ଭୁବନେଶ୍ବର: ବିଶ୍ୱପ୍ରସିଦ୍ଧ ଭିତରକନିକା ଜାତୀୟ ଉଦ୍ୟାନରେ କୁମ୍ଭୀର ଗଣନା ଶେଷ ହୋଇଛି। ମୋଟ ୧୮୨୬ଟି କୁମ୍ଭୀର ଥିବା ଜଣାପଡ଼ିଛି। ଗତବର୍ଷ ଅପେକ୍ଷା ଚଳିତବର୍ଷ କୁମ୍ଭୀର ସଂଖ୍ୟରେ ୧୫ ବୃଦ୍ଧି ଘଟିଛି । ରାଜନଗର ବନଖଣ୍ଡର କନିକା, ରାଜନଗର, ମହାକାଳପଡ଼ା ଓ ଗହୀରମଥା ରେଞ୍ଜ୍ରେ କୁମ୍ଭୀର ଗଣନା କରାଯାଇଛି। ଜାତୀୟ ଉଦ୍ୟାନ ତଥା ରାଜନଗର ବନଖଣ୍ଡରେ ଥିବା ୬୧ଟି ନଦୀ, ନାଳ ଓ ମୁହାଁଣରେ ୨୨ଟି ଦଳ ଜାନୁୟାରୀ ମାସ ୧୯ତାରିଖରୁ ୨୨ତାରିଖ ପର୍ଯ୍ୟନ୍ତ ତିନିଦିନ ଧରି କୁମ୍ଭୀର ଗଣନା କରିଥିଲେ। ଏହି କୁମ୍ଭୀର ଗଣନାକୁ ଦୃଷ୍ଟିରେ ରଖି ଦେଶବିଦେଶର ପର୍ଯ୍ୟଟକଙ୍କ ପାଇଁ ଜାନୁୟାରୀ ୧୪ରୁ ୨୨ ତାରିଖ ପର୍ଯ୍ୟନ୍ତ ଭିତରକନିକା ଜାତୀୟ ଉଦ୍ୟାନକୁ ବନ୍ଦ କରାଯାଇଥିଲା। ବନଖଣ୍ଡ ଅଧିକାରୀ ସୁଦର୍ଶନ ଗୋପୀନାଥ ଯାଦବ, ଭାରତର ବିଶିଷ୍ଟ ପ୍ରାଣୀବିଜ୍ଞାନୀ ତଥା କୁମ୍ଭୀର ବିଶାରଦ ଡ. ସୁଧାକର କର ଓ ପ୍ରାଣୀ ବିଜ୍ଞାନୀ ଡ. ଶିବପ୍ରସାଦ ପରିଡା, ଡିସିଏଫ୍ ସମ୍ୟକ ସାମନ୍ତରା, ଏସିଏଫ୍ ପୁନମହୀରା ହାଂସଦା, ଗଗନବିହାରୀ ମଲ୍ଲିକ ଓ ମାନସ କୁମାର ଦାସ, ରାଜନଗର ରେଞ୍ଜ୍ ଅଫିସର ଚିତ୍ତରଞ୍ଜନ ବେଉରା, ମହାକାଳପଡ଼ା ରେଞ୍ଜ୍ ଅଫିସର ଶାନ୍ତନୁ କୁମାର ଦଳାଇ ପ୍ରମୁଖଙ୍କ ତତ୍ତ୍ୱାବଧାନରେ କୁମ୍ଭୀର ଗଣନା କରାଯାଇଥିଲା। ଚଳିତବର୍ଷ ହାଚେଲିଂ (ଛୋଟ ୨ଫୁଟିଆ )-୫୮୫, ୟାର୍ଲେଲିଂ (ବର୍ଷିକିଆ ୨ଫୁଟରୁ ୩ଫୁଟ) -୪୦୩, ଜୁଭେନାଇଲ୍ (୩ଫୁଟରୁ ୬ଫୁଟ) – ୩୨୮, ସବ୍ଆଡଲ୍ଟ (୬ଫୁଟରୁ ୮ଫୁଟ)-୧୬୪, ଆଡଲ୍ଟ (୮ ଫଟରୁ ଉର୍ଦ୍ଧ୍ୱ )- ୩୪୬ଟି କୁମ୍ଭୀର ଗଣନା କରାଯାଇଛି ବୋଲି ବନଖଣ୍ଡ ଅଧିକାରୀ ସୁଦର୍ଶନ ଗୋପୀନାଥ ଯାଦବ ସୂଚନା ଦେଇଛନ୍ତି।
ଭିତରକନିକାରେ କୁମ୍ଭୀର ଗଣନା ଶେଷ, ଗତବର୍ଷ ତୁଳନାରେ ଅଧିକ ୧୫
