ନୂଆଦିଲ୍ଲୀ : ଆଜି ଭାରତ ସମଗ୍ର ବିଶ୍ୱରେ ଏକ ବିଶ୍ୱାସଯୋଗ୍ୟ ଓ ଦାୟିତ୍ୱସମ୍ପନ୍ନ ବନ୍ଧୁ ଭାବେ ପରିଚୟ ଲାଭ କରିଛି। ଭାରତ ବିସ୍ତାରବାଦ ନୁହେଁ ବରଂ ବିକାଶବାଦ ଭାବନରେ କାର୍ଯ୍ୟ କରିଥାଏ। ବୈଶ୍ୱିକ ସୁରକ୍ଷା, ଅର୍ଥନୀତି ଓ ଭୂ-ରାଜନୈତିକ ଗତିଶୀଳତାକୁ ଏକ ଦିଗ ଦେଖାଇବାରେ ଭାରତ ଭୂମିକା ବେଶ ଅଧିକ। ଆର୍ôଥକ ଓ ସାମରିକ କ୍ଷେତ୍ରରେ ଏହା ବେଶ ମହତ୍ତ୍ୱପୂର୍ଣ୍ଣ। ଏକବିଂଶ ଶତାବ୍ଦୀରେ ଭାରତର ସୈନ୍ୟ ସାମର୍ଥ୍ୟ ମଧ୍ୟ ଅଧିକ ସକ୍ଷମ ଓ ଆଧୁନିକ ହେଉ, ଏହା ଦେଶର ପ୍ରାଥମିକତା। ଜଳ, ସ୍ଥଳ, ଆକାଶ, ଗଭୀର ସମୁଦ୍ର ଓ ମହାକାଶ ସମସ୍ତ କ୍ଷେତ୍ରରେ ଭାରତ ନିଜର ସ୍ୱାର୍ଥକୁ ସୁରକ୍ଷିତ କରୁଛି। ଏଥିପାଇଁ ନିରନ୍ତର ସୁଧାର କରାଯାଉଛି ବୋଲି ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି। ଆଜି ପଶ୍ଚିମ ନୌସେନା କମାଣ୍ଡ ମୁମ୍ବାଇରେ ସ୍ୱଦେଶୀ ଜ୍ଞାନକୌଶଳରେ ନିର୍ମିତ ୩ଟି ଅତ୍ୟାଧୁନିକ ଯୁଦ୍ଧ ଜାହାଜ ‘ଆଇଏନଏସ ସୁରତ’, ‘ଆଇଏନଏସ ନୀଳଗିରି’ ଓ ‘ଆଇଏନଏସ ବାଘଶୀର’ ଭାରତୀୟ ନୌସେନାରେ ସାମିଲ ଅବସରରେ ଅୟୋଜିତ ଏକ କାର୍ଯ୍ୟକ୍ରମରେ ମୋଦୀ ଏହା କହିଛନ୍ତି। ମୋଦୀ ରାଷ୍ଟ୍ର ଉଦ୍ଦେଶ୍ୟରେ ଏହି ୩ ଯୁଦ୍ଧ ଜାହାଜକୁ ସମର୍ପିତ କରି କହିଛନ୍ତି ଯେ ଗତ ୧୦ ବର୍ଷ ମଧ୍ୟରେ ଭାରତର ୩ ସେନା ଆର୍ମନିର୍ଭରଶୀଳତା ମନ୍ତ୍ର ଆପଣାଇଛନ୍ତି। ସଙ୍କଟ ସମୟରେ ଅନ୍ୟ ଦେଶ ଉପରେ ଭାରତର ନିର୍ଭରତା କମିିଛି। ଗତ ୧୦ ବର୍ଷ ମଧ୍ୟରେ ନୌସେନାରେ ୩୩ ଜାହାଜ ଓ ୭ ବୁଡ଼ାଜାହାଜକୁ ସାମିଲ କରାଯାଇଛି। ଏହି ୪୦ ନୌସେନା ଜାହାଜ ମଧ୍ୟରେ ୩୯ ଭାରତୀୟ ସିପୟାର୍ଡରେ ନିର୍ମାଣ କରାଯାଇଛି। ଆଜି ଭାରତର ପ୍ରତିରକ୍ଷା ଉତ୍ପାଦନ ୧,୨୫ ଲକ୍ଷ କୋଟିରୁ ଅଧିକ। ଆମେ ୧୦୦ରୁ ଅଧିକ ଦେଶକୁ ପ୍ରତିରକ୍ଷା ସାମଗ୍ରୀ ରପ୍ତାନୀ କରୁଛେ। ଏହା ଆମ ପାଇଁ ଗର୍ବର ବିଷୟ ଯେ ଆଇଏନ୍ଏସ୍ ସୁରତ, ଆଇଏନ୍ଏସ୍ ନୀଳଗିରି ଓ ଆଇଏନ୍ଏସ୍ ବାଘଶୀର ଭାରତରେ ନିର୍ମାଣ ହୋଇଛି। ଆଜି ଭାରତୀୟ ନୌସେନାର ଗୌରବଶାଳୀ ଇତିହାସ ଓ ଆତ୍ମନିର୍ଭର ଭାରତ ଅଭିଯାନର ବହୁତ ବଡ଼ ଦିନ। ଛତ୍ରପତି ଶିବାଜୀ ମହାରାଜ ଭାରତୀୟ ନୌସେନାକୁ ନୂଆ ଶକ୍ତି ଓ ନୂତନ ଭିଜନ ଦେଇଥିଲେ। ଆଜି ଏକବିଂଶ ଶତାବ୍ଦୀରେ ନୌସେନାକୁ ଆହୁରୀ ଶକ୍ତିଶାଳୀ କରିବା ଦିଗରେ ଏକ ବଡ଼ ପଦକ୍ଷେପ ନିଆଯାଇଛି। ପ୍ରଥମ ଥର ଏକ ଡେଷ୍ଟ୍ରୟର, ଏକ ଫ୍ରିଗେଟ୍, ଏକ ସବ-ମେରାଇନକୁ ଏକକାଳୀନ ନୌସେନାରେ ସାମିଲ କରାଯାଉଛି ବୋଲି ମୋଦୀ କହିଛନ୍ତି।
ନୌସେନାରେ ସାମିଲ ହେଲା ୩ ଯୁଦ୍ଧ ଜାହାଜ; ଭାରତ ବିସ୍ତାରବାଦ ନୁହେଁ, ବିକାଶବାଦରେ ବିଶ୍ୱାସ କରେ: ମୋଦୀ
