲଖୁଣ୍ଟ ଏବଂ ଇତିହାସର ଅନାଲୋଚିତ ନାୟକମାନଙ୍କ ଅବଦାନ ପ୍ରତି ଧ୍ୟାନ ଆକର୍ଷଣ କରିଥାଏ। ସମୟ ସହିତ, ‘ମନ୍ କି ବାତ୍’ ରାଷ୍ଟ୍ର ନିର୍ମାଣର ଏକ ଉପକରଣରେ ବିକଶିତ ହୋଇଛି, ଯାହା ଭାରତର ବିବିଧତା, ନମନୀୟତା ଏବଂ ସାମାଜିକ ପ୍ରତିବଦ୍ଧତାକୁ ପାଳନ କରୁଥିବା କାହାଣୀ ମାଧ୍ୟମରେ ଜନସାଧାରଣଙ୍କ ଆଲୋଚନାକୁ ରୂପ ଦେଇଛି।
‘‘ମନ୍ କି ବାତ୍” କାର୍ଯ୍ୟକ୍ରମ ଆକାଶବାଣୀ ଦ୍ୱାରା ପ୍ରସ୍ତୁତ ହୋଇଛି, ଯେଉଁଥିରେ କୌଣସି ଅତିରିକ୍ତ ଖର୍ଚ୍ଚ ନକରି ବିଦ୍ୟମାନ ଆଭ୍ୟନ୍ତରୀଣ ସମ୍ବଳର ଲାଭ ଉଠାଯାଇଛି ଏବଂ ଏହା ଆରମ୍ଭ ହେବା ଦିନଠାରୁ ଏହା କୋଟି କୋଟି ଟଙ୍କାର ରାଜସ୍ୱ ଅର୍ଜନ କରିଛି। ଏ ପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କ ‘‘ମନ୍ କି ବାତ୍ ” ରୁ ୩୪.୧୩ କୋଟି ଟଙ୍କାରୁ ଅଧିକ ରାଜସ୍ୱ ଆୟ ହୋଇଛି।
ଦର୍ଶକଙ୍କ ଏକ ବଡ଼ ଅଂଶ ଆକାଶବାଣୀ (ଅଲ ଇଣ୍ଡିଆ ରେଡିଓ) ରେ କାର୍ଯ୍ୟକ୍ରମ ଶୁଣିଥାନ୍ତି, ଯାହା ଏହାର ଜାତୀୟ ଏବଂ ଆଞ୍ଚଳିକ ନେଟୱାର୍କରେ ସିଧାସଳଖ ପ୍ରସାରଣ କରେ । ସ୍ଥାନୀୟ ଭାଷା ଦର୍ଶକଙ୍କ ନିକଟରେ ପହଞ୍ଚିବା ପାଇଁ ଆଞ୍ଚଳିକ ଭାଷା ସଂସ୍କରଣ ମଧ୍ୟ ପ୍ରସାରିତ ହୁଏ ।
