ଭୁବନେଶ୍ବର: ଆସନ୍ତା ୯ତାରିଖରେ ଉପ ରାଷ୍ଟ୍ରପତି ନିର୍ବାଚନ ନେଇ କଣ ରହିବ ବିଜେଡିର ଆଭିମୁଖ୍ୟ । ଆଜି ସନ୍ଧ୍ୟାରେ ବସୁଛି ବ୍ରେଠକ ।ଉପ ରାଷ୍ଟ୍ରପତି ନିର୍ବାଚନରେ ବିଜେଡ଼ିର ଆଭିମୁଖ୍ୟ ଉପରେ ଏବେ ସମସ୍ତଙ୍କ ନଜର ରହିଛି । ଏହାରି ଭିତରେ ଆଜି ବସିବ ବିଜେଡିର ଗୁରୁତ୍ୱପୂର୍ଣ୍ଣ ପିଏସି ବୈଠକ ଆଜି ସନ୍ଧ୍ୟାରେ ନବୀନ ନିବାସରେ ରାଜନୈତିକ ବ୍ୟାପାର କମିଟି–ପିଏସି ବୈଠକ ଅନୁଷ୍ଠିତ ହେବ । ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବସିବାକୁ ଥିବା ପିଏସି ବୈଠକରେ ପ୍ରମିଳା ମଲ୍ଲିକ, ସଞ୍ଜୟ ଦାସବର୍ମା, ସୁଦାମ ମାର୍ଣ୍ଡି, ନିରଞ୍ଜନ ପୂଜାରୀ, ବିକ୍ରମ କେଶରୀ ଆରୁଖ, ପ୍ରଣବପ୍ରକାଶ ଦାସ, ଟୁକୁନି ସାହୁ, ସସ୍ମିତ ପାତ୍ର ଓ ସନ୍ତୃପ୍ତ ମିଶ୍ର ଯୋଗଦେବାର କାର୍ଯ୍ୟକ୍ରମ ରହିଛି ।
ଏଥିସହ ବିଗତ ତିନିଟି ଉପ ରାଷ୍ଟ୍ରପତି ନିର୍ବାଚନ ଦେଖିଲେ, ସମର୍ଥନ ନେଇ ବିଜେଡିର କୌଣସି ଏକ ନିର୍ଦ୍ଦିଷ୍ଟ ଧାରା ନାହିଁ । ବିଜେଡି ଏନଡିଏ ଛାଡ଼ିବା ପରଠାରୁ ସମଦୂରତା ନୀତିରେ ରହିଛି । କୌଣସି ଏକ ନିର୍ଦ୍ଦିଷ୍ଟ ଧାରାରେ ଉପରାଷ୍ଟ୍ରପତି ନିର୍ବାଚନରେ ଭୋଟିଂ କରି ନାହାନ୍ତି ବିଜେଡି ସାଂସଦ । ୨୦୨୨ ଉପରାଷ୍ଟ୍ରପତି ନିର୍ବାଚନରେ ବିଜେଡି ଏନଡିଏ ପ୍ରାର୍ଥୀ ଜଗଦୀପ ଧନଖଡ଼ଙ୍କୁ ସମର୍ଥନ କରିଥିଲା । ୨୦୧୭ରେ ଉପରାଷ୍ଟ୍ରପତି ନିର୍ବାଚନରେ ୟୁପିଏ ପ୍ରାର୍ଥୀ ଗୋପାଳକୃଷ୍ଣ ଗାନ୍ଧୀଙ୍କୁ ସମର୍ଥନ ଦେଇଥିଲା ।
ଜାଣିରଖନ୍ତୁ ଯେ, ୨୦୧୨ ଉପରାଷ୍ଟ୍ରପତି ନିର୍ବାଚନରୁ ଦୂରେଇ ରହିଥିଲା ବିଜେଡି । ଏହି ନିର୍ବାଚନରେ ଭୋଟ୍ ଦେଇ ନଥିଲା ବିଜେଡି । ଏଥର ବିଜେଡି କ‘ଣ କରିବ? ସଂସଦରେ ଏନଡିଏର ୪୨୨ ସାଂସଦଙ୍କ ସମର୍ଥନ ରହିଛି । ଇଣ୍ଡିଆ ମେଣ୍ଟ ହାତରେ ରହିଛି ୩୧୩ ଜଣଙ୍କ ସମର୍ଥନ । ତେଣୁ ଏନଡିଏ ପ୍ରାର୍ଥୀ ସି ପି ରାଧାକ୍ରିଷ୍ଣନଙ୍କ ବିଜୟ ସୁନିଶ୍ଚିତ । ତଥାପି ୭ ବିଜେଡି ସାଂସଦ କାହାକୁ ଭୋଟେ ଦେବେ, ତାର ରାଜନୈତିକ ଗୁରୁତ୍ବ ବହନ କରୁଛି ।
