ମାଘ ପୂର୍ଣ୍ଣିମା ପାଇଁ ମହାକୁମ୍ଭରେ ପ୍ରବଳ ଭିଡ଼, ମେଳା କ୍ଷେତ୍ରକୁ ଯାଇପାରିବ ନାହିଁ କୌଣସି ଗାଡ଼ି

ନୂଆଦିଲ୍ଲୀ: ଉତ୍ତରପ୍ରଦେଶ ପ୍ରୟାଗରାଜରେ ଆସ୍ଥାର ବୁଡ଼ ପକାଇବା ପାଇଁ ଶ୍ରଦ୍ଧାଳୁଙ୍କ ଜବରଦସ୍ତ ଭିଡ଼ ଲାଗିଛି । ଏପର୍ଯ୍ୟନ୍ତ ୪୪ କୋଟିରୁ ଊର୍ଦ୍ଧ୍ବ ଲୋକ ବୁଡ ପକାଇସରିଲେଣି । ଏହାରି ମଧ୍ୟରେ ଭୀଷଣ ଭିଡ଼କୁ କାବୁ କରିବା ପାଇଁ ପୋଲିସ ଏବଂ ପ୍ରଶାସନ ନାକେଦମ ହେଲାଣି । ଭିଡ଼ ପାଇଁ ଗାଡି ମଟର ଘଣ୍ଟା ଘଣ୍ଟା ଅଟକି ରହୁଛି । ଗୋଟେ ଗୋଟେ କିଲୋମିଟର ବି ପାର୍ କରିବାକୁ ଘଣ୍ଟା ଘଣ୍ଟା ସମୟ ଲାଗୁଛି । ଖରା ଯୋଗୁଁ ମଧ୍ୟ ଶ୍ରଦ୍ଧାଳୁ ଛଟପଟ ହେଉଛନ୍ତି । ଗୋଟେ ପଟେ ପ୍ରୟାଗରାଜରେ ଭକ୍ତିମୟ ପରିବେଶ ସୃଷ୍ଟି ହୋଇଥିବା ବେଳେ ଅନ୍ୟପଟେ ହନ୍ତସନ୍ତ ପରିସ୍ଥିତି ସୃଷ୍ଟି ହୋଇଛି । ମାଘ ପୂର୍ଣ୍ଣିମା ଭିଡ଼ ପୂର୍ବରୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଅଧିକାରୀଙ୍କ ସହିତ ବୈଠକ କରିଛନ୍ତି । ମାଘ ପୂର୍ଣ୍ଣିମାରେ ଭିଡ଼କୁ ନିୟନ୍ତ୍ରଣ କରିବା ପାଇଁ ସ୍ବତନ୍ତ୍ର ରଣନୀତି ପ୍ରସ୍ତୁତ କରାଯାଇଛି । ପିଲା ଏବଂ ମହିଳା, ବୟସ୍କଙ୍କୁ ସହଯୋଗ ପାଇଁ ନିର୍ଦ୍ଦେଶ ଦେଇଛନ୍ତି । ଶ୍ରଦ୍ଧାଳୁ କିଭଳି ଗନ୍ତବ୍ୟ ସ୍ଥଳରେ ପହଞ୍ଚିବେ ତାହାକୁ ପ୍ରାଥମିକତା ଦିଆଯାଇଛି । ନଦୀ ହେଉ ଅବା ମେଳା ପରିସର, ଲଗାତାର ସଫାସୁତରା ରଖିବାକୁ କୁହାଯାଇଛି । କୌଣସି ଷ୍ଟେସନରେ ଅତ୍ୟଧିକ ଭିଡ଼ ହେଲେ ଅଧିକ ବସ୍ ଚଲାଇବାକୁ କୁହାଯାଇଛି । ଏହା ଅନୁସାରେ ମେଳା କ୍ଷେତ୍ରକୁ ନୋ ଭେଇକିଲ ଜୋନ ଘୋଷଣା କରାଯାଇଛି । ମହାକୁମ୍ଭକୁ ଆସୁଥିବା ଶ୍ରଦ୍ଧାଳୁଙ୍କ ଗାଡି ସକାଳ ୪ଟାରୁ ସମ୍ବନ୍ଧୀୟ ରୁଟରେ ପାର୍କିଂରେ ପାର୍କ ହେବ । ଜରୁରୀକାଳୀନ ସେବା ଗାଡିକୁ ଏଥିରୁ ବାଦ୍ ଦିଆଯାଇଛି । ଭିଡକୁ ଦୃଷ୍ଟିରେ ରଖି ଭାରି ଯାନକୁ ସହର ଭିତରକୁ ପ୍ରବେଶ ଉପରେ ରୋକ ଲଗାଯାଇଛି । ପ୍ରୟାଗରାଜ ସହରର ସହିତ ମେଳା କ୍ଷେତ୍ରକୁ ଆଜି ସନ୍ଧ୍ୟା ୫ଟା ପରେ କୌଣସି ଗାଡି ଯାଇପାରିବ ନାହିଁ । ଏଥିରେ କେବଳ ଜରୁରୀକାଳୀନ ସେବାକୁ ବାଦ୍ ଦିଆଯାଇଛି । ଯେଉଁମାନେ ମେଳାକୁ ଯାଇଛନ୍ତି, ସେମାନଙ୍କୁ ଫେରିବାକୁ ଅନୁମତି ମିଳିବ । ପ୍ରୟାଗରାଜ ସହର ଏବଂ ମେଳାରେ ଗାଡିର ପ୍ରବେଶ ତଥା ପ୍ରସ୍ଥାନ ଉପରେ ପ୍ରତିବନ୍ଧକ କଳ୍ପବାସୀଙ୍କ ଗାଡ଼ି ଉପରେ ମଧ୍ୟ ଲାଗୁ । ସେପଟେ ପ୍ରବଳ ଭିଡ ପାଇଁ ଗାଡି ରାସ୍ତାରେ ଅଟକି ରହୁଛି, କିଛି ଗାଡି ଷ୍ଟାର୍ଟରେ ରହି ଅପେକ୍ଷା କରୁଥିବାରୁ ଆଉ କିଛି ଭିଡ ପାଇଁ ଧିରେଧିରେ ଚାଲୁଥିବାରୁ ପେଟ୍ରୋଲ ଓ ଡିଜେଲ ବି ଗାଡିରୁ ସେହି ଅନୁସାରେ ସରୁଛି । ସହରର ୫୦ରୁ ଅଧିକ ପେଟ୍ରୋଲ ପମ୍ପରେ ତେଲ ନାହିଁ, ଶୁଖିଲା ପଡିଛି । ଜାମ୍ ପାଇଁ ଟ୍ୟାଙ୍କର ଆସି ପାରୁନି । ସେପଟେ ଅସମ୍ଭାଳ ଭିଡ ପାଇଁ ସହରରେ ଖାଦ୍ୟାଭାବ ଉପୁଜିଛି ।