ନୂଆଦିଲ୍ଲୀ: ଦିଲ୍ଲୀ ବିମାନବନ୍ଦରରେ ଗୁଞ୍ଜରିତ ହେଲା ଭାରତର ଜୟ ଜୟକାର । ଯୁଦ୍ଧଭୂମିରୁ ଫେରିଲେ ଭାରତୀୟ । ହିନ୍ଦୁସ୍ଥାନ ଜିନ୍ଦାବାଦ ଏବଂ ‘ଭାରତ ମାତା କି ଜୟ’ ଧ୍ୱନିରେ କମ୍ପିଲା ଏୟାରପୋର୍ଟ । ଇରାନ ଓ ଇସ୍ରାଏଲ ମଧ୍ୟରେ ଉତ୍ତେଜନା ଲାଗି ରହିଥିବା ବେଳେ ଭାରତ ନିଜ ନାଗରିକଙ୍କୁ ଫେରାଇ ଆଣିବା ପାଇଁ ଅପରେସନ୍ ସିନ୍ଧୁ ଆରମ୍ଭ କରିଛି । ଯୁଦ୍ଧ ଲଗାତାର ଭାବେ ଲାଗିରହିଥିବା ଯୋଗୁଁ, ଭାରତ ଅପରେସନ ସିନ୍ଧୁ ଅଧୀନରେ ଏହାର ନାଗରିକମାନଙ୍କୁ ଫେରାଇ ଆଣୁଛି । ତୃତୀୟ ବିମାନଟି ଇରାନରୁ ଅବତରଣ କରିଛି । ଏଥିରେ ୧୧୭ ଜଣ ଭାରତୀୟଙ୍କୁ ଫେରାଇ ଅଣାଯାଇଛି । ଏପର୍ଯ୍ୟନ୍ତ ୫୧୭ ଜଣ ଭାରତୀୟ ଫେରି ଆସିଲେଣି । ପ୍ରଥମ ବିମାନ ଜୁନ୍ ୧୯ ତାରିଖରେ ୧୧୦ ଜଣ ଛାତ୍ରଙ୍କୁ ନେଇ ଆସିଥିଲା । ଇସ୍ରାଏଲ ଏବଂ ଇରାନ ଉଭୟ ପରସ୍ପର ଉପରେ କ୍ଷେପଣାସ୍ତ୍ର ଏବଂ ଡ୍ରୋନ ମାଡ଼ କରୁଛନ୍ତି । ଏହି ସମୟରେ, ଭାରତ ଇରାନରୁ ତାର ନାଗରିକଙ୍କୁ ସୁରକ୍ଷିତ ଭାବରେ ଫେରାଇ ଆଣୁଛି । ଯୁଦ୍ଧ କ୍ଷେତ୍ର ଇରାନରୁ ତାର ନାଗରିକଙ୍କୁ ଫେରାଇ ଆଣିବା ପାଇଁ ଭାରତ ଅପରେସନ ସିନ୍ଧୁ ଆରମ୍ଭ କରିଛି । ଏହି ଅପରେସନ ଅଧୀନରେ ଏପର୍ଯ୍ୟନ୍ତ ୫୧୭ ଜଣ ଭାରତୀୟ ଫେରି ଆସିଛନ୍ତି ।
ବୈଦେଶିକ ମନ୍ତ୍ରଣାଳୟର ୨୦୨୫ ରିପୋର୍ଟ ଅନୁଯାୟୀ, ଇରାନରେ ୧୦,୭୬୫ ଭାରତୀୟ ରହୁଛନ୍ତି। ଅପରେସନ ସିନ୍ଧୁ ଅଧୀନରେ, ଇରାନରୁ ସୁରକ୍ଷିତ ଭାରତୀୟମାନଙ୍କୁ ନେଇ ତୃତୀୟ ବିମାନ ଶନିବାର, ଜୁନ୍ ୨୧ତାରିଖରେ ଭାରତରେ ପହଞ୍ଚିଛି । ତୁର୍କମେନିସ୍ତାନର ଆଶଗାବାତରୁ ୧୧୭ଜଣ ଭାରତୀୟ ନାଗରିକଙ୍କୁ ଦେଶକୁ ଫେରାଇ ଅଣାଯାଇଛି । ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ଇରାନରୁ ଭାରତୀୟମାନଙ୍କୁ ସ୍ୱଦେଶ ଫେରାଇ ଆଣିବା ସମ୍ପର୍କରେ ସୂଚନା ପୋଷ୍ଟ କରିଛନ୍ତି । ସେ କହିଛନ୍ତି, ତୁର୍କମେନିସ୍ତାନର ଆଶଗାବାତରୁ ଲୋକଙ୍କୁ ନେଇ ଯାଉଥିବା ବିମାନଟି ୨୧ଜୁନରେ ନୂଆଦିଲ୍ଲୀରେ ଅବତରଣ କରିଥିଲା, ଯେଉଁଥିରେ ଭାରତୀୟମାନଙ୍କୁ ଇରାନରୁ ଘରକୁ ଫେରାଇ ଆଣୁଥିଲା । ସେ ଆହୁରି ମଧ୍ୟ କହିଛନ୍ତି, ଅପରେସନ ସିନ୍ଧୁ ଅଧୀନରେ ଏପର୍ଯ୍ୟନ୍ତ ୫୧୭ ଜଣ ଭାରତୀୟ ନାଗରିକ ଇରାନରୁ ଭାରତ ଫେରିଛନ୍ତି ।
ଶୁକ୍ରବାର ବିଳମ୍ବିତ ରାତିରେ, ଆଉ ଏକ ବିମାନ ଇରାନର ମାଶହାଦରୁ ୨୯୦ ଜଣ ଭାରତୀୟ ଛାତ୍ରଙ୍କୁ ଭାରତ ଫେରାଇ ଆଣିଥିଲା । ଇରାନରୁ ଭାରତ ଫେରିଥିବା ଜଣେ ଭାରତୀୟ କହିଛନ୍ତି, “ଯେତେବେଳେ ଆକ୍ରମଣ ଆରମ୍ଭ ହୋଇଥିଲା, ଆମେ ଭାରତ ସରକାରଙ୍କ ସହିତ ଯୋଗାଯୋଗ କରିଥିଲୁ । କାର୍ଯ୍ୟାନୁଷ୍ଠାନ ଏତେ ଶୀଘ୍ର ନିଆଯାଇଥିଲା ଯେ ଆମେ ଶବ୍ଦରେ ଆମର କୃତଜ୍ଞତା ପ୍ରକାଶ କରିପାରିବୁ ନାହିଁ ।
‘ଅପରେସନ୍ ସିନ୍ଧୁ’ ଅଧୀନରେ ଇରାନରୁ ୧୧୦ ଜଣ ଛାତ୍ରଙ୍କୁ ନେଇ ପ୍ରଥମ ବିମାନ ଗୁରୁବାର ପ୍ରତ୍ୟୁଷରେ ଦିଲ୍ଲୀ ଅନ୍ତର୍ଜାତୀୟ ବିମାନବନ୍ଦରରେ ଅବତରଣ କରିଛି। ଉର୍ମିଆ ମେଡିକାଲ୍ ବିଶ୍ୱବିଦ୍ୟାଳୟର ପ୍ରଥମ ବ୍ୟାଚ୍ ଛାତ୍ରମାନଙ୍କୁ ଇରାନରୁ ସଡ଼କ ପଥରେ ଆର୍ମେନିଆ ଏବଂ ତା’ପରେ ବିମାନ ଯୋଗେ ଦୋହା ଏବଂ ସେଠାରୁ ଦିଲ୍ଲୀ ଅଣାଯାଇଥିଲା । ଭାରତୀୟମାନେ ଯୁଦ୍ଧଭୂଇଁରୁ ଘର ବାହୁଡ଼ା ହେବା ପରେ ଆଖିରୁ ଝରି ଆସିଥିଲା ଖୁସିର ଲୁହ । କେହି କେହି ମାଟିକୁ ଛୁଇଁ ପ୍ରଣାମ ବି ହୋଇଥିଲେ ।
