ଭୁବନେଶ୍ୱର : ପ୍ରଧାନମନ୍ତ୍ରୀ ଆବାସ୍ ସର୍ଭେ ଆସନ୍ତା ୨୪ରୁ ଆରମ୍ଭ ହେବ। ତାହା ଦୁଇମାସ ଧରି ଚାଲିବ। ହିତାଧିକାରୀମାନେ ଆବାସ ପୋର୍ଟାଲ୍ର ଉଭୟ ଅଫ୍ଲାଇନ୍ ଏବଂ ଅନ୍ଲାଇନ୍ରେ ଆବେଦନ କରିପାରିବେ। ଆବାସ ଘର ବଣ୍ଟାରେ ଏଣିକି ରାଜନୈତିକ ହସ୍ତକ୍ଷେପ ହେବ ନାହିଁ। ଯୋଗ୍ୟ ହିତାଧିକାରୀକୁ ଆବାସ ଘର ଦେବାରୁ କେହି ଚାହିଁଲେ ବି ଅଟକାଇ ପାରିବେ ନାହିଁ। ସୋମବାର ଗଣମାଧ୍ୟମକୁ ଏହି ଗୁରୁତ୍ୱପୂର୍ଣ୍ଣ ସୂଚନା ଦେଇଛନ୍ତି ପଞ୍ଚାୟତିରାଜ ମନ୍ତ୍ରୀ ରବି ନାରାୟଣ ନାୟକ। ସେ କହିଛନ୍ତି ଯେ ବାଇକ୍, ଫ୍ରିଜ୍ ଓ ଲ୍ୟାଣ୍ଡଲାଇନ୍ ଫୋନ୍ ଥିଲେ ବି ଆବାସ ଘର ମିଳିବ। ଆଇନ କଡ଼ାକଡ଼ି ଯୋଗୁୂଁ ତାହା ମିଳୁ ନଥିଲା। ଏବେ ନିୟମ କୋହଳ ହୋଇଛି। ପରିବାରର ମାସିକ ଆୟ ସୀମା ସର୍ବାଧିକ ୧୦ହଜାର ଥିଲା। ଏହାକୁ ବି ବଢ଼ାଯାଇ ୧୫ ହଜାର କରାଯାଇଛି। ଯୋଜନାରେ ଦିବ୍ୟାଙ୍ଗ ଓ ବିଧବାଙ୍କୁ ଅଗ୍ରାଧିକାର ଦିଆଯିବ। ଦୁଇ ମାସ ମଧ୍ୟରେ ରି-ସର୍ଭେ କରାଯିବ। ଏହି ଅବଧି ମଧ୍ୟରେ ଆବେଦନ ଓ ଅନ୍ଲାଇନ୍ ମାଧ୍ୟମରେ ସେସବୁର ଯାଞ୍ଚ୍ କରାଯିବ ବୋଲି ମନ୍ତ୍ରୀ ସ୍ପଷ୍ଟ କରିଛନ୍ତି। ମନ୍ତ୍ରୀ ବିଜେଡି ସରକାରଙ୍କୁ କଟାକ୍ଷ କରି କହିଛନ୍ତି, ଲୋକଙ୍କୁ ଆବସ ଦେବାକୁ ପୂର୍ବ ସରକାରର ଆନ୍ତରିକତା ନଥିଲା। ବିଜୁ ପକ୍କା ଘରରେ ୩ ଲକ୍ଷ ୧୨ ହଜାର ଦେଇଥିଲେ, କିନ୍ତୁ ପ୍ରବଳ ପ୍ରଚାର କରୁଥିଲେ। ଏବେ ସ୍ଥିତି ବଦଳିଛି। ଲୋକେ ବୁଝିଯାଇଛନ୍ତି। ବିଜୁ ପକ୍କା ଘର ନାହିଁ, କିନ୍ତୁ ଛାପା ଅଛି, ଲୋକେ କାଢ଼ିବେ। ଛାପା ବା ଘରେ ସିଲଟ ଲଗେଇଛନ୍ତି, ସେ ସିଲଟ ଉଠିବ। ଖୁବ୍ଶୀଘ୍ର ଲୋକେ ତାକୁ ହଟେଇଦେବେ। ବିଜୁ ପକ୍କାଘର ଆଉ ନାହିଁ। ତା’ର ତାଲିକା ବି ନାହିଁ ବୋଲି ଶ୍ରୀ ନାଏକ ପ୍ରକାଶ କରିଛନ୍ତି।
୨୪ରୁ ଦୁଇ ମାସିଆ ପ୍ରଧାନମନ୍ତ୍ରୀ ‘ଆବାସ ସର୍ଭେ’
