ଏଟିଏମ୍ ଓ ୟୁପିଆଇରୁ ବାହାରିବ ପିଏଫ ଟଙ୍କା, ଆରମ୍ଭ ହେଲା ନୂଆ ପ୍ଲାଟଫର୍ମ୍

ନୂଆଦିଲ୍ଲୀ: ଇପିଏଫ ଟଙ୍କା ଉଠାଇବା ପାଇଁ ଆପଣ ଅସୁବିଧାର ସମ୍ମୁଖୀନ ହେଉଛନ୍ତି କି? ଟଙ୍କା ଉଠାଇବା ପାଇଁ ବାରମ୍ୱାର ଅଫିସର ଚକ୍କର କାଟୁଛନ୍ତି କି? ତେବେ ଆପଣଙ୍କ ସମସ୍ୟାର ହେବ ସମାଧାନ । ଆଉ ଆପଣଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିବ ନାହିଁ । କାରଣ କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (EPFO) ଏହାର ନୂତନ ପ୍ଲାଟଫର୍ମ EPFO 3.0 ଲଞ୍ଚ କରିବା ପାଇଁ ପ୍ରସ୍ତୁତି ଶେଷ କରିଛି । ନୂତନ ପ୍ଲାଟଫର୍ମ ଲଞ୍ଚ ହେବା ପରେ, ଗ୍ରାହକମାନେ ଏପରି ସୁବିଧା ପାଇବେ ଯେ ସେମାନଙ୍କୁ ଆଉ ପିଏଫ ଟଙ୍କା ଉଠାଇବା ପାଇଁ ଲମ୍ବା ପ୍ରକ୍ରିୟା ଦେଇ ଯିବାକୁ ପଡିବ ନାହିଁ । ନୂତନ EPFO ପ୍ଲାଟଫର୍ମ ଲଞ୍ଚ ହେବା ପରେ, ଗ୍ରାହକମାନେ ATM ଏବଂ UPI ମାଧ୍ୟମରେ ମଧ୍ୟ ଟଙ୍କା ଉଠାଇ ପାରିବେ । ଜୁନ୍ 2025ରୁ, ଆଉ ପିଏଫ ଟଙ୍କା ଉଠାଇବା ପାଇଁ ଲମ୍ୱା ପ୍ରକ୍ରିୟା ଦେଇ ଯିବାକୁ ପଡ଼ିବ ନାହିଁ, EPF ସଦସ୍ୟମାନେ UPI ଏବଂ ATM ମାଧ୍ୟମରେ ତୁରନ୍ତ PF ଟଙ୍କା ଉଠାଇ ପାରିବେ । 

EPFOର ନୂତନ ପ୍ଲାଟଫର୍ମ କ’ଣ? 
କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ ତା’ର ଉପଭୋକ୍ତାଙ୍କୁ ଉତ୍ତମ ସୁବିଧା ପ୍ରଦାନ କରିବା ପାଇଁ EPFO 3.0 ନାମକ ଏକ ନୂତନ ପ୍ଲାଟଫର୍ମ ପ୍ରଚଳନ କରିଛି । ଏହା ଏକ ଦୃଢ଼ ଆଇଟି ପ୍ଲାଟଫର୍ମ ମାଧ୍ୟମରେ ସେବା ପ୍ରଦାନ କରିବ । ଯେପରିକି ଅଟୋ କ୍ଲେମ୍ ସେଟେଲମେଣ୍ଟ୍, ଡିଜିଟାଲ୍ ସଂଶୋଧନ, ATM ଉଠାଣ ଏବଂ UPI ମାଧ୍ୟମରେ ଉଠାଣ ଇତ୍ୟାଦି । 

ନୂତନ ପ୍ଲାଟଫର୍ମରେ କେଉଁ ସୁବିଧା ଉପଲବ୍ଧ ହେବ? 
ନୂତନ ସୁବିଧା ଅନୁଯାୟୀ, EPF ସଦସ୍ୟମାନେ କେବଳ UPI ଏବଂ ATM ମାଧ୍ୟମରେ ଟଙ୍କା ଉଠାଇପାରିବେ ନାହିଁ, ବରଂ ସେମାନଙ୍କର PF ବାଲାନ୍ସ ମଧ୍ୟ ଯାଞ୍ଚ କରିପାରିବେ । ଏହା ବ୍ୟତୀତ, ଲୋକମାନେ ନିଜ ପସନ୍ଦର ବ୍ୟାଙ୍କ ଆକାଉଣ୍ଟକୁ ଟଙ୍କା ସ୍ଥାନାନ୍ତର କରିବାର ସୁବିଧା ମଧ୍ୟ ପାଇବେ । ଏଥିରେ ସୁରକ୍ଷା ବ୍ୟବସ୍ଥା ମଧ୍ୟ ରହିବ, ସୁରକ୍ଷାକୁ ଧ୍ୟାନରେ ରଖି, ଆକାଉଣ୍ଟଧାରୀମାନେ OTP ଯାଞ୍ଚ ମାଧ୍ୟମରେ ସେମାନଙ୍କର EPF ଆକାଉଣ୍ଟକୁ ମଧ୍ୟ ଅପଡେଟ୍ କରିପାରିବେ । 

ATMରୁ କେମିତି ଉଠାଇବେ EPF ଟଙ୍କା ?
ଇପିଏଫଓ ଅଧୀନରେ, ପିଏଫ୍ ଆକାଉଣ୍ଟଧାରୀଙ୍କୁ ଟଙ୍କା ଉଠାଇବା ପାଇଁ କାର୍ଡ ଦିଆଯିବ । ଯାହା ବ୍ୟାଙ୍କର ଏଟିଏମ୍ କାର୍ଡ ପରି ହେବ। 

ଏହି କାର୍ଡଟି ଆକାଉଣ୍ଟଧାରୀଙ୍କ ପିଏଫ ଆକାଉଣ୍ଟ ସହିତ ଲିଙ୍କ୍ ହେବ। 

ଆପଣ ଯେତେ ଟଙ୍କା ଉଠାଇବାକୁ ଚାହୁଛନ୍ତି, ତାହା ଆପଣଙ୍କୁ ଅନଲାଇନରେ କ୍ଲେମ୍ କରିବାକୁ ପଡିବ । ଏହାର 3 ଦିନ ପରେ କ୍ଲେମ୍ ସେଟେଲମେଣ୍ଟ୍ ପୂରା ହେବ ।   

ଏହାପରେ, ଏହି କାର୍ଡ ବ୍ୟବହାର କରି, ଗ୍ରାହକମାନେ ATMରୁ ସିଧାସଳଖ ସେମାନଙ୍କ PF ଆକାଉଣ୍ଟରୁ ଟଙ୍କା ଉଠାଇ ପାରିବେ।

EPF ଉଠାଇବା ପାଇଁ କ’ଣ ଆବଶ୍ୟକ ହେବ? 
ଯଦି ଆପଣ ପିଏଫ୍ ଆକାଉଣ୍ଟରୁ ଟଙ୍କା ଉଠାଇବାକୁ ଚାହୁଛନ୍ତି, ତେବେ ଏଥିପାଇଁ ଆପଣଙ୍କର କିଛି ଜିନିଷର ଆବଶ୍ୟକ ରହିବ । ଆପଣଙ୍କର ୟୁନିଭର୍ସାଲ୍ ଆକାଉଣ୍ଟ୍ ନମ୍ବର (UAN) ସକ୍ରିୟ ହେବା ଆବଶ୍ୟକ । ଏହା ସହିତ, UAN ସହିତ ଲିଙ୍କ୍ ହୋଇଥିବା ମୋବାଇଲ୍ ନମ୍ବର ମଧ୍ୟ ସକ୍ରିୟ ହେବା ଉଚିତ । UANକୁ ଆଧାର, PAN, ଆକାଉଣ୍ଟ ନମ୍ବର ଏବଂ IFSC କୋଡ୍ ଭଳି KYC ଡକ୍ୟୁମେଣ୍ଟ ସହିତ ଲିଙ୍କ୍ କରାଯିବା ଉଚିତ । 

ଏହାସହିତ, ଆପଣଙ୍କ ପାଖରେ କିଛି ଡକ୍ୟୁମେଣ୍ଟ ରହିବା ବି ଗୁରୁତ୍ୱପୂର୍ଣ୍ଣ । ଯେମିତି କି ଠିକଣା ପ୍ରମାଣ, ପରିଚୟ ପ୍ରମାଣପତ୍ର, IFSC କୋଡ୍ ଏବଂ ବ୍ୟାଙ୍କ ଆକାଉଣ୍ଟ ନମ୍ବର ଥିବା କ୍ୟାନ୍ସେଲ୍ ଚେକ୍ ଏବଂ ATM/UPI ଇଣ୍ଟିଗ୍ରେସନ୍ ରହିବା ଦରକାର ।