ଭୁବନେଶ୍ୱର : ଖଣ୍ଡଗିରି ଯାତ୍ରାରେ ବନ୍ଦ ହେବ ଅଶ୍ଳୀଳତା । ଏନେଇ ଖୁବ ଶୀଘ୍ର ଜାରି ହେବ ମାର୍ଗଦର୍ଶିକା । ଅଶ୍ଳୀଳତାକୁ ନେଇ ସରକାର ମାଗଦର୍ଶିକା ଆଣିବେ ବୋଲି କହିଛନ୍ତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ । ଏନେଇ ଯାତ୍ରା କମିଟି, କଳାକାର ଏବଂ ମାଲିକଙ୍କ ସହ ଆଲୋଚନା ହୋଇଛି । ତେବେ ଖୁବ ଶୀଘ୍ର କଠୋର ଆଇନ ନିଆନଯାଇ କିଛି ସମୟ ଦେବାକୁ ଅନୁରୋଧ କରିଛନ୍ତି ଯାତ୍ରା ମାଲିକ। ବିଶେଷ କରି ମାଘମାସରେ ଖଣ୍ଡଗିରିରେ ହେଉଥିବା ଯାତ୍ରାକୁ ନେଇ ସରକାର ଚିନ୍ତାପ୍ରକଟ କରିଛନ୍ତି । ଏହି ମହୋତ୍ସବରେ ହେବାକୁ ଥିବା ଯାତ୍ରା ପାଇଁ କମିଶନରେଟ ପୋଲିସ ତରଫରୁ ବଛା ବଛା ଅଶ୍ଳୀଳ ନୃତ୍ୟଶୀଳ୍ପିଙ୍କୁ ଏଠାକୁ ଆସିବାକୁ ବାରଣ କରାଯାଇଛି । ଫେବ୍ରୁଆରୀ ୬ରୁ ୧୭ ଯାଏ ଚାଲିବ ଖଣ୍ଡଗିରିରେ ଯାତ୍ରା ମହାସମର । ଆଉ ଏହି ମେଳାରେ ଭିନ୍ନ ଭିନ୍ନ କାହାଣୀର ନାଟକକୁ ନେଇ ଯାତ୍ରା ମହାକୁମ୍ଭ ଦେଖିବାକୁ ମିଳିବ । ଯାତ୍ରା ଯାହା ଆମ ସଂସ୍କୃତି ପରମ୍ପରା ଓ କଳା ପଦର୍ଶନର ଏକ ବଡ ପରିଚାୟକ ଆଉ କଳାକାର ପାଇଁ ଗୋଟେ ବଡ ମଞ୍ଚ । ଧିରେ ଧିରେ ଯାତ୍ରାରେ ଅଶ୍ଲୀଳତା ବଢୁଥିବା ବେଳେ ଏଥର କିନ୍ତୁ ସଜାଗ ରହିଛି ପ୍ରଶାସନ । ଖଣ୍ଡଗିରି ଯାତ୍ରାରେ ଅଶ୍ଲୀଳ ନୃତ୍ୟ ପରିବେଷଣ ଉପରେ ରୋକ୍ ଲାଗିଛି । ପୂର୍ବରୁ ସରକାର ଅଶ୍ଲୀଳତା ଚାଲିବନି ରୋକ୍ ଠୋକ କହୁଥିବା ବେଳେ କିଛି ଯାତ୍ରା ପାର୍ଟି ତାଗିଦ୍କୁ ଖୁଲମଖୁଲା ଉଡାଇ ଦେଉଥିବା ନଜିର ରହିଛି ।
ଖଣ୍ଡଗିରି ଯାତ୍ରାରେ ବନ୍ଦ ହେବ ଅଶ୍ଳୀଳତା, ଜାରି ହେବ ମାର୍ଗଦର୍ଶିକା: ମନ୍ତ୍ରୀ ସୂର୍ଯ୍ୟବଂଶୀ ସୂରଜ
