ମୁମ୍ବାଇ: କେବେ କାହା ପାଇଁ ଅଟକୁଥିବା ସହରର ଗତିକୁ ଆଜି ରୋକି ଦେଇଛି ଜଳ । ବର୍ଷା ଯୋଗୁଁ ଆଜି ଠପ୍ ହୋଇଯାଇଛି ସ୍ୱପ୍ନର ସହର ମୁମ୍ବାଇର ଗତି । ପରିସ୍ଥିତି ଏପରି ଯେ ରାସ୍ତାଘାଟ ସବୁକିଛି ଜଳମଗ୍ନ । ଯୁଆଡେ ଚାହିଁବ ଖାଲି ପାଣି ହିଁ ପାଣି । ବୁଡ଼ିଯାଇଛି ରାସ୍ତା ଘାଟ, ବିମାନବନ୍ଦର ଓ ସହରର ଅନେକ ପ୍ରମୁଖ ସ୍ଥାନ । ଯେଉଁ ସହର ନିଜ ବୈଭବ ଉପରେ ଗର୍ବ କରେ ଆଜି ସେ ଜଳବନ୍ଦୀ । ସେଇଥିପାଇଁ ତ କୁହାଯାଏ ଜଳ ବହୁଳେ ସୃଷ୍ଟି ନାଶ ଜଳ ବିହୁନେ ସୃଷ୍ଟି ନାଶ । ହଁ ଆଜ୍ଞା, ଆଜି ବର୍ଷାରେ ବେହାଲ ମାୟନଗରୀ ।
ତେବେ ଏହା ପ୍ରଥମ ଥର ନୁହେଁ, ମୁମ୍ବାଇରେ ପ୍ରତିବର୍ଷ ଏଭଳି ବର୍ଷା ହୁଏ ଏବଂ ଲୋକେ ନାନା ସମସ୍ୟାର ସମ୍ମୁଖୀନ ମଧ୍ୟ ହୁଅନ୍ତି । ହେଲେ ଚଳିତ ବର୍ଷ ମୁମ୍ବାଇରେ ତାଣ୍ଡବ ରଚିଛି ବର୍ଷା ଆଉ ଏଥିରେ ଚାଲିଯାଇଛି ୧୨ ଜଣଙ୍କ ଜୀବନ । ଘର, ସ୍କୁଲ, ଅଫିସ୍ ଠାରୁ ଆରମ୍ଭ କରି ରାସ୍ତା ପର୍ଯ୍ୟନ୍ତ ସବୁଠି ପାଣି ଜମି ରହିଛି । ଅନେକ ଅଞ୍ଚଳରେ ଘରର ପ୍ରଥମ ମହଲା ପର୍ଯ୍ୟନ୍ତ ପାଣି ପହଞ୍ଚିଛି । ପରିସ୍ଥିତି ଏମିତି ଯେ ମୁମ୍ବାଇର ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିଛି ଏବଂ ଘରୋଇ କମ୍ପାନୀଗୁଡ଼ିକ କର୍ମଚାରୀମାନଙ୍କୁ ୱାର୍କ ଫର୍ମ ହୋମ୍ କରିବାକୁ କହିଛନ୍ତି ।
ସ୍ଥାନୀୟ ଟ୍ରେନ୍ ଯାତାୟାତ ମଧ୍ୟ ଗୁରୁତର ଭାବରେ ପ୍ରଭାବିତ ହୋଇଛି । ମୁମ୍ବାଇରେ ବର୍ଷା ଯୋଗୁଁ ୨୫୦ ରୁ ଅଧିକ ବିମାନ ବିଳମ୍ବରେ ଉଡ଼ାଣ କରୁଛି । ମୁମ୍ବାଇର ରାସ୍ତାଗୁଡ଼ିକ ୨ ରୁ ୪ ଫୁଟ ପାଣିରେ ବୁଡ଼ି ରହିଛି । ଜଳବନ୍ଦୀ ଯୋଗୁଁ ମୁମ୍ବାଇର ଅନ୍ଧେରୀ ସବୱେ ମଧ୍ୟ ବନ୍ଦ ରହିଛି । ମୁମ୍ବାଇ ଏବଂ ମହାରାଷ୍ଟ୍ରର ଅନେକ ଜିଲ୍ଲାରେ ନିରନ୍ତର ପ୍ରବଳ ବର୍ଷା ହେଉଛି । ଯାହା ବର୍ତ୍ତମାନ ସାଧାରଣ ଜୀବନଯାତ୍ରାକୁ ପ୍ରବାହିତ କରିଛି । ମୁମ୍ବାଇ, ଥାନେ, ପାଲଘର ଏବଂ ନଭି ମୁମ୍ବାଇର ଅନେକ ଅଞ୍ଚଳରେ ରାସ୍ତାରେ ପାଣି ଜମି ରହିବା ଯୋଗୁଁ ଯାତାୟାତ ଏକପ୍ରକାର ଠପ୍ ହୋଇଯାଇଛି ।
ଆଇଏମଡି ଥାନେ ଏବଂ ପାଲଘର ଜିଲ୍ଲାରେ ୧୮-୧୯ ଅଗଷ୍ଟ ପାଇଁ ରେଡ୍ ଆଲର୍ଟ ଜାରି କରାଯାଇଛି । ବିଏମସି କହିଛି ଯେ ମୁମ୍ବାଇ ଏବଂ ଉପକଣ୍ଠରେ ଲଗାତାର ପ୍ରବଳ ବର୍ଷା ଯୋଗୁଁ ଅନେକ ଅଞ୍ଚଳ ଜଳମଗ୍ନ ହୋଇଛି । ବିପଦ ଏପର୍ଯ୍ୟନ୍ତ ଟଳି ନାହିଁ । ବର୍ଷା ସମ୍ପର୍କରେ ଆଇଏମଡି ରେଡ୍ ଆଲର୍ଟ ଜାରି କରିଛି । ସତର୍କତା ସ୍ୱରୂପ, ସମସ୍ତ ସରକାରୀ କାର୍ଯ୍ୟାଳୟ, ସ୍କୁଲ ଓ କଲେଜ ଗୁଡ଼ିକୁ ବନ୍ଦ ଘୋଷଣା କରାଯାଇଛି । ବିଏମସି ଏହା ମଧ୍ୟ କହିଛି ଯେ ଜରୁରୀକାଳୀନ ସେବା କାର୍ଯ୍ୟାଳୟ ବ୍ୟତୀତ ଅନ୍ୟ ସମସ୍ତ କାର୍ଯ୍ୟାଳୟରେ ଏହି ନିର୍ଦ୍ଦେଶ କାର୍ଯ୍ୟକାରୀ କରାଯାଇଛି ।
