ନୂଆଦିଲ୍ଲୀ : ସେସେଲ୍ସର ସର୍ବୋଚ୍ଚ ସମ୍ମାନରେ ସମ୍ମାନୀତ ହେଲେ ପ୍ରଧାନମନ୍ତ୍ରୀ ମୋଦି । ସେସେଲ୍ସର ରାଷ୍ଟ୍ରପତି ଡ. ପାଟ୍ରିକ ହର୍ମିନି ପ୍ରଧାନମନ୍ତ୍ରୀ ମୋଦୀଙ୍କୁ ଦେଶର ସର୍ବୋଚ୍ଚ ସମ୍ମାନ “ଗାର୍ଡିଆନ ଅଫ ଦି ବ୍ଲୁ ହୋରାଇଜନ’ ପ୍ରଦାନ କରିଛନ୍ତି । ପରିବେଶ ସଂରକ୍ଷଣ, ସ୍ଥାୟୀ ବିକାଶ ଏବଂ ଜଳବାୟୁ ପରିବର୍ତ୍ତନର ମୁକାବିଲା କ୍ଷେତ୍ରରେ ପ୍ରଧାନମନ୍ତ୍ରୀ ମୋଦିଙ୍କ ବିଶ୍ୱସ୍ତରୀୟ ନେତୃତ୍ୱ ପାଇଁ ତାଙ୍କୁ ଏହି ପୁରସ୍କାର ମିଳିଛି ।
ଗାର୍ଡିଆନ ଅଫ ଦି ବ୍ଲୁ ହୋରାଇଜନ” ହେଉଛି ଆନ୍ତର୍ଜାତୀୟ ବ୍ୟକ୍ତିତ୍ୱମାନଙ୍କ ପାଇଁ ସେସେଲ୍ସର ସର୍ବୋଚ୍ଚ ସମ୍ମାନ । ସାମୁଦ୍ରିକ ସମ୍ପଦର ଦାୟିତ୍ୱପୂର୍ଣ୍ଣ ପରିଚାଳନା ଏବଂ ‘ବ୍ଲୁ ଇକୋନୋମି’ ର ପ୍ରୋତ୍ସାହନ ପାଇଁ ଏହି ସମ୍ମାନ ଦିଆଯାଇଛି । ଭାରତ ଏବଂ ସେସେଲ୍ସ ମଧ୍ୟରେ କୂଟନୀତିକ ସମ୍ପର୍କର ୫୦ ବର୍ଷ ପୂର୍ତ୍ତି ଅବସରରେ ମୋଦିଙ୍କୁ ସମ୍ମାନୀତ କରିଛି ସେସେଲ୍ସ । ଉଭୟ ନେତା ‘ଏକ ପେଡ୍ ମାଁ କେ ନାମ’ ଅଭିଯାନ ଅଧୀନରେ ଏକ ‘କୋକୋ ଡି ମେର’ ଚାରା ରୋପଣ କରିଛନ୍ତି ।
ଏହି ସମ୍ମାନକୁ ମିଶାଇ ପ୍ରଧାନମନ୍ତ୍ରୀ ମୋଦୀଙ୍କୁ ପରିବେଶ ଏବଂ ସ୍ଥାୟୀ ବିକାଶ ପାଇଁ ଚତୁର୍ଥ ଆନ୍ତର୍ଜାତୀୟ ପୁରସ୍କାର ମିଳିଛି । ୩ ଦିନିଆ ଗସ୍ତ ଅବସରରେ ସେସେଲ୍ସର ସଂସଦକୁ ମଧ୍ୟସମ୍ବୋଧିତ କରିଛନ୍ତି ପ୍ରଧାନମନ୍ତ୍ରୀ ମୋଦୀ । ସେସେଲ୍ସ-ଭାରତର ୫୦ ବର୍ଷର ଭାଗିଦାରୀକୁ ମନେ ପକାଇବା ସହ ଭବିଷ୍ୟତର କାର୍ଯ୍ୟପନ୍ଥା ସଂପର୍କରେ ଆଲୋଚନା କରିଛନ୍ତି ପିଏମ ମୋଦୀ । ସେସଲ୍ସର ସ୍ୱାଧୀନତାର ଆରମ୍ଭରେ ଭାରତୀୟ ନୌସେନା ଜାହାଜ, ଆଇଏନଏସ ନୀଳଗିରି, ପୋର୍ଟ ଭିକ୍ଟୋରିଆରେ ଉପସ୍ଥିତ ଥିଲା।
ଏବେ ସୁବର୍ଣ୍ଣଜୟନ୍ତୀରେ ଆଇଏନଏସ ତରକାଶ ଓ ଆଇଏନଏସ ଇକ୍ଷକ ପୋର୍ଟ ଭିକ୍ଟୋରିଆରେ ମୁତୟନ ଥିବା କହିଛନ୍ତି ପ୍ରଧାନମନ୍ତ୍ରୀ ମୋଦି । ସାମୁଦ୍ରିକ ସୁରକ୍ଷା, ସାମର୍ଥ୍ୟ ବୃଦ୍ଧି, ହାଇଡ୍ରୋଗ୍ରାଫି ଏବଂ ସାମୁଦ୍ରିକ କ୍ଷେତ୍ର ସଚେତନତା କ୍ଷେତ୍ରରେ ସହଯୋଗ ଦୁହି ଦେଶର ପ୍ରତିବଦ୍ଧତାକୁ ପ୍ରତିଫଳିତ କରେ ବୋଲି ପ୍ରଧାନମନ୍ତ୍ରୀ କହିଛନ୍ତି ।
