ନୂଆଦିଲ୍ଲୀ: ରୁଷର ଉପକୂଳବର୍ତ୍ତୀ ଅଞ୍ଚଳରେ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି । ରିକ୍ଟର ସ୍କେଲରେ ଭୂମିକମ୍ପର ତୀବ୍ରତା ୮.୮ରେକର୍ଡ କରାଯାଇଛି । ଭୂମିକମ୍ପର କେନ୍ଦ୍ରସ୍ଥଳ କାମଚଟକା ଉପକୂଳ ନିକଟରେ ହୋଇଥିବା ସୂଚନା ମିଳିଛି । ତେବେ ତୀବ୍ର ଭୂମିକମ୍ପ ଝଟକା ପରେ ସୁନାମୀ ଆଲର୍ଟ ଜାରି କରାଯାଇଛି । ଜାପାନ ଓ ଆମେରିକାରେ ସୁନାମୀ ସତର୍କତା ଜାରି ହୋଇଛି । ଉପକୂଳକୁ ମାଡ଼ିଆସିଲା ୧୫ ଫୁଟର ଜୁଆର । ଉପକୂଳ ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଥିବା ସୂଚନା ମିଳିଛି । ଯାହାର ଭିଡିଓ ସାମ୍ନାକୁ ଆସିଛି ।
ଆମେରିକା ଏବଂ ଜାପାନର କିଛି ତଟବର୍ତ୍ତୀ ଅଞ୍ଚଳରେ କିଛି ଘଣ୍ଟା ପାଇଁ ସୁନାମୀ ଚେତାବନୀ ଜାରି କରାଯାଇଛି । କିଛି ସ୍ଥାନରେ ପ୍ରଶାସନ ତରଫରୁ ଲୋକଙ୍କୁ ସଚେତନା କରିବା ପାଇଁ ସାଇରନ ବଜାଯାଉଛି । ତଟବର୍ତ୍ତୀ ଅଞ୍ଚଳକୁ ନ ଯିବାକୁ ଲୋକମାନଙ୍କୁ ଅପିଲ୍ କରାଯାଇଛି । ଜାପାନର ହୋକାଇଡୋର ଉତ୍ତର ଆଇଲାଣ୍ଡରେ ମାଡ଼ ହେଲା ସୁନାମୀ । ଆମେରିକାର କାଲିଫର୍ଣ୍ଣିଆ ଏବଂ ହାୱାଇରେ ଆତଙ୍କ । ପ୍ରଭାବିତ ଲୋକଙ୍କୁ କରାଯାଉଛି ସ୍ଥାନାନ୍ତର । ସାମ୍ନାକୁ ଆସିଥିବା ଭିଡିଓରେ ବିଭିନ୍ନ ସ୍ଥାନର ଭୟାନକ ଜିନିଷ ଦେଖିବାକୁ ମିଳିଛି । ସ୍ଥାନୀୟ ଲୋକ ବିଗତ କିଛି ବର୍ଷ ମଧ୍ୟରେ ଏଭଳି ଭୂମିକମ୍ପ ଝଟକା ଅନୁଭୂତ କରିନାହାନ୍ତି ବୋଲି କହିଛନ୍ତି । ତେଣୁ ଲୋକମାନଙ୍କୁ ସୁରକ୍ଷିତ ସ୍ଥାନକୁ ଯିବାକୁ ଅପିଲ୍ କରାଯାଇଛି ।
ଜାପାନ ପାଣିପାଗ ସଂସ୍ଥା ପକ୍ଷରୁ ମିଳିଥିବା ସୂଚନା ଅନୁସାରେ ଭୂମିକମ୍ପ ସକାଳୁ ସକାଳୁ ହୋଇଥିଲା ଏବଂ ଏହାର ତୀବ୍ରତା ୮.୮ ରେକର୍ଡ ହୋଇଥିଲା । ଏହା ଜାପାନର ପ୍ରଶାନ୍ତ ମହାସାଗରୀୟ ଉପକୂଳରେ ୩ମିଟର ପର୍ଯ୍ୟନ୍ତ ସୁନାମୀ ସତର୍କତା ଜାରି କରାଯାଇଛି ।
