ଚେନ୍ନାଇ : ତାମିଲନାଡୁ ରାଜନୀତିରେ ବଡ଼ ବିସ୍ଫୋରଣ । ବିଜେପିରୁ ଇସ୍ତଫା ଦେବା ପରେ ନୂଆ ଆଞ୍ଚଳିକ ଦଳ ଗଢିବା ପାଇଁ କହିଛନ୍ତି ଅନ୍ନାମଲାଇ । ଅନ୍ନାମଲାଇ ପ୍ରେସ କନଫରେନ୍ସ କରି ନିଜର ଭବିଷ୍ୟ ବିଷୟରେ କହିଛନ୍ତି । ବିଜେପିରୁ ଇସ୍ତଫା ଦେବା ପରେ କେ ଅନ୍ନାମଲାଇ କହିଛନ୍ତି, ମୁଁ ବିଜେପିରୁ ଇସ୍ତଫା ଦେଇଛି । ଆଜିଠାରୁ ନୂଆ ଯାତ୍ରା ଆରମ୍ଭ ହେବ । ୪ ଡିସେମ୍ବର ୨୦୨୫ରେ ଇସ୍ତଫା ଦେବାକୁ ଦଳକୁ ଜଣାଇଥିଲେ । ନିର୍ବାଚନ ଶେଷ ହେବା ପରେ ବିଜେପି ଯିବାକୁ କହିଥିଲା । ଆମର ରାଜନୈତିକ ଦଳ ତାମିଲନାଡୁରେ ଆଗାମୀ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ ବୋଲି କହିଛନ୍ତି ଅନ୍ନାମଲାଇ। ବିଜେପି ଜାତୀୟ ସଭାପତି ନିତିନ ନବୀନ ତାଙ୍କର ଇସ୍ତଫାପତ୍ରକୁ ଗ୍ରହଣ କରିଛନ୍ତି ।
ଅନ୍ନାମଲାଇ କହିଛନ୍ତି ଯେ, ରାଜନୈତିକ ଲକ୍ଷ୍ୟ ଏବେ ପୂର୍ବ ଅପେକ୍ଷା ବହୁତ ବଡ଼ ହୋଇଯାଇଛି । ଲୋକଙ୍କୁ ସାଥୀରେ ନେଇ ଆଗକୁ ବଢିବାକୁ ହେବ । ବିଜେପିରେ ଥିବା ସମୟରେ ସେ କେବେ ତାମିଲନାଡ଼ୁର ପରିଚୟ, ସଂସ୍କୃତି ଏବଂ ରାଜ୍ୟର ଜଳ ଅଧିକାର ଭଳି ପ୍ରସଙ୍ଗରେ ସାଲିସ୍ କରିନାହାଁନ୍ତି । ବହୁତ ଭାବିଚିନ୍ତି ବିଜେପି ଛାଡ଼ିବା ନିଷ୍ପତ୍ତି ନେଇଛି ।
୨୦୨୦-୨୧ ମସିହାରେ ବିଜେପିରେ ଯୋଗଦେବା ପରେ ଅନ୍ନାମଲାଇ ଅତି କମ୍ ସମୟ ମଧ୍ୟରେ ରାଜ୍ୟରେ ଦଳର ସବୁଠାରୁ ଜନପ୍ରିୟ ଓ ପ୍ରଭାବଶାଳୀ ନେତା ହୋଇଥିଲେ । ଗତ ଜୁନ୍ ୨ ତାରିଖରେ ଦିଲ୍ଲୀରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ, ଜାତୀୟ ସଭାପତି ନୀତିନ ନବୀନ ଏବଂ ବି.ଏଲ୍. ସନ୍ତୋଷଙ୍କ ଭଳି ଶୀର୍ଷ ନେତୃତ୍ୱଙ୍କ ସହ ଦୀର୍ଘ ଆଲୋଚନା କରିବା ପରେ ସେ ନିଜର ଇସ୍ତଫା ପତ୍ର ଦେଇଥିଲେ । ୨୦୨୬ ତାମିଲନାଡୁ ବିଧାନସଭା ନିର୍ବାଚନରେ ବିଜେପିର ଆଶାନୁରୂପ ପ୍ରଦର୍ଶନ ହୋଇନପାରିବା ଏବଂ ଏଆଇଏଡିଏମକେ ସହ ମେଣ୍ଟକୁ ନେଇ ଦଳର କେନ୍ଦ୍ରୀୟ ନେତୃତ୍ୱଙ୍କ ସହ ତାଙ୍କର ମତଭେଦ ରହିଥିଲା । ଆନ୍ନାମଲାଇ ତାମିଲନାଡୁରେ ବିଜେପିକୁ କୌଣସି ଆଞ୍ଚଳିକ ଦଳର ସାହାରା ନନେଇ ସ୍ୱତନ୍ତ୍ର ଭାବେ ଗଢ଼ିବାକୁ ଚାହୁଁଥିଲେ, ଯାହାକୁ ନେଇ ଦଳ ମଧ୍ୟରେ ଦୀର୍ଘ ଦିନ ହେବ ବିବାଦ ଚାଲିଥିଲା।
