ପୁରୀ (ଭିଓଭି): ଓଡ଼ିଶା ସମେତ ସାରା ଦେଶରେ ନିର୍ବାଚନ ବିଗୁଲ ବାଜିବାକୁ ଯାଉଥିବା ବେଳେ, ପୁରୀ ଜିଲ୍ଲା ପ୍ରଶାସନିକ ସ୍ତରରେ ବଡ ଧରଣର ଅଦଳ ବଦଳର ଚର୍ଚ୍ଚା ଜୋର ଧରିଛି । ରାଜ୍ୟ ନିର୍ବାଚନ କମିଶନ ସଚିବ ବିଜୟ କୁମାର ଦାଶ ପୁରୀର ନୂତନ ଜିଲ୍ଲାପାଳ ଭାବେ ଦାୟିତ୍ୱ ଗ୍ରହଣ କରିଛନ୍ତି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଉଦ୍ଘାଟନ ପରେ ପରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଦାୟିତ୍ୱରେ ଥିବା ରଞ୍ଜନ କୁମାର ଦାଶ ଙ୍କୁ ହଠାତ୍ ବଦଳି କରାଯାଇ ଆର.ଡି.ସି. ସେଂଟ୍ରାଲ ଡିଭିଜନ ଦାୟିତ୍ୱ ଦିଆଯାଇଛି । ଏଥି ସହିତ ପୁରୀ ଜିଲ୍ଲା ପ୍ରଶାସନର ୪ ଜଣ ଅଧିକାରୀଙ୍କ ହଠାତ୍ ଶ୍ରୀମନ୍ଦିର ପ୍ରଶାସନକୁ ବଦଳି କରାଯାଇ ବିଭିନ୍ନ ପଦବୀରେ ଅବସ୍ଥାପିତ କରାଯିବାର ଚର୍ଚ୍ଚା ମଧ୍ୟ ଯୋର ଧରିଛି । ପୁରୀ ର ପୂର୍ବ ଜିଲ୍ଲାପାଳ ସମର୍ଥ ବର୍ମାଙ୍କୁ ଶ୍ରୀମନ୍ଦିରରେ ସ୍ୱତନ୍ତ୍ର ପଦବୀ ସୃଷ୍ଟି କରି ଅତିରିକ୍ତ ମୁଖ୍ୟ ପ୍ରଶାସକ ଭାବେ ଅବସ୍ଥାପିତ କରାଯାଇ ଅଛି । ଉପଜିଲ୍ଲାପାଳ ଶ୍ରୀ ଭବତାରଣ ସାହୁଙ୍କୁ ଶ୍ରୀମନ୍ଦିର ଉପପ୍ରଶାସକ, ଅତିରିକ୍ତ ଜିଲ୍ଲାପାଳ(ପ୍ରଶାସନ) ଶ୍ରୀ ପ୍ରଦୀପ କୁମାର ସାହୁଙ୍କୁ ଶ୍ରୀମନ୍ଦିର ଅତିରିକ୍ତ ପ୍ରଶାସକ ଏବଂ ପୁରୀ ଜିଲ୍ଲାପରିଷଦ ମୁଖ୍ୟ ନିର୍ବାହୀ ଅଧିକାରୀ ଜ୍ୟୋତିଶଙ୍କର ମହାପାତ୍ର ଙ୍କୁ ଶ୍ରୀମନ୍ଦିର ଯୁଗ୍ମ ପ୍ରଶାସକ ଭାବେ ବଦଳି କରାଯାଇଅଛି । ଦୀର୍ଘ ଦିନ ଧରି ପୁରୀ ପ୍ରଶାସନରେ ଅଭିଜ୍ଞତା ସାଉଁଟି ଥିବା ଜିଲ୍ଲା ପ୍ରଶାସନର ଅଭିଜ୍ଞ ଉଚ୍ଚ ଅଧିକାରୀ ମାନଙ୍କୁ ଶ୍ରୀମନ୍ଦିର ପ୍ରଶାସନିକ କାର୍ଯ୍ୟରେ ନୂତନ ନିଯୁକ୍ତି ପ୍ରଦାନ ଶ୍ରୀମନ୍ଦିର ପ୍ରଶାସନିକ କାର୍ଯ୍ୟକୁ ଆହୁରି ତ୍ୱରାନ୍ୱିତ ଏବଂ ଉନ୍ନତ କରାଇବାରେ ସହାୟକ ହେବ ବୋଲି ଆଶା କରାଯାଉଛି ।
ଦାୟିତ୍ବନେଲେ ପୁରୀ ଜିଲ୍ଲାପାଳ
