-ଆଗରୁ ଭୁବନେଶ୍ୱରବାସୀ ଶୁଙ୍ଘୁଥିଲେ, ଏବେ ପର୍ଯ୍ୟଟକ ଶୁଙ୍ଘିଲେଣି
-ବି.ଏମ.ସି.ର ଅବାନ୍ତର ପରାମର୍ଶ – ଗଛ ଲଗାଅ
ମନ୍ଦିରମାଳିନୀ ସହର ତଥା ରାଜ୍ୟର ରାଜଧାନୀ ଭୁବନେଶ୍ୱରରେ ଗଦା ହେଉଥିବା ଅଳିଆ ଯୋଗୁ ଜନଜୀବନ ଦିନକୁଦିନ ଅତ୍ୟନ୍ତ ଦୟନୀୟ ହେବାରେ ଲାଗିଛି । କେବେ ହକି ବିଶ୍ୱକପ୍ ପାଇଁ ରାଜଧାନୀ ଚକାଚକ୍ ହେଇଯାଉଛି ତ କେବେ ମାନ୍ୟବର ପ୍ରଧାନମନ୍ତ୍ରୀ କିମ୍ବା ମହାମହିମ ରାଷ୍ଟ୍ରମୁଖ୍ୟ ପାଇଁ ଗସ୍ତ ପାଇଁ ଭୁବନେଶ୍ୱର ରଙ୍ଗାରଙ୍ଗ୍ ହେଇଯାଉଛି । କେବେ ସୈାନ୍ଦର୍ଯ୍ୟକରଣ ପାଇଁ ଭଙ୍ଗାରୁଜା ହୋଇ ପୁନଃନିର୍ମାଣ ସହ ଭୁବନେଶ୍ୱର ସହର ଝଲସୁଛି । ଏସବୁ ବ୍ୟତିରକେ ବିପର୍ଯ୍ୟସ୍ତ ବର୍ଯ୍ୟବସ୍ତୁ ପରିଚାଳନା ସହରବାସୀଙ୍କ ପାଇଁଏକ ମୁଣ୍ଡବିନ୍ଧା କାରଣ ପାଲଟିଛି ।
ସୈନିକ ସ୍କୁଲ ନିକଟରେ ଅଳିଆଗଦାର ଗନ୍ଧ ଏବେ ସମସ୍ତଙ୍କର ନିଦ ହଜାଇବା ସହ ଦୈନନ୍ଦିନ ଜୀବନକୁ ହନ୍ତସନ୍ତ କରିଦେଲାଣି । ଅଳିଆଗଦାର ଦୁର୍ଗନ୍ଧ ସାରା ସହରକୁ ବ୍ୟାପି ଗଲାଣି । ଆଗରୁ ମଞ୍ଚେଶ୍ୱର ରେଳ କଲୋନୀ, ଭି.ଏସ.ଏସ ନଗର, ଗାଢ଼କଣା, ଶୈଳଶ୍ରୀବିହାର, ନୀଳାଦ୍ରିବିହାର, ବାଣୀବିହାର ଭିତରେ ସୀମିତ ଥିବା ପୋଚା ଅଳିଆର ଦୁର୍ଗନ୍ଧ ଏବେ ଧୀରେଧୀରେ ସେ ଅଞ୍ଚଳ ଡେଇଁ ପ୍ରଭୁ ଲିଙ୍ଗରାଜଙ୍କ ମନ୍ଦିର ପାଖରେ ପହଞ୍ଚି ସାରିଲାଣି । ସୁଲୁସୁଲିଆ ଥଣ୍ଡା ପବନ ସାଙ୍ଗକୁ ପୂତିଗନ୍ଧମୟ ଦୁର୍ଗନ୍ଧରେ ଏବେ ଫାଟି ପଡ଼ୁଛି ପୁରୁଣା ଭୁବନେଶ୍ୱର ଅଞ୍ଚଳ । ସକାଳ ଓ ସନ୍ଧ୍ୟା ସମୟରେ ଅନୁଭୂତ ହେଉଛି ଅସହଣୀୟ ଦୁର୍ଗନ୍ଧ । ଲିଙ୍ଗରାଜଙ୍କ ମନ୍ଦିର ଚତୁଃପାର୍ଶ୍ୱରେ ସକାଳେ ପ୍ରାତଃଭ୍ରମଣ ଓ ସଂଧ୍ୟାରେ ସାନ୍ଧ୍ୟଭ୍ରମଣ କରୁଥିବା ଲୋକମାନେ ମାସ୍କ୍ ପିନ୍ଧି ଭ୍ରମଣ କରିବାକୁ ଏକରକମ ବାଧ୍ୟ ହେଉଛନ୍ତି । ଲିଙ୍ଗରାଜଙ୍କ ଦର୍ଶନ ପାଇଁ ରାଜ୍ୟ ବାହାରୁ ଆସୁଥିବା ବିଦେଶୀ ପର୍ଯ୍ୟଟକମାନେ ଦୁର୍ଗନ୍ଧ ସମ୍ଭାଳି ନ ପାରି ମୁହଁ-ନାକକୁ ରୁମାଲରେ ଢାଙ୍କି ପ୍ରଭୁଙ୍କ ଦର୍ଶନ ନିମନ୍ତେ ଯାଉଛନ୍ତି । ସ୍ଥାନୀୟ ସାମନ୍ତାରପୁର, ଗ୍ୟାରେଜ ଛକ, ଗୌରୀନଗର ଅଞ୍ଚଳ ବାସୀମାନେ କବାଟ ଝରକା ବନ୍ଦକରି ଘରେ ରହିବାକୁ ଉଚିତ ମଣୁଛନ୍ତି । ବି.ଏମ୍.ସି ମେୟର ଓ କମିଶନର୍ଙ୍କ ଆଶ୍ୱାସନା ଆଉ କିଛି କାମ ଦେଉନାହିଁ । ଦୁଇ ମାସ ତଳେ ଯେଉଁ ଭଳି ଦୁର୍ଗନ୍ଧମୟ ପରିବେଶ ଥିଲା ଏବେ ମଧ୍ୟ ସେଇ ସମାନ ଅବସ୍ଥା ରହିଛି । ନିକଟରେ ବର୍ଷା ସାଙ୍ଗକୁ କାକର ପଡ଼ି ଦୁର୍ଗନ୍ଧ ଦୁଇଗୁଣ ହେଲାଣି ।
କିଛି ଗୁରୁତ୍ୱପୂର୍ଣ୍ଣ ଦିଗକୁ ଯଦି ଆଲୋଚନା କରାଯାଏ ତେବେ ଏହାକୁ ପ୍ରଶାସନିକ ଅବ୍ୟବସ୍ଥା କିମ୍ବା ଅବହେଳା ବୋଲି କୁହାଯାଇପାରେ । ବିଭିନ୍ନ ସମୟରେ ମାନ୍ୟବର ହାଇକୋର୍ଟ ଓ ସୁପ୍ରିମକୋର୍ଟ ମଧ୍ୟ ଜନବସତି ମଧ୍ୟରେ ଅଳିଆ ଆବର୍ଜନା ଗଚ୍ଛିତ କରି ରଖିବାକୁ ମନା କରିଥିବାର ନିର୍ଦ୍ଦେଶ କୁ ରାଜ୍ୟ ସରକାର ଓ ପ୍ରଶାସନ ଅଣଦେଖା କରୁଥିବାର ଏହା କୁପରିଣାମ ।
ଭୁବନେଶ୍ୱରର ସୈନିକ ସ୍କୁଲ ହେଉଛି ଏପରି ଏକ ସ୍ଥାନ ଯେଉଁଠାରେ ପାଠପଢ଼ା ସହିତ ସ୍ୱତନ୍ତ୍ର ଭାବରେ ଦେଶ ସୁରକ୍ଷାର ପାଠ ପଢୁଥିବା ବିଦ୍ୟାର୍ଥୀମାନେ ରୁହନ୍ତି । ଏହିଭଳି ଗୁରୁତ୍ୱ ବହନ କରୁଥିବା ଓ ନିରାପତ୍ତାର ପାଠ ପଢ଼ାଯାଉଥିବା ଅନୁଷ୍ଠାନର ପାଚେରୀକୁ ଲାଗି ତା’ଠାରୁ ଅଧିକ ଉଚ୍ଚତାରେ ଅଳିଆ ଗଦା କରିବା କେତେ ଯୁକ୍ତିଯୁକ୍ତ ଏବଂ ତାହା ସେହି ବିଦ୍ୟାଳୟର ବିଦ୍ୟାର୍ଥୀମାନଙ୍କ ଜୀବନ ପ୍ରତି କେତେ ବିପଦ ତାହା ଏବେ ବୁଦ୍ଧିଜୀବୀ ମାନେ ପ୍ରଶ୍ନ କଲେଣି । ରାଜନୈତିକ ଦଳମାନେ ଏହାର ଫାଇଦା ନେଇ କିଏ ସତ୍ୟାଗ୍ରହ ଚଳାଇଛନ୍ତି ତ କିଏ ଆନ୍ଦୋଳନ କରି ରାଜ୍ୟବାସୀଙ୍କ ମନ ଜିଣିବାକୁ ଏକ ସୁଯୋଗ ବୋଲି ଭାବି ନିଜର ଚେଷ୍ଠା ଜାରି ରଖିଛନ୍ତି । ସବୁଠାରୁ ଦୁଃଖ ଓ ପରିତାପର ବିଷୟ ଏହିକି ଯେ ମ୍ୟୁନିସପାଲିଟିର ବଡ଼ବାବୁମାନେ ଯାଇ ପରାମର୍ଶ ଦେଉଛନ୍ତି ଯେ ପ୍ରଚୁର ପରିମାଣରେ ଗଛ ଲଗାଇଲେ ଦୁର୍ଗନ୍ଧରୁ ମୁକ୍ତି ମିଳିବ । ଗଛ ଲଗାଇଲେ ପରିବେଶ ଭଲ ରୁହେ, ବାୟୁମଣ୍ଡଳ ଦୂଷିତ ହୁଏନାହିଁ, ଅଙ୍ଗାରକ୍ଳାମ ନିର୍ଗତ ଓ ଅମ୍ଳଜାନ ଗ୍ରହଣ ସୁବିଧାରେ ହୋଇପାରେ । ଗଛ ଲଗାଇବା ଦ୍ୱାରା ବହୁତ ଉପକାର ମିଳେ ଏହା ନିଃସନ୍ଦେହ, କିନ୍ତୁ ଗଛ ଲଗାଇଲେ ଦୁର୍ଗନ୍ଧ କମିବ ଏହା କେଉଁ ଶ୍ରେଣୀର ପାଠରେ ଅଛି ତାହା ଏବେ ବୁଦ୍ଧିଜୀବୀ ମାନେ ପ୍ରଶ୍ନ କଲେଣି ।
ବିଏମସି ଏବେ ଅଳିଆ ଗଦା ପାହାଡ଼ର ଉଚ୍ଚତାକୁ କମ ଦେଖାଇବା ନିମନ୍ତେ ସେଇ ଅଳିଆ ଗଦାସବୁକୁ ସମାନ କରି ସେହିଠାରେ ସେଥିରେ କେତେ ପ୍ରକାରର କେମିକାଲ ଛିଞ୍ଚିବାରେ ବ୍ୟସ୍ତ । ତଥାପି ଦୁର୍ଗନ୍ଧ ରୁ ନିସ୍ତାର ମିଳୁନାହିଁ । ସେହି ନିକଟରେ ଥିବା କିଛି ବଡବଡ ଡାକ୍ତରଖାନା କୁ ରାଜ୍ୟର ବିଭନ୍ନ କୋଣ ଅନୁକୋଣରୁ ରୋଗୀମାନେ ଚିକିତ୍ସା ନିମନ୍ତେ ଆସୁଛନ୍ତି । ଏବେ ସେମାନେ ମଧ୍ୟ ଅଭିଯୋଗ କଲେଣି ଆମେ ଏଠାରେ ନିଜର ରୋଗ ଭଲ କରିବୁ କ’ଣ ବରଂ ଏଠାକୁ ଆସି ଶ୍ୱାସ ରୋଗ ସହିତ ଚର୍ମ ରୋଗ ଓ ମାରାତ୍ମକ କ୍ୟାନସର୍ ବେମାରିକୁ ସାଙ୍ଗରେ ଧରି ଯିବୁ । ଡାକ୍ତରମାନଙ୍କର ବି ସମାନ ମତ, ଅସୁସ୍ଥ ପରିବେଶ, ବାୟୁ ପ୍ରଦୂଷଣ, ହିଁ ଅନେକ ରୋଗ ର କାରଣ । ବିଜେପି ଆଉ କଂଗ୍ରେସର ଅଭିଯୋଗ ରାଜଧାନିରେ ବି.ଏମ.ସି ସ୍ଥାଣୁ ପାଲଟିଗଲାଣି । ପ୍ରଶାସନିକ କର୍ତ୍ତୃପକ୍ଷଙ୍କ ଅପାରଗତା ଯୋଗୁ ସ୍ମାର୍ଟସିଟିବାସୀଙ୍କ ଜୀବନ ଅତ୍ୟନ୍ତ ଦୟନୀୟ ହୋଇପଡ଼ିଛି । ଯେ ପର୍ଯ୍ୟନ୍ତ ଅଳିଆ ଗଦା ଏଠାରୁ ନହଟିଛି ସେ ପର୍ଯ୍ୟନ୍ତ ଆମର ଆନ୍ଦୋଳନ ଜାରି ରହିବ । ଏ ଦିଗରେ ବି.ଏମ.ସି ପ୍ରଶାସନ ଯତ୍ନବାନ ନହେଲେ ରାଜଧାନୀବାସୀଙ୍କ ଦୁର୍ଦ୍ଦଶା ବଢ଼ିବ ସିନା କମିବ ନାହିଁ ।
ଜ୍ଞାନ ରଂଜନ ମିଶ୍ର
ସମ୍ପାଦକ, ଭଏସ୍ ଅଫ୍ ଭିକ୍ଟିମ୍ସ
